“Himahleh a thuchiam bang in van thak leh lei thak, a sung a diktatna omte i lamen hi.” – 2 Peter 3:13.
Naupang chik hih a pa’n Sunday skul ana ki kai tou a, tuate tungtawn in vangam nop didan bang leh a thupi dingdan khong kana suangtuah sek hi. Tangtawn hinna kichi pen sih chiang a vangam aki kai leh huai hun a kipa’n a ki panpan ding in kana ngaihtuah hi. Himahleh tua bang dan ana hikei a, Jesu’n a sihma a anungzui te adia a thum sakna thu in neulai apat ka ngaihtuah dante adik zaw in hon heisak hi. Huai thu tuh, “Hiai tangtawn hinna ahi, Nang Pathian tak kia leh na sawl Jesu Khrist theih. Nang thilhih ding n’on piakte ka hihkhinta a, khovel ah k’on pahtawita hi.” – Johan 17:3-4. Hiai a Jesu thumna kammal sim thak leng i theihbeh ding uleh i theih thakthak ding uh a om hi. Bangkim hihthei Pathian leh Jesu Khris theihna tuh tangtawn hinna kipatna ana hi zaw hi. Jesu Khris gingta a, Amah eite a dia hong sihna gum a; Amah deihna bang a om ding a i kipiak khiat hun apa’n ei ah tangtawn hinna kipan hi zaw ahih dan ka theisiam thakthak hi.
Bangziak a leitung hichituk a haksatna mun leh natna chi teng omna mun a tangtawn hinna om thei mawk ding adiam aw chih dotna toh mahni mimal in kon buai tou nawn ta hi. Jesu neite a ding in niteng in kipahna ding, Toupa thupi na muh ding a om den hi. Hiai mah tuh tangtawn hinna i neihna ua pan a Toupa om pihna i muhtheih uh ahong hipah hi. Johan bung 21na a i muh mah bang un, Jesu misi lak a kipan a thohnawn nung a anungzuite kiang a a kilakna thu te in hiai leitung a tangtawn hinna toh kisai theihsiam semna a hon pia hi. Jesu a sihnung in a nungzuite mi bangzah hiam nga beng ding in long ah a om ua, Jesu tuh amau te kiang ah ava kilak hi. Hiai zan in nungzuite’n nga khat mah leng aman kei uh a Jesu sawlna bang in a long sik taklam a apaih uleh nga tampi aman uh chih i mu hi. Hiai zoh in nungzuite’n Toupa ahihlam athei pah uhi. Hiai a Jesu’n Peter dotna abawl in ka ngaihtuahna hon sukha mahmah hi. Tuate i sim ding:
“Huan zingan a nekkhit un, Simon Peter kiang ah Jesu’n, “Simon, Johan tapa, nang hiaite sang in kei n’on itzaw hia?” a chi hi. Aman a kiang ah, “He, Toupa, k’on it chih na thei hi” a chi hi. Aman a kiang ah, “Ka belamnoute vak in” a chi hi. Huan a nihveina ding in a kiang ah, “Simon, Johan tapa, nang kei n’on it hia?” a chi nawn hi. Aman a kiang ah, “He, Toupa, k’on it chih na thei hi” a chi nawn hi. Aman a kiang ah, “Ka belamte ching in,” a chi hi. Huan a thumveina din a kiang ah, “Simon, Johan tapa, nang kei n’on it hia?” a chi hi. Huan thumveina a nang kei n’on it hia? A kiang a a chih ziak in Peter a lungkham a, a kiang ah, “Toupa, bangkim na thei a, k’on it chih na thei hi,” a chi hi. Jesu’n a kiang ah, “Ka belamte vak in.” – Johan 21:15-17.
Jesu’n Peter a dotna in kei ah dotna tampi tak ahon pia hi. Hiai a Jesu dotna tuh Peter ading vuak hilou in eite ading mahmah a dotna ahi chih i pom theih uh apoimoh mahmah hi. Jesu sang a i it zawk ding uh leitung ah bangbang a om a chih tuh kei mimal kidotna masa a hong hih in haksa kasa mahmah hi; Amah sang a ka it zawk ding, ka utna in a honpi na atam mahmah mai hi. Gen ding leng theilou a om in ka kingaihtuah dedu a, ka hihnate kaki mu a gen ding khatmah leng kanei thei kei hi, a tawp in thumnate nei in ka kilan khethak hi. Tua hun aki pan in khovel thilte sang a Amah itpen a neih ding ahih dan ka hong kisin toutou theita hi. Peter dinmun a kakikoih chiang in Jesu dotna toh kisai athumveina tan ah zaw khituite pawt lou theilou ding in kaki ngaihtuah hi. Bangziak in, lungtang tawng hon sukha ahihziakin lungkhamna leh khasiatna toh om ding kahi chih ka kithei a hiai in hon nehnou sak mahmah in Toupa itna, Amah ngaih semsemna kei ah hon tun in kakipak mahmah mai hi.
Toupa ka itna tan lel a hunsak a gingtu khat, Toupa nungzui ka hi kichi ding ka diam chih dotna dang ka hon nei nawn hi. Toupa it kahi i kichihleh i mohpuakna uh a om a tua tuh Amah belamte vak a, ching tu a pang ding chih ahong hi nawn hi. Laisiangthou ah Belam kichi in gentehna tampi anei a, mun bangzah hiam tak ah leng i muthei hi. Hiai a Jesu’n Peter kiang a ka Belamte vak in a chihleng i mihingpihte genna ahi chileng i gen khial kei ding hi. Kei mimal ah ka kingaihtuah a tua bang a belamte vak thei ding in kei kua ka hia, bang hilel ka hiam chi in chinglou kisakna hong tam mahmah mai hi. Ka dinmun ka ki-en zel a, kei zaw hilou ka hi kichih hun aom zel hi. Ut in ut keilengle tuailai heutu khat a ding ing ah, ka tuailaipihte bang chi bang in ka pi a, amaute Toupa lam ah bang chi’n ka makaih theidia chih toh kisitna lian tak kei ah a hong suak sek hi. Himahleh Toupa’ a kinga a Amah a alametna uh nga te ading in thilhaksa lua omlou ahihdan Laisiangthou apa’n mahmah inleng i mu a tuate’n hon khamuan tuan lua hi. Sawltak Paul in Khris itna in hon sawl teitei ahi (2 Kor. 5:14) achih mah bang in Toupa it a Amah nei (taktak) te a ding in zaw midangte awlmohna neihlouh ding thil hitheilou ahong suak hi. Hiai thute ka gelh lai in ‘Zou’ te laa ‘Aw Itnan Eisawl Ahi’ chihla bang hong suak mahmah hi. Tangtawn hinna nei a i omlai un i niteng hun zatnate uah midangte a ding in khaatna tuntu i hia ahihkeileh kipahna tuntu, Toupa thupina lang khesak tu leh Amaute Toupa lam a pitu hi theite i hi uhia chihte ki ngaihsut na ding ahong hi nawn hi. Vangam tung chiang a tangtawn hinna, kipahna leh nopsaknate kipan ding hilou in hiai leitung a i omlai ua tuate chep theihna, Toupa ompihna toh midangte toh kal aleng ki itna kitheihsiamna om thei ahi chih i theih siam thakthak uh a deih huai hi. I Toupa Jesu ei a hong om chiang in leitung a i omna san uh a manphatdan i theichian semsem ding uh a; mahni utnate leh mahni adia hin ut nate i tawpsan thei ding ua, Toupa toh niteng hinkhua i zang toutou thei ding uhi. (Galatiate 2:20).
Mihingte i damsung uh hun tomchik himahleh Toupa’n tua hunte a sep ding in mohpuakna lianpi honpia hi. Tua mohpuakna tuh namchih apan Toupa nungzui ding bawl ding, Pa, Tapa, leh Kha Siangthou min a baptist ding leh Tanchinhoih thute hilh a tuate zui ding a thuhilh tu hiding in a hon deih hi. (Matthai 28:18-20). Khristian inkuan sung a khanglian himahleng khatveivei midangte kiang a ka ginna hiai ahi chi a gen ding thil haksa pi hong hih hun hong om zel hi. A diak in ginglou mite lak a kei hiaite kahi chi a va ki gen ding pen amau adia simmohna, hon koihtuamna uleh hon douna uh ahih khak ding kalauh hun om thei zel hi. Himahleh i Toupa Jesu’n Khamuanpa hon pe ding kahi achih in hangsanna hon pia a, Khasiangthou ompihna toh genkhiat theihna hon pe zel hi. “Huan Pa ka ngen dia, aman Khamuanpa dang a honpe ding, tangtawn a na kiang ua om ding in;” “Khamuanpa, Kha Siangthou, Pa in ka min a honsawl ding in bangkim nou a hon sinsak ding a, na kiang ua ka gen tengteng nou a hon thei khesak nawn ding hi” – Johan 14:16;26. Hiai tuh gingtute adia i vualzohna uh thupi mahmah leh i hamphatna mahmah uleng ahi. Himahleh i chi ding a, gingtu hinkhua taktak zaw nop hun om tham mahleh tua pen amasa ding leh ahiden ding ahi zenzen kei hi. Thumna te khong i neih chiang un nopsakna ding, melma om louhna ding in i thum kha zel uh a; tuate asia ahi chikei mahlehang tuate sang in melmate dou zou ding a hatna ngen in, haksatnate mualsuah ding leh tuate tung a Pathian thupi leh ahoihna a hong kilatna a hihna ding in thum zaw leng zaw i niteng hunzat dante uhleng hong dik zaw ding in ka ngaihtuah hi. Matthai 16:24 na a i muh bang in i Toupa nung i zuihnop taktak uleh mahni hihnate i kimangngilh uh apoimoh hi.
Ei tungtawn a midang te’n Toupa hoihna amuh ua, Toupa lam anaih semna uh i hih ding uh gingtu te ading a poimoh mahmah nawn hi. Toupa’n tangtawn hinna honpiak bang in tua taksa a hinna leh damna hon piakte bang ding in i zang ua chih kidotna poimoh tak ahong suak hi. Amos 8:11 “Toupa Pathian in, Ngai dih ua, nite a hongtung lellel; huai ni chiang in gam ah kial ka sawl ding a, an kialna hilou in, tui a kialna hi sam lou in, Toupa thu theihna kialna pen a chi hi.” Khovel paidan i et chiang un hoih lam sang in siatna hong tam huaihuai lai ding hi. Hiai te’n Toupa thu theihna hon dai sak semsem lai ding a, ei gingtute lak mahmah ahleng Toupa phawk zoh louhna hon tung semsem lai ding hi. Hiai bang dinmun tua le phu tou lellel ta i hihziak un i hinna uh amanphatnate thei in, hun tomchik i neihte uh Toupa a ding bang chi’n i zang thei ding ua, midangte bang chi’n i makaih thei ding ua chih tukal i Weekly Inspiration uh tungtawn a i kidotna uh hileh chih i ki deihsak pen ahi. “Huaiziak in ka unau deihtakte aw, kiptak in, hihlin vuallouh in, Toupa nasep phatuamngaitak a sem gige in om un, na sepgimna uh Toupa ah a thawn ngeikei chih na thei uhi.” – 1 Kor. 15:58.
Toupa’n a thu hon piakte tungtawn in a sim peuhmah theihsiamna hon piak i ngen a. Theihsiamnate bukim zoulou ahihziakin genkhelh khak, lak khelh khak omte Toupa ngaihdamna i ngen lailai ahi.
Toupa’n thupina tengteng tangta hen!
- Thangginom Hanghsing
(Laigelh toh kisai kupbeh nuam omleh, Laigelhtu +919615804759 ah thuzaak theih diing)
11th May, 2022 | Weekly-Inspiration – 98