SAWTLOUCHIK SUNG

0

Khovel a Laibu tamtak thugelh hoih pipi sim theih ding a dim in aom a tuate lak ahleng Pathian thu a kigelhnate bang sim ut leh sim utlouh chi’n i khenthei lai uhi. A tangpi a i sim ut penpen te utuh Pathian vualzawlna chihte, Amah thuchiamte: Kipahna, Lungmuanna leh Bitna chih thu a kigennate ahi deuh hi. Hichi bang a laibu hoih pipi muh ding a dim a om nalak a khenkhat in haksatna kichite leh gimthuakna kichi lam pumpelh hileh kilawm in tuate muhtheih ding atam lolawmlawm kei hi. Laibu tamtak a kigelhte leh Online tungtawn a i muh theih uh tamtak a omlai in akimu mengmeng lou leh atam zaw in (i chi ding a) i sim utlouh uleh i zak ngamlouh sek utuh Gimthuakna a kigen khakna thu ahi. Huchi ahihlai in Laisiangthou ah hiai i mu hi, “…Khovel ah zaw gim na thuak ding uh” – Johan 16:33.

Chihleh hiai khovel gimthuakna mun a bang chi dan a lungmuanna neithei ding mah i hia? chihtuh dotna poimohtak mai kumtawn a daih ding a om thei hi. I tangteelna Johan 16na a i Hondampa Jesu’n nungzuite kiang a agentuh, “….Sawtlouchik in nou kei n’on mu kei ding ua; sawtlouchik mah in nou kei n’on munawn ding uh, a chi hi.” v16. Hiai a sawtlouchik chi a i Hondampa’n  a gen pen tuh nungzuite buaina khop apha a tuamah tuh a leh dot kik uh hi. “….Amau mah in, sawtlouchik, a chih bang chihna ahia? A thugen i theisiam kei uh, a chi uhi.” v18. Jesu’n hiai a genna ziak tuh chiangtakin bung Johan 16na ah i muthei hi. A tawm a gen in, i Hondampa Jesu’n a sih hun leh a thohhun ding huaituh nithum (3 days) agenna ahi zaw hi.

Tuni’n hiai i tangteelna tungtawn in sinlai entou leng, nungzuite’ a ding in hiai Sawtlouchik kichi tuh tangtawn ding abang taktak petmah hi. Bangziak in i chileh, Jesu sihna leh athuaknate mu a tuate theipih tu ading in sawtlouchik ahi chih theih ahi zenzen keihi. Mihing ngaihtuahna mai inleng tua hun a nungzuite bang in kikoih hileng a haksat ding dan ngaihtuah but leng ahikei a, gen ngam leng ahikei hi. Hiai khovel ah nikhat chauh lel leng banghiam haksatna i tuahchiang un hun bang sawt i sa petmah uhi. Thilsui mite’n leng a muhtheih utuh mihing te’n hinkhua a haksatna chituamtuam ziak a lungbuaina leh lunggimna a tuah chiang un hun (time) pen sawt mah ahi achi uhi. Hiai pen khovel pumpi a hun pen sawt hizaw lou in, tua bang a amaituah tu’ ngaihtuahnate ahi zaw hi. Alehlam ah banghiam kipahna, lungnopna leh hon maisak thei thilte lak a I om chiang in sawtlouchik sung bang lel in a tom thei mahmah hi.

Hinkhua a practical tak a hun sawt dan theihtheih a omna tuh damlouhna ziak a kikepnate ahi chileng i theisiam pen ding hi. Damdoi inn ah i om a, zan ihmuttheihlouhnate ziak bang, ngaihtuahnate ziak bang in khovak ding kal ngaklah takin i om a himahleh sana bang awl deuhdeuh a i theih hun a om hi. Niteng khosakna leh nekzonnate ziak a haksatna i tuah hun in thumna i nei a; i thumnate dawng a om ding hiam chihleng ngaihtuah banlou in Toupa thilhihtheihna leh a hon dawngnate chik chiang a hongtung diam chi’n ngaklah takin i om na uah tuate’n hun sawt lua bang a ngaihtuahna a honpe theizel hi.

Himahleh hinkhua ah haksatnate leh gentheihnate tuak mahlehang kipahna hong om chiang lungmuantakin i om thei ding uhi.  “…Chihtaktak in, chihtaktak in, k’on hilh ahi, na khitui uh a ke ding a, na kap huphup ding uh, khovel bel a kipak ding; na lungkham ding ua, himahleh na lungkham uh kipahna a suak ding hi.” – v20.  Hiai a kipahna Jesu’n a gen toh aki theihsiam semna na ding in hi chi’n hon gen sawnsawn lai hi, “….Numei nau nei ding in a veilai in a lungkham nak hi, a hun a tuntak ziak in; himahleh nau a suahtakin a lunggimna a thei nawnta kei hi, khovel a naungek mel hongpian a a kipah ziak in.” – v21. Nupi tamtak te’n nauneih a haksatna a thei mahmah ta ding ua, nupi hinailou leh pasal te natan inleng a haksa asak dan uh i theihpih uhi. Himahleh hiai bang a haksa tak a nau hong neihtheihna ding ua a thuak gim bang un mihingte hinkhua ah haksatna tampi i thuak hun uh a om lou theilou ahi gige hi. A tawpna a bang a i muhtheih om i chihleh kipahna in a hon zui ding hi, hiai mah tuh hi chi’n i mu hi, “….himahleh nau a suahtakin a lunggimna a thei nawnta kei hi, khovel a naungek mel hongpian a a kipah ziak in.” Hiai a i theih ding ua poimoh hong om nawn tuh, huai hun a Nungzuite tuh tua numei nau nei ding bang ahi uhi. Jesu nung a zuihna ua haksatna a maituahte utuh ataktak mah ahihdan phawk semsem thak ni. Tua bang teng tuak mahle uh atawpna a i muh tuh, “….Toupa a muhtak un nungzuite a kipak uhi. “ – Johan 20:20b. A dang theih dia hoih nawn mahmah tuh Laisiangthou a Thukhun Thak a akigen bang in i Hondampa Jesu hongpianna in a gentuh, “…misi lak a kipan a piang masapen (first) ahi.” Kolosate 1:18b chih ahi.

Eite leng tu in hiai khovel a gimthuaknate nei toutou mahlehang denchiang a kipahna ding a beitheilou tangtawn tangtawn a nei ding i hi uh chih mangngilh keini. Lungke lou in Toupa hoihnate muh ki lam-en in haksatna leh buaina i tuahte uh ginom takin thuak tou leng den chiang a tuate kipahna bukim hon petu hong hi ding hi.  I niteng hunzatna te ua Jesu’n thohnawnna thute ngaihtuah a tuate phawk tawntung hilehang tuate’n lametna tungtawn in kipahna leh lungkimna thuguk a honpia semsem lai ding hi.  “Tulai a thuaknate denchiang a i tung a thupina hihlat a om ding toh tehpih tham in ka sep kei hi.” – Romte 8:18. I thuak gimnate uh mangngilh ding chih hilou in tuate tungtawn a kikhekna, lungmuanna leh kipahna mittui te hong luang zaw ding in gintakna kei mimal takin kanei hi.

I thukhitna ding i Hondampa Jesu’n hon sinsak bang in Sawtlouchik hiai leitung a khosa lel ding i hih dan uh phawk thakthak ni. Haksatnate tuak in tuate thuak tham mahni himahleh a poimoh penpen zaw tuate i maituah lai in i Kha Toupa toh ki tuak ding in a kiman taktak na diam chih a hong hita hi. Sihna in zohna neilou ahihziakin mitengteng tung a hongtung ahi a, Toupa mai a kaithoh a i om chiang in bang chi’n vaihawm sak in i om dia chih kingaihtuah ding a poimoh penpen hi.

“….Ka gimthuakna neukha uh tu mitphiatkal sung kia a om ding in, thupina thupitak tangtawn a ding in a hon bawlsak hulhul ahi” – 1 Kor. 4:17. Tua bang thupina thupitak tangtawn a ding a bawl sak a i omna pen phawk tawntung in i niteng hinkhua te Toupa toh ton in kalsuan ding in kisa khe chiat ni. A tawp pen in, “….Thil muhtheihte enlou in, thil muhtheihlouhte ka en zaw uhi; thil muhtheihte zaw sawtlou kal a ding ahi a, thil muhtheihlouhte bel tangtawn a ding ahizaw hi.” – 1 Kor. 4:18. Hiai leitung thupina, lalna leh thuneihnate sang muhtheihtheihlouh tangtawn thilte en in Toupa ading in i niteng hinkhua uh manpha sem a zang ding in kisa chiat ni hang. Toupa’n hon vualzawl chiat hen!

Toupa Pathian in a thute i sim khiatte uh tungawn in hon vualzawl in hon ompih semsem hen! Amen!

Theihna bukim louh ziak a i  gelh khelh omte i Toupa ngaihdamna i ngen hi. Bangkim Aman thupina tengteng tang hen!

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing) 21st September, 2022 | Weekly-Inspiration – 110)

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published. Required fields are marked *

Book Appointment