TOUPA A KIPAHNA

0

I niteng hunzatnate uah kipahna ding zong sek mahlehang kipahna taktak a honpe thei tuh i Toupa kia ahi. Kipahthu gen ding leh kipah gige ding chih mawk thil hitheilou a batna chiang om a bang nak hi. Bangziak a kipaktak a om thei gige lou i hi ua chih i kidot chiang un khovel thilte a kipahna ding i zong sek ziak uh ana hi gige hi. 1 Thes. 5:16 ah, “…Nuam gige un” chih i mu hi. Nuam gige chihtuh bangkim a kipahtheihna chileng a dik ding hi. Hiai a nuam gige un chih hinapi i Lasiangthou mundang ah hiai i mu kik zel hi, “….Hiai thute na kiang uah ka genta hi, keimah a na khamuanna ding un. Khovel ah gimthuakna na neiding uh, himahleh khamuangtak in om un, ken khovel ka zouta, a chi hi.” – Johan 16:33. Nuam gige un chih toh gimthuakna tuh a ki bang keihial hi. Bang hiam gimtak a thil i hih chiang un maitai tak a om ding michih in haksa i sak mahmah uh leng ahi. Chihleh hiai thu tegel hong kikalh chih na a diam? Kikalh lou hial tuate saulou in i en ding.

Tamtak te i buaina sek uleh kipahna taktak i neihtheih louh nasan utuh kipahna pen bang hiam a nga a huai a i lametna uh i ngak ziak uh ahi. Tua bang thilte a i lametna uh hong hih louh chiang in kipahna om nak sang in lunggimna leh buaina hon tungtu a hong leh suah zel hi. Bang thilte ah i kipahna uh i nga ua chih apoimoh hi. Khovel thilte a kipahna ngakna in kipahna bukim a honpe thei kei ding a; tua mah bang in i ngaihdan uh, i lungsim uleh i deihtelna uh thilte a kipahna i ngak chiang un kipah det ding chih chu a omlou ding mah ahi.

Kipahtheihna kiching tuh i Toupa kiang kia ah ahi a om chih theisiam thakthak leng i ut hi. Toupa a kipahna tuh banghiam thil akinga himawk lou leh eimah tharau dan a leng kinga himawk lou ahi. Toupa a kipahna, amah a nopna bukim om mah ahihleh tuate bang chi neihtheih ding i hi ua? Amah tungtawn a kipahna om theihna ding in Amah theihchet masak a poimoh penpen hi. Amah theilou pi inleng khovel thilte tungtawn in kipahna, nopna a neihtheih tham hi. Himahleh tuate’n kipahna leh lungnopna taktak hunteng in a hon pethei kei hial hi.  Kipahna kiningching tak a hunhun a i neihtheih na ding in Toupa theih a ngai a, Amah deihdan a i om a, a thute zui a tuate i hinkhiat pih uh apoimoh hi. Toupa thei ki chichi mahlehang leng Amah deihlouh dan a khosa kawmkawm i hih leh kipahnate sang in buaina i tung uah hongtung zaw thei ahi chihleng phawk thak ni.

Hiai dotna kidong leng, i Pathian uh i ngaihtuah chiang un i lungsim uah bang honglang sek hi’n i ki thei a? Ahihkeileh bang lungphut i nei uh? Kipahna ding, maitaina ding hiam, ahihkeileh lungnopna lungsim chihte a om thei hia? Toupa a Hotdamna taktak sangte a ding in chu kipahna omlou theilou ding ahi. A ziak bel khelhna a siding lai tangtawn hinna i neih theihna dia i Toupa Jesu Khris hong sihna lel inleng hunteng in kipahthu gengen ding ahihdan hon theichian sak semsem hi. Hotdamna ana tangta, piangthak sa i kichih nung a hiai bang a kipahthu genna ding dan leng neilou, mu mengmeng lou i hihlai leh i ki vel uh a, i thum uh a, i hihnate uh Toupa a ki en chian a, i Toupa hoihna muthei ding a i kilat khiat thak uh apoimoh mahmah hi. “….Pahtawina leh thupina a ma ah a om a; hatna leh kilawmna a Mun Siangthou ah a om hi.” – 1 Kronikil 16:27. I kim leh kiang a thilsiam omte khong i ngaihtuah chiang un kipahna lungsim a om thei hia? A Siamtu om ahihlam i phawk sek hia? Kipahna ding om ahihlam leng phawk banlou a, tuate ahidi mong sakna toh khosasa i hi uhia leh chih tuh mahni kidotna ding a thil poimoh mahmah a hong hi nawn hi. Hiaite te’n i Khalam dinmun uh bangtan hiam a hon ki enchian sak ding in a gingtak huai hi.

Jesu Khris tawnlou leh Amah theilou in nopna leh kipahna a om ding tuh a lamet huai kei a, hih leng a hithei kei himhim ahi. Amah i Toupa Jesu a kitheihchetna hoihtak neite’n bel a haksat hun un, a buai hun te un leh lungkhamnate a tuah hun un kipahna ding hiai khovel in apiak theihlouh lungnopna thuguk a nei thei uhi. Amaute’n haksatna thupitak a tuah louh ziak uh ahi zenzen kei hi, a tuak tham uh a himahleh tuate a puakdan a siam uhi. Bang ziak in? Toupa itna phawk tawntung uh ahihziak un. Peter in hiai bang in ana gen hi, “….Mu ngeilou napi’n amah na it ua, tuin mu tadih kei mahle uchin, amah na gingta ua, kipahna gentheihlouh leh thupina a dim in na kipak mahmah uhi.” – 1 Peter 1:8.

Kipah theihna kichi tuh Khagahte lak a khat leng ahi. Hiai kipahtheihna kammal ka ngaihtuah khak chiang in ei gingtute lak ah gen nei kasakna a om mahmah hi. I hondampa Jesu nung i zuihna uleh, niteng a hun i zatnate uah hiai khagahte neih theih louh a om zaw gingtu khat ading in thil mak tak mai a hong hi sawnsawn hi. Tua bang i hihleh i gingtu hihna leh i Khalam dinmun uh ki et na ding a om chihna a hong himai hi. “…Kha gah ahihleh, itna, kipahna, lemna, thuaktheihna, migitna, hoihna, muanhuaina, Nunnemna, kidektheihnate a hizaw uhi; huchibang kalh lam in danthupiak himhim a omkei hi.” – Galatiate 5:22-23. Chihleh gingtute kipah det ding chih a hidiam? Haksatna, buaina, lungzinna leh dahna chihte neilou ding i hi uh chihna ahi diam? Ahi zenzen kei, i Hondampa Jesu ngei leng ‘…dahnate neimi leh natna theimi ahi a’ (Isai 53:3b) tua zahzah in ‘…kipahna Amah ah a om hi.’ (Hebrute 12:2).  I Laisiangthou a nuam gige un a chih ziak a haksatnate tuak lou ding i hi uh chih ahi keihi. Haksatnate i tuah hun un Toupa toh tonkhawm gige hileng Amah tungtawn in lametna a kipahtheihna i neithei gige ding uhi. Amah tawnlou a eimah hatna leh hih theihnate muang a khovel thilte a lametna i ngak chiang un kipahna om sang in dahna lungkhamnate i tuak sek uh ahi zaw hi. Khovel ah banga chituk in haksatnate tuak kahi kichi zel mahlehang i mangbat pen hun uleh i lungkham hun un i Toupa’n hon ompih gige ahi chih phawkni. Eite’n i mohpuak uh zaw bangkim i hihna ua Amah phawk tawntung a lungkimna ahi. “….Na lungsim putdan uh dangka deihtakna panglou hi hen; na thil neihsun tung uah lungkim un; amahmah in, “Bangchik mah in k’on donlou kei ding a, paileng k’on paisan kei ding” a chi hi.” – Hebrute 13:5.

Laisiangthou ah haksatna, gimthuakna chihte mun tamtak ah muh ding a om hi. Hiai in leitung a nuamtak a ut dandan a om den ding i hihlouhdan uh a hon hilh hi. Nuamtak a khosa ding a i Toupa’n hon deihlou ahi chihna hilou in, gimthuakna i tuahte un Amah thupina, a itna hon musak semsem a, Amah toh kinaihsem na a hon tung hi. Romte laibu a i muh mah bang in, “….Huai kia leng hilou in, i gimthuakna ah leng kipak in i om uh, gimthuakna in kuhkalna a tun hi. Kuhkalna in theihtelna a tun a, theihtelna in lametna a tun chih thei in.” – 5:3-4.

Jakob inleng hiai bang in ana gen nawn hi, “…Ka unaute aw, na ginna uh ze-etna in kuhkalna a siam chih thei in, khemna chiteng na tuah chiang un kipahna ngen in sim un. Na ginna ze-etna un kuhkalna a siam chih thei in.” – Jakob 1:2-3. Haksatna ze-etna i tuahte uh tungtawn in kipahna ding, Khalam a masawnna ding a om sek hi. Mihing te’n i khelhna ziak un buainate tuak zel mahlehang, hun tamzaw te ah haksatna i tuahte uh a mawk a i tung ua hongtung hi lou in Toupa’n a hon itna, a hon ompihna hon sinsak nopna ana hi thei gige ahi chihleng phawk semsem ni.

Tuni’n Toupa ah i lametna te uh nga in, Amah kiang kia ah kipahnate zong ni. Khovel thilte a lungnopnate zong mailou in, a honpe thei pa ‘TOUPA A KIPAHNA’ Amah kiang kia a zong zaw ding in simtute i kichial ahi. “…Kha Siangthou thilhihtheihna ziak a lametna na hauh theihna ding un, lametna Pathian, na gintak ziak un, kipahna leh kituahna chiteng in honhih dim hen.” – Romte 15:13.

Toupa’n i thugelhte tungtawn in theihsiamna leh Khamuanna i tanchiat uah hon  piak i ngen hi. Khalam a masawn semsem thei ding; Tunglam thil te a kipahna i Toupa a nga thei gige ding in simtute Toupa’n hon ompih chiat henla, theihna bukim louh ziak a i  gen khelh omte angaihdamna i ngen hi.Toupa’n hon vualzawl hen!

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)

09th March, 2022 | Weekly-Inspiration No. – 92

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published. Required fields are marked *

Book Appointment