‘PTL’ CHI LOU IN ‘PRAISE THE LORD’ CHI ZAW NI

0
I tulel khovel dinmun ah, bangkim a baihsam pen, a kinthei pen leh a tom thei pen a hih vek i utta uhi. Internet leh Social Media in i huai dinmun pen taw-sawn mahmah a, hiai tegel zanglou a hinkhua zat diing bang taaksapna lianpi khat a ngaih theih di hial khop in i hinkhua uah i thupisak mahmah ta uhi.
Social Media (adiak a facebook leh whatsapp) bang thuhoih-lahoih genna, suutkhawmna leh ngaihdan hoih pipi sunkhawmna diing bang in phatuam tak, kin tak leh awlsamtak in kizang hi. Fake Account zang a banglouteng gente leh Account diktak zang a banglouteng gente chu atuam himhim koih zual le’ng.
Whatsapp ngial bang chu kihahzat petmah in, Saptuam leh Khotang kivaipuakna leh thu kin leh poimoh kizaaksakna leh kizaaktuahna diing in leng i zang changkang mahmah uhi. Huai kawmkawm in, thuman leh thumanlou toh, thutak hi’n zuau thu hitaleh, thugelh, laa, milim leh adangdang forward tamthei petmah hi. Awlmohna chi tuamtuam ahi chimai ni, piiching chiatchiat.
Huchi ahihtak ziak in, Internet lingo (pau), expression leh emoji chihte bang leng a zat dan kisin mai ngaita hi. Aziak chu, i zatkhelh leh i gentup lehlam (opposite) khawng genkhak daih in om a, kisuanlah huai pi suak sek hi. Internet ziak in i paudan leh ngaihdan genkhiakdan bang hong kikhek petmahta a, a tom-a-laak (shortcut/ abbreviation) in i pau ziahziah ta uhi.
‘Ok’ chihna di mun ah bang ‘k’ chouh khawng a kizat chiang in ka na ning sek hi. ” ‘O’ type behna dia haksatna bangchibang tuak tel uh ade aw?” ka chi ut phial sek hi. A huchih louh chiah, buai-buai a birthday ki wish na dia ‘hbd’ / ‘HBD’ (capital letters chu azia omdeuh lai) mi facebook wall hiam whatsapp group hiam a va koih khia chih bang chu, hilou deuh bang kana sa thei mahmah hi. ‘Goodnight’ or ‘Good Morning’ lah GN or GM a kaihtom hita. Changkangna dan a ngai chu ihi di ua, changkangna di huaizah lak ah hiaite pentak a changkan louh zaw, poi di’n ka gingta hetkei ka chi!
Whatsapp committee group (Etsakna: saptuam committee leh committee dangdang) group khenkhat lah chu, Vai-sai diing hiam thu-kup diing hiam hong om chiang a, kumlou a khutpi-liik (👍) khong a kidawn thuk khawng ahih chiang a bang chu nop khollou mawle? Hou a hou lah bang hilehleng hou het lou ahihna chu, hon sukkhakdan khat anuamlou om hiven. ‘Yes’ ahihkeileh ‘No’ bek chu thoh khethei sek le’ng hoih diing hia. A khente lah group (committee groupte gen lai le’ng) a om hinazenpi a, kum ngei mawngmawng lou, ngaihdan lah sung ngeilou (a neilou bel hilou), dai dide a om in, a phatuam leng gen (support) lou, ase diing leng gen (support) tuan lou. Hiai bang dinmun a i theih d’ua poimoh chu, thil hoih support ngamlouh ziak a dai i hih uleh, a sia support i hi chihna ahi. Huaiban ah, committe a dinmun i let pen ngaihnepna leng ahi. A kitawp/kiawngsuut vet i hihkeileh chu, i ngaihdan genkhiak pen i mohpuakna ahi chih i theih uh poimoh hi.
Social Media i chih, Pathian’ Thu leh La kupna leh puankhiakna leh forwardna diing in leng vanzat manphatak suakta hi. Huchi lampang himhim a hong ki post chiang in, emoji tuamtuamte i zang zel uhi. Hiai ah bangzah hiam i taaklang diing a chian zawk semna di’n:
👍🙏 , 😇 , 😍 , 👌🙌👏💪
Hiaite khawng zang in i na dawng thuk tangpi uhi. Huaidan in, ‘Amen’ a ngaih leh ‘Amen’ in i dawng sek hi. Huai kia hilou in, Pathian’ Nnasep thupi, lamdang leh kipahhuai thute leng tampi hong ki post zel zel hi. Huai hun chiang in ‘PTL’ chih dawnthukna ka na mu tam simta hi. Ka ngaihdan toh ana kituak kei sek hi. Whatsapp group khat ah ‘PTL’ chih thumal ka muh masak pen lai in, “bang chihna a de aw?” chi in ka na ngaihtuah a, huai laitak in midang khat in ‘Praise the Lord’ chi in dawnthukna a hon koihkhiak beh leh, PTL kha ‘Praise the Lord’ chihna ahi chih ka na man hi. A short cut a kizang tengteng poisa law khol kei mahleng, ‘PTL’ leh GBU’ chiah chu ngaihhak kasa a, poi leng kasa hi. ‘PTL’ sang a ‘Praise the Lord’ chih type huchi tel a haksa zaw hikhollou di eive. ‘Text prediction’ om zomah lai. ‘Toupa Phat In Om Hen’ chih na di’a ‘TPIOH’ va gelh di chih mawng mawng! ‘PHAT A OMPA’N a sang ut diam?’ chi ut phial ka hi.
Sam 29:2
TOUPA kiang ah a min thupina pia unla; siangthou kilawmna silh in TOUPA chibai buk un.
I Pathian thupi leh muanhuai, iitna, hehpihna leh zahngaihna a dim, lei leh van leh asung a om tengteng Siampa, sihna akipat  A Tapa Jesu Khrist tungtawn a hon hunkhia a, Ama’ Kumpigam luah ding a hon sam Pa’ Nnasep pen nang le ana phawk sam nahi chih mite na theihsak ut leh ‘PTL’ sang in ‘Praise The Lord’ chih ana zang ta mai ve ni aw? Bangkim tung a thunei Pathian phatna kamteh utsam i hihleh, a  Short-cut in zaw hih nawnlouh hamham sawm le’ng bang achi dia, Khasiangthou in a awlsam theipen dia short-cut dia hon makaih chih lah hisam lou dia maw? Amah thupi lua ahihman in, A Nnasep i phawkna latsak nang in leng zahtattak in thumal leh laimalte zang ta ni. Kisikhuai hetlou diing hi. Haksa hetlou zomah lai maw?
I mihing hinpihte Nnasep hoih i phawkna mite muh di’a i phoukhiak chiang in short/abbreviation in i hih ngei tel sam a! Nna manpha i kisepsak chiang un whatsapp tungtawn khong in TY (Thank You) chih chouh khong in kipahthu i kigen ngei sam ua. “Hiai-huai na hih a na fel lua/non hihsak a ka kipaak lua” chi bek diing in phone call i bawl sek vele maw, kipahthu i genna di’n leh a hon muhdan uh a siat louh na di’n?
Pathian pen a kikhek ngeilou hi a, thupi leh tungnung pen hi gige hi. En leng Amah Thu toh kisai leh a Nnasepte i theihpihna i phoukhiak chiang in a short cut in hih nawn kei ni. Khrist’ nungzui i hihna ua, i hih diingte lak a haksa hetlou khat ahi chih thei ni.
1 Korinthte 10:31
Huchi’n, na nek uh hiam na dawn uh hiam, na hih peuhmah uah leng, Pathian thupina diing ngen in hih un. 
I hih khempeuh Amah thupina diing a, hih i hihleh, Amah min lohna leh phatna, A Min suang a vualzawlna sapna/ngetna leh adangdangte ah leng zahtattak in a tawn in gelh di’n tha sial kei ni.
Mi a dia vualzawlna i sap chiang in GBU chi nawn lou in ‘God Bless You’ chih kisin pah le maw? Pathian’ Vualzawlna sapsak i hihlam ki thei ni, Nna thupi/ kampau thupi tak sam i hihlam kithei in pilvang leh zahtaat tak in hih ni.
A hou chikchik te a kibawl i pat kei uleh, a thupite a kibawl haksa sa law kha tel diing ihi uh.
‘Khemkhem’ i chih di hong tamluat chiang a, Pathian poi khoihkha diing khelhnate le’ng ‘khemkhem’ chihsuk zel baihlam lua ahihman in, pilvan poimoh petmah hi. Pathian’ Min lohna hiam, Pathian vualzawlna mite adia i sap chiang in, sappau sese le ngai hetlou hi. Sappau i zatleh leng, a laimal sang in a lam sau in gelh/sun le’ng thasial huai hetlou hi.
Thilhoih hih sunzom zel diing in Toupa’n hon vualzawl in hatna hon pe chiat hen aw. 
– Chingngaihlian Tunglut
February 05, 2020/ Article No. 12
(Laigelh toh kisai kupbeh nuam a om leh, +919892316430 ah laigelhtu thuzaak theih diing hi.)
Chingngaihlian Tunglut
WRITTEN BY

Chingngaihlian Tunglut

She is one of our co-founder and our in-house counsellor. She does freelance counselling in church and community. She is also involved as a counsellor at Bombay YMCA Counselling Centre, CBD Belapur, Navi Mumbai.

Leave a Reply

Your email address will not be published.

Book Appointment