THUMNA HINKHUA

0

Gingtute a ding a hunteng a poimoh gige tuh thumna hinkhua zatna ahi. Thum tamlou mi leh thum gige mite khosakna leh omdan ah ki lamdangna mit a muh theih ding leng a om hi. Laisiangthou Thukhunthak hoihtak a i sut leh Thumna Hinkhua toh kisai Jesu hon sinsakna leh Amah apat thumna a poimoh dan chiang takin a muh theih hi. Jesu thumnate apat a thupi mahmah, lungkoih leh lamdang kasak tuh Gethsemani huan a athumna ahi, “… Ka Pa aw, a hih theihleh hiai nou in honpel mahmah hen; himahleh keimah thu hilou in, nangmah thuthu hizaw hen” chi in, a thum hi. (Matthai 26:36-42). Bangkim Pathian a dia hithei ahihdan theilou ahi kei a; Amah mah leng Pa toh kikim ahi lai hi. Hiai bang hun a thumna thuk tak a ngaihtuahna pelai hileng hun haksa tak mai ahi. Mihingte khelhna ziak in eite thuak zohvual louh ding bawl siatna, gawtna a hong tuah ding a kipatna na zan ahi. Hiai bang hun haksa a tuah dingte pelh theih hileh chi’n a thum a himahleh Pathian thuthu hizaw ding in a thum zaw hi. Hiai a Jesu thumna tungtawn kia inleng ngaihtuahna tampi a piang thei hi. I niteng hunzatna uah michih in haksatna leh buaina i phut khak uh a om thei zel hi. Himahleh huntam zaw a i thumnate utuh hiai haksatnate pelh theihna ding, tuate tuahlouh theihna ding ahi sek hi. I Hondampa Jesu bang a haksatna i tuah ding uh om hun in i ut bang uh thumna tungtawn in i genthei uh a himahleh a tawpna ah eimah deihdan hi zaw lou a Toupa aw Nang thuthu hi zaw hen chih theih a poimoh mahmah hi.

Leitung a i omna san uh theichian semsem hileng nopsa den ding hiam, nuamtak a khosa a deih teng nei ding, utna teng a hoh thei ding leh lungkim tak a om gige ding chih ana hi zenzen keihi. Hiai bang thilte zaw khovel dan ahi zaw a, khovel in a buaipih det ahi zaw hi. Gingtute hinkhua taktak ding ngaihtuah detdet hileng haksatna tuah hun hong om ding mah ahi a, tua bang hunte ah Toupa toh ton in lungkim takin tuate i mualsuah thei ding uhi. Thumna Hinkhua a apoimoh mahmah tuh Toupa Nang deih bangbang hong hi hen chi a i nget kawmkawm un leitung a khosa lai i hi uh a, buaina haksatnate tuah lou theilou ding i hih ziak un tuate Amah toh ton a mualsuah theihna’ng, thuakzohna leh hangsan tak a tuate zouzou ding a i thum uh apoimoh mahmah hi.

Gingtute a ding in hangsan tak athumna neihtheih apoimoh nawn mahmah hi. Himahleh hiai hangsan tak a thumna neihtheihna kichi eimah hatna ziak hiam a i zoh theih uh leng ana hi zenzen kei zel hi. Thumna Hinkhua hangsan tak a i neihtheihna ding un Bangkim a Toupa a kingak a poimoh masa penpen hi. Pathian a kinga lou leh Amah deihdan a omlou pi a thumna nei zou gige om ding in a gingtak huai mahmah kei hi. A ziak bel, Pathian neilou mite’n leitung nopsaknate mah ngaina uh a tuate’n thumna chihte apoimoh danleng theilou in hinkhua ut leh dah in a mang zaw uhi. Thumna Hinkhua zang mite zaw tua bang hilou in bangkim a Pathian amasa a koihte, Amah a muangte leh Amah a lametna nga mite ahi zaw uhi. Tua bang mite’n hunteng a Toupa apoimoh dan thei uh a, Amah lou a hinkhua zat ding pen thil hitheilou ahihdan a thei chian mahmah uhi. Ei bang dinmun ah i om a? Thumna i neihdante ngaihtuah kik thak hileng bang ding a thumna nei i hia ahihkeileh neih ding ahihziak a nei lel i hi hiam chihte ki etna ding a poimoh mahmah a hong hi nawn hi. Tamtak te’n i theih chiatsa uh bangin Thumna i chih Toupa toh i ki hou theihna uh ahi a himahleh i thum chiang un bangteng i gen un lungsim taktak toh i thum uhia chi ki dot a poimoh hi. Lunglut loupi a thum khak abaihlam a tuate tuh luphun bang ahihkeileh annek hun bang ahi thei hi. Hiai hunte gel ah lungsim taktak hi zaw lou in niteng a thumna a i gen sek te uh aki bangmah gen in zoh abaihlam mahmah hi. Tuate asia ahi i chipah kei a himahleh lungsim taktak toh i thum ding tuh apoimoh pen ahi zaw hi. Thumnate a i gente uh aki bat hun om thei tham mah ahi chih leng pom siam thakthak leng i ut hi, adiak in annek hun bang, lup hun chihte ah thumna paidan aki bang tanpi hi. Himahleh i gen ut pen tuh tua bang te ahihtak lehleng lungsim taktak leh kihong tak toh i gen uh a i thum ding uh a poimoh penpen ahi zaw hi.

Laisiangthou mun bangzah hiam thumna hinkhua toh kisai a athum tute’ hangsannate leh Pathian a amuanna uh athupi dan i muhtheih omte i sim ding.

“…K’on sap ni’n nang n’on dawng a, ka hinna na hatna in n’on hihhat hi.” – Sam 138:3. Hiai tuh David thumna la ahi a, hiai a athumna ngaihtuah detdet leng a thumnate tungtawn a Pathian in a dawngna, hatna a piakdan hon genlang hi. Eite’n leng Kumpi David bang in i thumnate dawng a om ahi; thumnate tungtawn in Toupa’n hon hihhat ahi chithei ding in i thumnate uah i chitak zou uh hia chi ki dot tuak mahmah hi.

“…Huan a thum khit un a omkhawmna uh a hongling a, avek un Kha Siangthou in a dim ua, hangsantak in Pathian thu a hilhta uhi.” – Nasepte 4:31. Hiai tuh Nungzuite’n thumna tungtawn a hangsanna a nget uh dawnna ahih dan chiangtak in Nasepte sung ah i mu nawn hi.

I thum chiang unleng i thumnate uh dawng a om ding ahi chi a gingtatak a i thum ding uh apoimoh nawn mahmah hi.”… Huaiziak in k’on hilh ahi, bangkim thum a na nget peuhmah uh musa in kiging unla huchi in na mu ding uhi.” – Mark 11:24. Hiai bang a thumna a gingtakna pen Pathian in hon dawng teitei dia phut luih i hi uh chihna ahi kei a, a i ngette uleng a dawnna hon musak teitei ding ahi chihna ahi sam kei hi. Ginna toh thumna kichi tuh Pathian hon deihdan, Amah a i muanna uh nga i hih dan uh a chetna leng hong hi a, I thumnate uh a dawnna bel Amah thuthu leh Amah i Pathian deihdan hong hi zaw hi.

Bang chi bang thumna hinkhua zang i hi hiam chih hiai i thugelh tungtawn ua pat i ki et kawmkawm un, hangsantak in Toupa kiang naih in thumna hinkhua zang gige ding in kisa ni. Bangpeuh Toupa deihlam bang a i nget uleh Aman a hon ngaihkhiak sak ding ahi chih mangngilh lou in hangsantakin Amah kiang thumni.

“…‍Hiai pen amah tung a i hangsanna ahi, bangpeuh amah deihlam bang a i nget leh aman a hon ngaihkhiak sak hi. Huchi in bangpeuh i nget a hon ngaihkhiak sak chih i thei leh a kiang a i thilnget i muta chih i thei hi.” – 1 Johan 5:14.-15.

A tawppen in hiai leitung a i khosak lai unleng thil thupi taktak muding leh tua bang mite hiding inleng i Toupa’n a hon deih hi. Tua ahihziakin i thumnate uh leng liansak ni hang, thum tam ni hang, ngen tamni hang. I Toupa a ding a thil hitheilou omlou ahihdan phawk sem thakthak in Thumna Hinkhua zang mite hichiat ding in panla thak chiat ni.

“Huan eimah a semzel thilhihtheihna bang in, i nget leh i ngaihtuah tengteng sang a thupi zawtham hihtheipa kiang ngei ah, Tangtawn in suan tengteng tan in, saptuamte leh Khrist Jesu ah thupina om hen, Amen.” – Ephesate 3:20-21.

Toupa’n simtute hon vualzawl hen! Khalam a masawn semsem thei ding; A nuam ahaksa a Amah toh tonkhawm thei gige mite hi ding in simtute Toupa’n hon ompih chiat hen! Theihna bukim louh ziak a i  gen khelh omte Toupa ngaihdamna i ngen hi.

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing) 27th July, 2022 | Weekly-Inspiration – 105

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published.

Book Appointment