PATHIAN’ VUALZAWLNA BANG LOH DIING?

0

Pathian’ Vualzawlna lam tuamtuam ah i dong zelzel uhi. Sa-lam hi’n Kha-lam thil a Ama’ Vualzawlna i tan chiang in kipahna’ nasatak mai hon tun sek a, kipahna mittui bang luangluang thei hi.

Vualzawlna i chih chiang in Sa-lam a hauhsaknate, lohchinnate, masuannate, damtheihnate, mite deihsaknate leh adangdang i donte ahi hi. Hiai Sa-lam a thilhoih i tante phet lou in, Kha-lam a kipahna leh khantouhna chituamtuam i muhte leng Pathian Vualzawlna mah ahi chih i thei hi. Toupa’ iitna pen A vualzawlnate tungtawn a chet anuam mahmah mai maw?
Halleluiah, Toupa I phat ahi, A hon vualzawlna simsenlouh i donte ziak in!

Ahia lah, Toupa’ Vualzawlna thupitak i tante ziak a i kipahna tan ah beisak i hih khak zel ding lauhhuai mahmah sa ing. Kipahna tan a i beisak sek pen uh Sa-lam hi’n Kha-lam hitaleh, i khanmohbawk uh hi in ka chian hi.
Sa-lam leh Kha-lam a vualzawlna i donte mimal/ mahni innkuan a di kia a hum ding hilou hi. Pathian Nnasep daan huaidaan hilou hi. Pathian in mi a vualzawl chiang in hopsawn/khenkhiat di toh mi vualzawl teitei hi.

Gentehna: Sum leh pai/ neih leh lam a vualzawl a om ihih leh, Pathian’ tate tasam a om panpih tuak om gige uh hi. Huchilou a mite tungtawn a hehpihna, zahngaihna, ngaihnatna, deihsakna, ngaihdamna, thumna, awlmohna, lainatna etc i muhte, huchi bangmah a piaksawn/hopsawn ding mi ana om gige zel uh hi.

Pathian’ Vualzawlna i donte pen, Amah lam ah i mitte suan a, Amah lam naihna ding a panlakna ding a a hon piak mah ahi hi. Huaiziakin, Ama tup daan a, Ama hon deihna tan i tunna di a i zat leh, zang dik i suak ding hi. I zat dik leh, Ama’n pahtawina leh thupina leh minthanna mu hi. I zat khelh leh lah, Amah nelhsiah a, hihmualphou leh hih minse tu in ki pang hi.

A lamdang leh thupi mahmah ahih leh, Toupa’n khelh hon kiphawksak na ding hiam, Ama deihlam a i lungsim put a hon heisak na di’n le vualzawlna zang lotel hi. A iitna, A hehpihna, A zahngaihna chihte chu ahisa ahi.
Vualzawlna tampi i dong ta a, hilele i don di zah dong lou i hi kha diam chih hun hong omsek in ka thei hi. Hiaiteng le hun lua i chih hun omsek hi. Huchi di daan mah ahi diam? A hihke’h vualzawlna guitung lou ahi kha diam? Eimah mah in vualzawlna i tan dite ana ki daal kha hizaw sek hi in leng ka thei a, aziak hi ding a ka gintat khenkhat te anuai ah aw:
1) Vualzawlna donsate a kipahna chang theihlouh.
2) Mahni adia kia a ana hum.
3) Kisaktheihna a ana zang.
4) Mi vualzawlna tan dingte ana khaktan sak
5) Pathian naihna/Thumanna di a zang kha lou
6) Toupa’n hon muhsak utte muhna a zang utlou.
7) I tanvou/ ahidi mawng a ngaihkhaak.
8) Vualzawlna tang dia phu i kisak tan om mawk.
9) Kiningching tak a om zen a, thumkhah.
10) Mi vualzawlna tante hazaatna.

Vualzawlna lamkhat a i donte, huaibang chet sese hilou a lamtuam ah piaksawn theih hi. I muhna mite tung mah ah leng apoimoh daan in lamtuam ah piakkik theih a, mituam te ah leng piaksawn theih ahihlam chiamteh ni.
Gentehna:
1)Zahngaihna i tan leh, sum a piaksawn theih.
2) Sum leh pai i tan leh, iitna leh awlmohna suah theih
3) Ngaihdamna i tan leh, Ngaihnatna suah theih.
Hiai a ka genkhak teng thum lou adang leng ngaihtuah khe law di’n kon gingta.

A tawpna di’n, Pathian’ Vualzawlna don i kithalawp tak a sang in, i ki thalawp tuk in a piaksawn diing leng kithalawp di’n i kihanthawn hi. Huchi leh Amah pahtawi a, thupisakte kihi diing hi.

Simtute tengteng Toupa’ Vualzawlna thupitak i tante pesawn zel thei diing in Toupa’n hon panpih chiat hen.

Bible reference: 2 Korinthte 9:8-11, Matthai 10:8, Matthai 18:21-35, Paunaakte 11:25-26, Hebrute 13:16, Ephesate 1:3, Paunaakte 3:27

 

– Chingngaihlian Tunglut

May 4, 2019/Article no. 03

(Laigelh toh kisai kupbeh nuam a omleh, laigelhtu +919892316430 ah thuzaak theih diing hi.)

Chingngaihlian Tunglut
WRITTEN BY

Chingngaihlian Tunglut

She is one of the two co-founders and the in-house counsellor. Her freelancing works include lots of voluntary and 'Pro Bono' counselling in church and community. She is also extensively involved as a counsellor at Bombay YMCA Counselling Centre, CBD Belapur, Navi Mumbai. She has been trained and certified in several Mental Health and associated courses. She is also a certified trainer. She is passionate about young people and the issues they face. She has facilitated workshops on Mental Health and other relevant issues and is involved as facilitator in counselling courses and Sunday School teachers training from time to time.

(Please contact her for seminars and workshops about adolescent and youth issues and mental health etc. As a trainer, she is also passionate about training and equipping people to better serve the body of the Lord Jesus Christ in children, youth and women ministry)

Leave a Reply

Your email address will not be published. Required fields are marked *

Book Appointment