Laisiangthou sim a manphat dan leh gingtute adia alou theilou ahihdan i theihchiat sa uh ahi a, tua bang a hihlai in a poimoh mahmah tuh Laisiangthou thu i theih a i sim khiat te’n i hihna, i om dante hon kitheichian sakin i hihnate hon ki musak zel hia chih ahi. Tam tak te’n Laisiangthou i sim tham uh a kipahhuailua hi, himahleh tua i sim khiat te’n ei a bang nasep a hon nei a chih ki-et zel hong poimoh mahmah hi. I hihnate, i omdante hon ki mukhe sak tuanlou ahihleh i Laisiangthou sim dan leh i hun piak dante uh kivel thak hong poimoh mahmah ding hi. Midangte Pathian deihna bang a i pii theihna ding in eilam ah leng i mohpuakna uh hong lian mahmah hi. Pathian deihdan a mi tengteng bukim a hoih den di i hi zenzen kei uh hi, hihlamdang a ki om nailou ahihziakin; himahleh khelh khakna te hia, Pathian deihlouh dan a om khaknate hong om khak hun in bang chi’n pan i la a chih gingtu diktak a ding in ngaihtuah tham a ching hi. Tuate tunia genvek manlou di i hih ziakin midangte Toupa angsung a i pi theihna ding in Toupa deihdan a khosakna leh ei mahmah tuate toh hinkhiatna hong poimoh masa penpen hi.
Laisiangthou thu i simte’n i hihnate hon kimuhsak bang in i mihing pihte Pathian deihdan leh Laisiangthou thute pansan a tai hilh ngamna, tuate hoih lou ahi chih theih ngamna a poimoh mahmah hi. Pathian a ding in thilnih kia a om hi, tuate tuh ahoih leh hoihlou, dik leh diklou chihte ahi. Hiai te kikal a bangmah a om thei himhim kei a, ahoihlam lah zui sim, lah va hoihlou zel chihte a om theikei himhim ahi. “Thutak Suahtakna Ahi” chih Johan 8 na a i muh mah bang in, thutak a om leh thutak lou leng om ahi chih a chiang huntawk hi.
“…..Ka thu a na om gige uleh, ka nungzuite na hi taktak ding uhi. Huan thutak na thei ding ua, thutak in a hon suaktasak ding” a chi hi. – Johan 8:31b-32. I Hondampa Jesu mahmah inleng hichi’n ana gen hi, “…Kuapeuh kei lam a panglou, hondou ahi; kuapeuh hon lakkhawm pihlou in a thehzak ahi.” – Matthai 12:30. Toupa deihdan a khosa lou a, Amah lam zuilou mituh Toupa dou ahi a; Amah lam a panglou chihna hong hipah hi. Tuni’n hiai bang thupukna nih a bang pen i teel zaw a chih kingaihtuah pen in nei masa leng i deih hi. “Hun kipahhuai ah k’on ngaikhia a, hotdamna ni ah k’on panpih” a chi ngal a. Ngai un, tu hun kipahuai ahi a; ngai un, tu hotdamna ni ahi!” – 2 Kor. 6:2. Zingchiang a bang hongtung ding hiam chih kuaman i theikei hi, tu a hunlai in Toupa deihdan a om a, Amah adia khosa ding in kisa thak leng i kingen hi.
Ei lam Saptuam sung mahmah ahleng enleng, kikhentuam theihna khatveivei hong om theizel hi. Hun tam zaw te ah ngaihdan kibat louh ziak ahi chisek mahlehang adikdik in Pathian deihdan sang in thildang deihdan leh hoihsak dan chituam i neih zawk ziak uh ahisek hi. Sawltak te hunlai inleng hiai mah tuh ana buaipih uhi, “….A masapen in saptuamte na kikhop un, nalak uah kilangkhenna a om chih ka za a; gin leng ka gingta sim hi.” – 1 Kor. 11:18. Himahleh hiai bang a kilang khenna om theihpen a hoih lam ana hizel hi, bangziak in? Sawltak Paul in a dawngna a pia hi, “….Nalak ua a taktakte a lattheihna ding un, nalak ua gintuamna leng a omsam ding him ahi.” – 1 Kor. 11:19. Hiai tungtawn apa’n zillai leh tunia i thupi uh tungtawn a i laktheih chu, hichibang a gintuamna anei kha, ngaihdan hoihlou ana nei khate Thudik Laisiangthou sinsakna mah pansan a i taihilh ngam uh a poimoh mahmah hi.
I Mihing pihte i lau hia ahihkeileh Pathian i lau zaw hia chihte tuh i gamtat dante ua pan in a theihtheih zel hi. Midangte kiang a Tanchinhoih genkhe ngamlou hiam, ahihkeileh amaute hoihna ding a a hoihlouhnate uh genkhe ngamlou i hih khak ding lauh huai mahmah hi. Hiai mahmah chu keimimal takin leng haksa kasak pente lak a khat hong hi mahmah mai hi. Midangte Toupa angsung a pi lut ding hina pi, Pathian deihdan A thute va hilh ding chih pen haksa pi hong suak hi; i ki ngaihtuah chiang in hiai bang a haksa sakna pen Pathian kihtakna ziak hizaw lou in i mihinpihte, tua nu, tua pa hiam i lauh a, i zahtakna ziak ahisek hi. Jesu’n namchih apan nungzuite bawl unla (Matthai 28:19) chi a hon vaikhak pen i zuih ngam a, A Tanchinhoihte puangzak ngam uh a, midangte i hilh sawn theih uh a poimoh hi. Tunia i thilmuh te zingchiang a kimukik theilou a, zingchiang a bang hongtung ding hiam chih leng bangmah i theikei lai hi. Tua bang ahihlai in Laisiangthou sinsakna bang a midangte a hun omlai a i sinsak ua, i tai hilh ngam uh a poimoh hi.
A poi mahmah bel gingtu khat hi ngal a Khamanthangte awlmohna neilou, veina himhim neilou hih ding ahi. Huchibang a om kha i hihleh thumnate hoihtak a nei a Khamanthangte awlmohna, veina Pathian kiang a i nget a poimoh hi. Toupa’n tua bangte pikhe tu ding leh amaute lamdik a pitu ding a nang leh kei hon zang thei gige ahi chih phawk thak ni. Zawlnei Isai bang a Toupa kei hon sawl in chih theih apoimoh hi. “…Huan, ‘Kua ka sawl dia, kou adia kua kuan ding ahia?’ chi in, Toupa aw ka za hi. 9Huchi in, ken, “Kei hiai ah ka om, honsawl ve” ka chi hi. – Isai 6:8-9.
Taihilhna kichi tuh tai a om pen a ding in thilnuam loupi, haksa la hi, heh huai sim la hi, banah a taitu’ ading a leng kisuang huaina di lian mahmah a om hi. Himahleh i Laisiangthou ah hiai bang in i muthei nawn hi, “…Lawm hon liamsaknate a ginom ahi a: himahleh melma hon tawpna zekhemna ahi.” – Paunakte 27:6. Eimah hoihna ding a thudik hon kigente, hon kitaihilhna thute tuh liamtakna mah, na mah ahihdan a chian huntawk hi. Nopsaknate hiam eimah utna diklou a i na om khak nate tawp ngaita ahihziakin Laisiangthou deihna bang a ki taihilhnate tuh haksa kisa ding mah hi. “…Mi diktat in honsat hen, migitna ahi ding; hon taihilh hen; thau manpha ahi ding a, Mi gilou salou in ka lutang thaunilh ngeikei hen, a nasep giloute hua in ka thum gige hi.”– Sam 141:5. Hiai a akigente taksa natna hipah vek lou in, tua i gente kitaihilhnate leh ki bawl hoihna ding a haksatna i phut te ahi hi.
Tuni’n nang leh kei bang pen ah i ding a chih ki-en pha thak leng i deih hi. Midangte lauhna ziak a Tanchinhoihte puangzak ngamlou i hi hiam, ahihkeileh mite maipha etna ziak a amaute thuhilh ngamlou I hi hia chihte kivel thak ni. Gimthuaknate leh haksatnate tuah ding ngamlou maw, ahihkeileh tuate pumpelh sawm gige i hileh bel, ei ah Tanchinhoih gending tawm mahmah hong hi ding a, khelhna toh khosasa leng i hikha theilai hi. Hun in kuamah ngaklou a, tu hun mahmah inleng tamtak te’n sihna hon zotsan uhi. Tuni in Toupa deihna bang a, A thu te midangte kiang a hilh sawn theiding leh midangte Thudik Laisiangthou sinsakna bang a hilh khe ngam ding in kisa chiat ni.
“Ahi, nang hon ngakte kuamah zahlak in a omkei ding uh.” – Sam 25:3a. Amen!
Theihna bukim louh ziak a i gelh khelh omte i Toupa ngaihdamna i ngen hi. Bangkim Aman thupina tengteng tang hen!
- Thangginom Hangshing
(Laigelh toh kisai kupbeh nuam omleh, Laigelhtu +919615804759 ah thuzaak theih diing) 5th October 2022| Weekly-Inspiration – 111)