Kei kahih leh cancer patient khat kahi a, tulel a treatment latou lel kahi. Ka natna tungtawn a I Tou Jesu hon iitdan kamuhte noute kiang ah hon share loutheilou hi in ka kingaihtuah hi.
Ka natna ovarian cancer ahi a, a huntak in muhkhiak ahi a, aat khiaktheih/operate theih ngalin ka om hi. Hon aat lai un, OT sung ah ka naak (breathing) a hong buai a, (himahleh Toupan a iitna puangzaak dia ka hinna hon hoisau sak hi’n ka koih hi.) doctor leh nurse te’n hon buaipih ek in, oxygen khawng hon pia in bangbang hiam a hih ualeh ka naak hong hoih thei nawn hi. Ka ki-aat sung sawt lua ahihman in, naklup sakna (anaesthesia) a hon piak masakpen un hon daih zoulou a, hong kap beh hial uhi. Lamdang takmai in, kei bangbang a major operation hihte ICU ah nitak khat giah ngeina himahleh, doctor in ka dinmun (condition) hoihlua asak ziakin ICU ah dakkal sawtlou chik hon koih ua, huchi’n ward ah hon suan ngal uhi.
Khua ka hong phok takin ward ah kana omkhinta hi. Ka khawphawk toh kiton inchu, hon aatna uh nat chitakin naa a, a sunglam hi’n a pawlam hiletaleh, naa law mah ahihziak in ka thum huthut mai hi. Natsawkna/pain killer hon kapte unle hon zoulou phial hi’n ka thei hi. Naa law mahmah a hihna ah, hon kap beh mai un chi’n ka ngen ngutngut mai a himahleh kap mun luat a hoihlouhmanin hon kaptuan kei uhi. A natdan kammal in a loukhe khin zou kei hial hi. Naa salua zaw kahi dia khua bang phawk zel phawklou zel in ka om hi. Hospital ah ni nga(5) sung ka om nung un, innlam damtakin ka tungkik uhi. A zing in kaki aatna naa salua a ka omlaitakin hiai Bible chang ka lungsim a hong luut guih a, Tou Jesu hon iitna ka musuah thakthak hi.
Isai 53:4-6
Aman I natnate pua in, I dahnate a pua a: himahleh en bel dahna khu, Pathian vuak, hihgentheih in I bawl uhi. Himahleh I tatleknate ziak a amah liam in a om a, I thulimlouhnate ziak in vuak sidup in a om a: I lungmuanna ding in sawina a tung ah a kia a; a vuakna golhte a hihdam in I omta hi.
Kei a a natna chu ka gilsung mun chouh hia, ka Toupa’n kei hon iitziak a a thuakna ka lungsim leh mitkha ah, limsaklouh vuallou in hong kilang dundun hi: Ka sik leh tang a ahong thuakna, a lusiip apan a khetawtan vuakna ma a dim, a lu a ling lukhu khu, a taksa pum teng saatna ma a dim, a sa bal hek-hok a, sisan a dim mai hitel ahi. Kei thuakna toh ka teh dek leh zum huai bang kasa mai hi. Kei a amun neuchik a le si dek phial a naa sa a paizoulou, I Toupa thuakna chu mihing mai hileh ana ziak chouh ale sih theih mai ding hinapi in kei a hon iitman in, a Pathianna zang ngei ahi dia, akha ahun ma a khahlou in pang teitei a, a naa thuak thupi lua ahihman in puuk zel mahleh thou in Kalvary tang ah Khros ah siik kilh a kikilh in ka khelhman hon piaksak zouta hi. Tua kia hilou in ka natnate tengteng toh leng kilh belh khawm in omta, aman hon thuak sak vek zouta; hichi kan a iitna thupi om nawn dia hia chih katheih toh kitonin I Toupan a hon thu chiam “… bangchikmah in k’on donlou kei ding a, pai leng k’on paisan kei hial ding” – (Hebrute 13:5) a chih a kipdan ka hon theikhia hi. Toupa thuchiam in hon kipaaksak lua ahihman in ka kap in ka kap huphup kha zawzen hi.
Nidang in bel I khelhman chouh hon piaksak dan a kana ngaih tuah gige ahi a, himahleh hiai hun chiah in zaw, khelhman kia ana hilou in, i damna di’n i natnate leh i dahnate tengteng leng aman honna thuaksak khinvekta hi chih kathei khia hi. Huai nung ka ki-aatna nasa a ka om khak chiang in ka mit kha ah Jesu a khut Sikkilh lianpi a ki kilh laitak khawng, a pum a si luang a cross a kikhai lai hong lang zel a, ama thuakna kei a toh teh a thupilua ahihmanin kei a peen neeptakin ka thuak tou thei zel zawta hi.
Ni khat ka hong damkhiak deuh in lawmte nih toh lampi a ka pai ua leh gari hattak a hong tai khatin hon phukha dek mahmah in ka na om uhi, chiamnuih-thutak in kenle “karei dam ut a sum tampi leh tha tampi kiseng a, si hileng ki pammaih mah di” kachih leh, ka nuih uh za ahingei dia, ka thum un ka nui uh hi. Ka hon gen nop pen ahihleh, ei mihingte i manphatna uh ahizaw hi; sum leh pai, neih leh lam sang a manphazaw tham Jesu sisan in hon leikhiak sa, Jesu mahmah in A tha leh A hinna a hon leikhiaksa ihi uhi. I manphatdan uh kithei chiat thei leng ka ut lua hi. Bangmahlou (worthless) na kisa maithei himahleh hiai thei in sanggam “Jesu in manpha hon sak ziak a nang a dia a hinna hon pia ahi”. Hiai thutak thei hile chin na hinna mahni masial (selfish) tak a zanglou a, man neilou bangmai leh bangmahlou kisakna toh kining in na omom ngam lai di’n ka gingta kei hi. Bible tungtawn a ei hoihna dia Toupa’n i hin didan honna geente zui tou leng eimah ahi a hampha ding. Jesu nung mah zuiteitei ni’ng maw?
Natna thuak in na gim mahmah hia? Lungsim lam damlou in na bahsia gop hia? Iittu ding kuamah nei nonlou le nakisa maithei ding ahi. Himahleh hiai thei in sanggam, na pianna nu leh pa leh innkuante sang a hon iit zaw khat om hi; amah dou a, a meelma ihih lai ua meidiil a paihvek a I om ding uh gentak louh, Pathian thangpaihna I thuak ding uh ngaingamlou in, hon iitluat manin, i suahtak theihna ding un, simmoh, enghouna leh vuakna chiteng thuak hi. Pathian thangpaihna eite tung a tung di tengteng amah tung a ngain hon thuaksak vek a, a hinna hon lui khia, hon iittu i Tou Jesu om ahi. Nang na mihuat pen le chi zawzen dah ni, na iitpen a ding in Jesu hon thuak dan in na thuaksak ngam diam?
I Toupa hon iitna/iitdan theivek le hang kuamah in adeihlouh lam himhim khoih ngam dinle ka gingta kei a thamlou in amah a muanhuai dan leh ei a dia a ginomdan ithei beh ding uhi. U leh nau, nu leh pate athak in ka hon chial ahi, hun hoih I neih lai un I Toupa hon iitdan suut thak in, amah lam zuan leng amah a kipahna bukim leh damna kim om ahihdan I thei deuhdeuh ding uhi. I Tou Jesu ah kingak hi a zang in, a nuam mahmah hi. Amah hon iitdan theichiat thei le, enleng midangte i Toupa hon thuchah bangin I iit thei vek ding un ka um ahi.
November 13, 2021.
– Biaklun (Guest Column)