THUMNA NEIH LEH LAISIANGTHOU SIM KA THADAH CHIANG’N

Hiai ni chu ni sawt tak mai hong hi a, nasepnate gim mahmah in inn lum dam takin ka tung hi. Kihah zou in inn nna hih ding omte hih in ka om a, tuate ka hon zoh in Laisiangthou ka sim lai diam chih lungsim ah suangtuahna lian tak kanei hi. Laisiangthou sim ding chih hong hih chiang in thadahna leh ngaplou kisakna ka hon nei a, himahleh lupna leh tutna te khong a om in mobile khong ka enen ngap zel hi. Zan hong sawt huaihuai in, ‘Ah’ tuni zaw chi’n kei leh kei kihou bang mai in ka hong lumta hi. Ihmut hong suak mahmah ta ahihziakin thumna bang leng a tom theipen in kanei lai hi. Ka thumna dawngtaak ding mah a diam chih tan leng ngaihtuah zou lou in zoh pah ut in a tom lamlam in kanei lai hi. Hiai tuh nikhat hun kazat dan hong suak hi.

A ni nawn hong hi a, sep leh bawl ding te mah ka hon sep chiang in hiai bang a thadahna in hon zou nawn mahmah hi. Tua bang a ka om lai in lungsim ah hiai bang ngaihtuahna hong suak hi, phone te khong a apoimoh lou pi a hun tampi ka piak ut leh bangziak a Laisiangthou sim ding hichitel a lin ka diam aw chih toh lungsim noplouhna toh kidim in kong om ta hi. A dikdik in zaw Pathian ngaihna sang in khovel thule la te ka ngaina zaw chihna ahi lel hi. Thumna lunglut tak a ka neihtheihlouh a, zoh pah ka ut na in Toupa toh kinaihna hon gamla sak deuhdeuh ahi chih ka hon thei chian hi. Hiai bang a omna pen gingtu khat ading in zum huai pi a hong hi a; mulkim huai leh chizau huai pi a hong suak hi. Pathian a lametna leh Amah nei mi kichichi mahleng hichibang a hun zatna te’n Amah toh hon kigam lasak ahi chih hon muchian deuhdeuh sak hi.

Hiai bang a mah ni om dan kitheihna te’n kisikna hon tung a, Toupa lam a kiheina, a thute sim utna leh kibawl phatna hon tung hi. Himahleh khemna leh muhtheihlouh melma nasepna hat lua ahihziakin bahtheihna ding, thadahna dingte ah hon kaikik ut mahmah zel hi. Toupa thu leh la te ah i ki dimlouh chiang un khovel thupi na te’n hon hip mahmah in tuate a va lut khak abaihlam mahmah hi. Hiai te a i va lut khak chiang un Laisiangthou sim thadahna leng hi nawn lou in, a sim ding himhim leng dong nawn lou in mangngilh a nei in i om zaw lai uhi. Hichi bang a i om hun utuh thil poi mahmah a hong hi a, Toupa lam a i ki hei uh hun mahmah ahi chih i theihsiam uh a poimoh hi. Tulai hun in mi tamtakte’n i gingtak theihlouh uh Toupa houpihna aw za a theihtheihna chih ahi. Piangthak diktak leh Pathian ta taktak khat a ding in Toupa hon ompihna theihtheihna ding lam chituamtuam ah amuhtheih hi. Bang hiam hih khelh thupi tak va hih sese keimahlehang, thil bang hiam Pathian deihlouh ding i hih khak hun un kimohsakna ding (conviction) leh lungsim noplouhna a om sek hi. Toupa deihdan a gamta lou i hihziak un lungnop louhna ding a om zel hi; hiai bang a nopsak louhna i neih zel pen un Pathian ta i hihna uh hon lang sak hi. Hiai bang a lungsim hon nuamlou sak om i chih pen Khasiangthou in hon om pihna ziak ahi chih i theihsiam uh apoimoh mahmah hi. Hiai tuh Toupa hon ompihna, a aw i zakna uh ahi a chih theih hi. A dahhuai leh lungkham huai bel hiai bang a lungsim nei hinapi, hiai zaw diklou leh hoih lou ding ahi chih thei gegu, lungsim nuamlou pi a om ngal a lah va sem teitei, va hih teitei, va pai teitei i chih pen Toupa ompihna i nawlkhinna uh hong hi a; tua te’n Toupa toh i kipolh ding bang a hon kipawl sak lou in tua sang in Amah deihlouh lam a om na hon tung toutou hi.  A pilvang huai nawn ding a i deih mahmah nawn tuh mahni hihna kithei lua, khial leh diklou kahi chih kihah theihlua in Toupa’n leng hon ngaidam zoulou ding; Amah ngaihdamna tangtak zou nawn lou kahi kichih theihna ahi. Hiai bang lungphut neihna pen melma Setan nasepna ahi chi thei thakthak in tuate douzou ding in Toupa lam ah kihei teitei leng zohsa ahi chih i theih uh apoimoh hi. Melma pa hon khemtu lel hilou in, i Kha tangtawn hinna apat sihna hon tut theihna ding lampi hon gel saksak ahi chih theisiam leng i ut hi. Sawltak Paul in hiai bang in ana chi hi, “….Himahleh nou n’on ze-etna ua leh mihing ngaihtuahna in n’on ze-etna uh kei ading in thil neuchik ahi. Keimah leng ka ki ze-et ngei tuankei. Bangmah kimawhsakna ding ka kithei kei a; himahleh huai in siam hon tangsak tuankei hi; hon ze-etpa Toupa ahizaw hi.” – 1 Kor. 4:3

Kisikna ziak a lunghei theih kichi gingtu khat a ding in thil poimoh mahmah leh alou theilou a hong suak hi. Kisikna ding mutheilou, hoih bukim kisakna, dik kisak detna leh siangthou kisak detna chih hong om chiang in adiklou lam hi zaw i hi uh chih i theih uh apoimoh hi. Pianthak hun apa’n Pathian tate khat himahlehang khovel a om lai i hihziak un hoih bukim a khial nawn lou himhim ding chih a hikei a, khelhna neithei lai i hi uhi. Hiaite ziak in mahni hihnate ki-en a kitheihchet kibawlna ding omte a kisik a lunghei a poimoh gige hi. Laisiangthou mun tamtak ah leng kisikna kammal i muthei a, hiai in kisikna a poimoh dan hon muchian sak sem hi. Kisikna toh kisai i genlai in Juda tanchin a theilou i om kei ding uhi. I Hondampa Jesu mansakpa ahi. Hiai bang thil mulkim huaitak mai hih khamahleh kisik theihna ding Toupa’n pia ahi chih a tanchin ah chiangtak in i muthei hi. Himahleh kisik a Toupa kiang zot sang in amah leh amah a hinna akila chih i mu hi. Toupa’n i khelhnate ua pa’n i suahtak theihna ding uleh tua te apa’n iki heitheihna ding un hehpihna hon pia a tua hehpihna pen sang thei a kisik a Amah kiang i naih gige uh apoimoh mahmah hi.

I thukhitna ding in i thupi ah lut nawn leng, Laisiangthou sim kichi leh thumna neih kichi pen thadah hun a om thei tham a thil zum huai leng a hong kipah sam keihi. Laisiangthou sim thadahna ziak a i hotdamna uh mang ding chih leng ahong hi sam keihi. Khenkhat te a dingin hiaite niteng a routine dan a ngai a lungsim a omlou pi ale va sim teitei chihleng a poimoh pen leh amasa pen ana hi pah kei hi. Himahleh i gen ut pen bel Laisiangthou sim leh thumna neih i chih zaw Toupa Pathian toh i ki hou na uh ahi zaw hi. Thumna lunglut tak a leng nei ngeilou hiam, Laisiangthou le sim ngeilou i hih lebel Toupa toh bang chidan in i kihou thei dia, Toupa toh bang chi’n kinai takin i om theidia chih mahni a i kidotna uh hong hileh i chi mahmah ahi. Khovel mite sang in Toupa toh ki hou tam zaw hilehang lungnopna ding, Khalam kipahna ding a om gige ding hi. Tuni’n hiai thute i simlai in Toupa toh i dinmun bang a hia chi keileh nang i ki-etna hong hi leh chih i deih pen ahi. Nek leh tak ding zong a, inkuan vak a nasem tamtak i om ua, gimtak in niteng in i kuankhia uhi. Hiai bang a i om lai un gimna ziak bang in thadahna leh lung-ap na a om thei zel hi. Hichi bang hunte in thum teitei in Pathian hon chiamna mangngilh lou in Amah kiang ah hatna leh a thilhihtheihna ngen teitei leng, hon ompih in hon pi tou ding hi.

“…Bahte kiang ah thilhitheihna a pia a, hatna himhim neiloute a hatsak hi. Tuailaite nangawn bah in a gim ding ua, tangvalte leng a pukzou ding uh: Toupa ngakte’n zaw a hatna uh a thaksak nawn ding ua; muvanlai bang in kha in a lengtou ding ua; gimlou in a tai ding ua; bah lou in khe in a pai ding uhi.” – Isai 40:29-31.

“Nou semgim leh puakgik paw tengteng aw, ka kiang ah hongpai un, keiman khawlna k’on pe ding hi.” – Matthai 11:28. Ahi amah kiang ah pai in, i puakgik te uleh i gimna te uh Amah kiang ah nga le hang khawlna hon pia in thanopna hon guan ding a; Laisiangthou te sim nopna leh thumnate nuamtak leh chi taktak in i neithei ding uhi. Tua bang mite hithei chiat ding in simtute tengteng Toupa’n hon ompihin hon vualzawl chiat hen!

Toupa’n a thu hon piakte tungtawn in a sim peuhmah theihsiamna hon piak i ngen a. Theihsiamnate bukim zoulou ahihziakin genkhelh khak, lak khelh khak omte Toupa ngaihdamna i ngen lailai ahi.

Toupa’n thupina tengteng tangta hen!

  • Thangginom Hanghsing

 (Laigelh toh kisai kupbeh nuam omleh, Laigelhtu +919615804759 ah thuzaak theih diing)

18th May, 2022 | Weekly-Inspiration – 99

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a comment

Your email address will not be published.