TOUPA TOH TONKHAWM HINKHUA – II

0

I niteng hun zatnate uah bang in i lungsim a hon luah pen a chih chu thil poimoh tak mai, ei gingtute hinkhua a hon challenge lian mahmah ahi den hi. Hiai leitung a bangziak a om i hia? ahihkeileh bangziak a piang i hia chih tangtak a gen ding hileng Toupa toh kilem ding leh Amah deihdan a khosa ding; huaituh Amah deihdan a hinkhua zang a hunteng a Amah toh kiton ding chih ahi. Toupa om pihna poimoh lah kisa, (i poimoh gige uh ahisa ahi a) lah eimah utdan a khosa zel, i bah hun chiang, i beidot hun chiang ua Amah zong zel te i hisek uhi. Zawlnei Amos in hiai bang in ana gen hi, “….A sawm kei un mi nih a paikhawm ding ua hia?” 3:3. Toupa toh niteng a i tonkhawm theihna ding in Amah toh kilemna hoihtak neih apoimoh hi. Amah ka thei kichina pi a Amah deihlouh dante hih a khosa kawmkawm i hihleh tua bang kizopna hoihtak a om thei ngeikei ding hi. Toupa toh i tonkhawm theihna ding in i hinkhua ah kikhekna alou theilou a hong poimoh ding a; i ut gige i lunggulh gige te i tawp a hong poimoh ding hi. Taksa melpu mihing a  omlai i hih ziak un hiai bang utnate, nopsaknate leh lunggulhnate nuamtak a zoh ding thil haksapi ahi thei hi. Himahleh Toupa ah kinga photphot leng hiai bangte i zouzou thei ding uhi. Amah adia thil hitheilou om lou ahihdan, “…..Jesu’n amau a en a, a kiang uah, ‘huai mihing hihvual a hi kei, Pathian a di’n bangkim hihtheih ahi”e a chi hi. Matthai 19:26.

Pathian deihlouh dan a thil i hih khak chiang un ahi amah toh i kigamlat sek uh. Bang chi bang a kigamla i hiam chih tuh Adam leh Eve tungtawn inleng chiangtakin i muthei hi. “….Toupa Pathian, nitaklam ninem a huan a vak aw a za ua; Adam leh a zi in huan a singlak ah Toupa Pathian a na kibuksanta uhi.” – Genesis 3:8.  Pathian deihlouh a i om khak chiang un thil hih khial i hih dan uh kiphawkna in hon zuipah sek hi. Ka omdan diklou ahi, ka thilhih diklou ahi chih theihtheihna in a hon zui hi. Himahleh Pathian itna in batlah ding, ngaihdam zohlouh ding neilou ahihziakin bang chituk in ana khial kha hitamahlehang a itna ziakin siamtan in i om thei lel uhi. Tuni’n ah Amah aw i ngaikhe diam? Ahihkeileh eimah deihtelna leh khovel nopsakna a omom lai ding i diam? Amah ngaihdamnate phawk lou a khosasa lai ding mah i hiam? Chihtuh i kivelna hong hileh i chi hi.

Mihingte hih eimah khomkhom a hoih i kisak deuhdeuh khak sek pen uh a poi mahmah ahong suak hi. I sa mit nate uh a hong letluat chiang in khelh kiphawkna leng a hong tawm hiaihiai a, mahni hihnate poisak louhna noptal utna leh ut dandan a omna in hon zuizel hi. Hiai te’n Toupa deihdan a khosak sangin Amah toh hon kigamla sak deuhdeuh hi. Pathian a kinga mi leh Amah phawk zou gige te’ bel ahihna uh kithei chian mahmah uh ahihziak un, khial ahihdan uh akithei uh a tuate’n kiniamkhiatna, Toupa deihdan zong behbeh utna leh Khrist bang a nuntakna toh hinkhua a zang zaw uhi. Mahni hihnate kithupi ngaihlua, mahni kingaisang lua hiam, midangte sang a sang zaw a kikoih chihte bangleng Khristian huai lolou abatna a om hi. Mi Khrist a hong kimuh chian deuhdeuh chiang un tuate a hong tawm hiaihiai a, midangte awlmohna, veina lungsim hon nei uh a, thumna hinkhua in amaute a khek lumlet hi. Tuni’n bang dinmun a ei i om kha a? Toupa toh i kikal muanhuai taktak mah hiam chih i kidotna uh hong hileh i chi hi.

Toupa toh tonkhawm hinkhua bang chi bang ahia? Amasa in mahni hihna kimangngilh angai a, i Hondampa Jesu Khrist i Lal leh i Hondampa dia i pom a i sang a poimoh masa penpen hi. Amah pomlou leh theiloupi in bang chi’n Amah toh ton kahi i kichi theiding a. Nungzui hinkhua taktak zaw maw thilnuam hilou ahi chih theichian mahmah leng i ut hi. Hiai i chihchiang in haksa lua hiam bang hiam ahikei himahleh i mohpuakna uh om ahi chih i theih uh ahoih hi. Kidong leng tamtakte’n Jesu kathei, ka hondampa ahi i chi chiat ding uh a, himahleh ataktak in nang leh kei ading in i hondampa ahong hi taktak hia chihchu dotna khuam poimoh takmai ahong hi zaw hi. I deihte, i hih utte, i gamtatnate ah Aman hon hondam zou hia? Amah i ki hondam sak zou hia? Eimah utna a pina in hon zou zaw hiale? Kua i ki zousak a? chihte mahni a i kivelna uh hong hileh i chi nawn ahi.

Johan 6 na a i muh bang in, mitamtakte’n Amah munuam leh Amah nungzui ding in a zong uhi. Himahleh chang 66 na ah bang i mu a le; “…Hiai nung in a nungzuite a khen tampi a paikik ua, amah a kithuahpih nawnta kei uhi.”  Bangziak a Amah kithuahpih utlou i hia i chihleh Amah theihmai a hun ahihlouh ziak ahi. Eite taksa a si ding himahlehang Kha a tangtawn hinna i neihtheihna ding un Amah eite sihsik in ahong si hi. Eite adia hongsihna leh hong thuaknate gingta a, i hondampa dia i sang zohnung chu khovel dan hi nawnlou in, Amah deihdan a hinkhua i zat uh angai ta hi. Niteng a eimah Khros i puak ding uh a om gige hi. “….Kuapeuh a Kros pua a hon zuilou ka mi hitak ahi kei.  Kuapeuh a hinna mu in a tan ding a, keimah ziak a a hinna tan in a mu ding hi.” – Matthai 10:38-39. “Jesu’n a nungzuite kiang ah, “Kuapeuh in a hon zuihnop leh amah ki mangngilh in, a Kros pua in honzui hen.” 16:24. Romte a i muh nawn mah bang in Toupa toh tonkhawm hinkhua tuh sa dan a om hinawn lou in Kha dan zuihna leng ahi hi. “…Sa dan zuilou a Kha dan zui zawte eimah a dan in a ngiat diktatna tangtun a a om theih na ding in.” – Romte 8:4.

Tuni’n ah eite leng tua bang hiding in kisa chiatni. Niteng hinkhua i hunzatnate ua Toupa toh tonkhawm ding leh i Khros puak ding omte Amah hatna muang a pozou gige ding i hi chi thei in; Amah a kinga semsem in pan la chiat ni. Toupa a i lametna uh den chiang a tangtawn a hinna i hon ngak ahi chih mangngilh lou in i niteng kalsuannate uah kipaktak leh Toupa deihdan in masuan chiat ni.

“….Muthei a pailou in, ginna in i paizaw zel uhi.” – 2 Korinthte 5:7b

Toupa’n i thugelhte tungtawn in theihsiamna leh Khamuanna i tanchiat uah hon pia henla, theihna bukim louh ziak a i gelh khelh omte a ngaihdamna i ngen hi.

– Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing)

11th January, 2022 | Weekly-Inspiration No. – 84

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published.

Book Appointment