Lemna leh muannate zongzong mahlehang khovel ah tuate atawm hiaihiai ta hi. Khatveivei i lungsim uh a dam zawk na ding in news khong va simsim louh a hoih zaw mai diam chih bang a hon ngaihtuah sak sek hi. Ut in ut kei lehang leng thu hoih toh thuhoih lou i zak ding, i muh ding uh a om den hi. Tum taktak i hihkeileh a hoihte vuak va sim khak chih om theilou a, buaina khovel a thiltungte khong va theih ut semna a om lai hi. Hiai te’n lungnopna a hon piak sang in lauhna, lungdongna leh lungsim gimnate a hon pe ut zaw hi.
Tu chiang in michih in i ut peuh mah uh hih theivek leng i hita maimah uh a; insung neuchik apat i room sung ua i tutna mun ua pa’n khovel kilchih a thu omte, thil omte ahoih hi’n ahoihlou hileh a theihtheih ta hi. Sappau ah “Doom Scrolling” kichi thumal a om hi, hiai bang genna a i chihleh tulai hun a mobile hi’n computer hileh tua screen te hah etluatna, hiaite a hun tampi piakna chi’n a leh theih ding hi. Hiai in a gen utpen chu thu hoih et sang a thusia leh thil hoihlou etna a hon tut dan ahi. Social media facebook, instragram, WhatsApp chihte bang ah mi thilsuah teng et seng zoh ding leng hilou huaite en suksuk in i hunteng uh i zang bei sek uhi. Hiai te’n i Khalam dinmun uh hon panpih ahi, ahihkeileh hon buaisak zaw ahi i chi hia? Bang tan dinmun ah limit i neithei ua chih a poimoh hi. Khovel thilte, a diak a i nekzong na ding ua i buailuat lai ua i hun awng neihteng uh hiaite a beisak zel te i hih un i Khalam ann ding uh chik chiang a zong ding, bang chik cia halh behna mu ding i hi ua chih hon ngaihtuah sak mahmah hi.
Tamtak te’n i na gensek uh inkuan sung natan ahleng mahni buai a buaina, khat hih khat in theihzoh ding vual hilou in i khosa ta uhi. Laisiangthou thu kikup ding, kihou lim chipchip ding chihte hong haksa hiai-hiai lai ding hi. Khovel thilte ziak mah in i lungtang te uhleng khauh deuhdeuh adiam chih ton a om hi. Thunuailutna, kiniamkhiatna ding zah a kiniam khiat ngam nawnlouhna ding mun a kiniamkhiat zohlouhna chihte mun tamtak ah i neita uhi. Hiaite bangziak a om toutou hiam i chihleh a bul a i kik louh ziak uh ahi, Laisiangthou thu sang a khovel thilte awlmoh zawkna leh Toupa a kingakna a tawm hiai-hiai ziak ahi hi.
“….Tunglam a thil omte ah na lungsim uh nga un, lei a thil omte a ngalou in.” – Kolosate 3:2
Hiai a sawltak Paul in Kolosate kiang a agen bang in, tunglam a thil omte a lungsim ngat hun ahi gige hi. Hiai a ‘nga un’ a chih thumal tuh khatvei thu a ngak azoh ding chihdan thil ahi zenzen keihi. Hunteng a ngak ding, niteng a ngak touhtouh ding chihna ahi zaw hi. Tunglam a thil omte bang hi ding hiam? Toupa theihna, a thu zuihna, Amah a kingakna leh Amah deih bang a khosakna ahi. Hiai mah tuh leitung a i omna san uh ahi a; Amah i poimoh penpen uh alou theilou a i ngaih ding thil uh ahi. Toupa thu theih semsemna (Huai tuh Laisiangthou sim gige na) in Amah batna hontung semsem ding a, Amah toh kinaih semsemna leh khovel thilte apa’n siangthouna, lungsimthak toh niteng hinkhua zatna ahon tung hi.
“….Huaiziak in Khrist Jesu, Toupa na kipahpih bang un, amah ah om un. Amah a zungkai leh lamtouha om in, a hon zilsak bang un na ginna ua kiptak a om in, kipahthugenna hau in amah ah om un.” – Kolasate 2:6-7.
Khovel ah kituahna lemna chihte gengen mahlehang a hoihlam sang in siatna in masawn toutou ding ahi. Hichibang khovel ah ut in ut keilehang leng i sih hun uh hongtung ma, Toupa hongpai ni matan khosa toutou ding i hihziak un Amah toh lou in zaw bangmah i hi mahmah kei ding uhi. Khovel thilte a i lungsim uh a hon luah theiding thil hoihlou tamtak om gige ahihziakin Sawltak Paul in hiai bang in ana gen hi, “….Huaikhit chiang in unaute aw, thil dik peuhmah, thil phathuai peuhmah, thil kilawm peuhmah, thil siangthou peuhmah, thil hoih peuhmah, thil minhoih peuhmah, hoihna himhim a om a, phatna ding a om leh huai thilte ngaihtuah un.” – Philippite 4:8. Huaite ngaihtuah un a chih leh chu ngaihtuah louhding om chihna ahi pah hi. Tuni’n ei te’n leng i niteng hun zatna te uah bang lungsim lungput i nei uh a? Niteng a i awlmohte uh, i utte uh bangte hihiam chih mahni a ki-et chet gige a poimoh hi. Ei gingtute lak ah mahni hihna kitheilou a midangte khelhna leh midangte omdan agen ut i tam zaw sek uhi. Tua bang hilou a mahni dinmun ki-et zawkna leh khial i hihdan uh ki phawk thak semsemna a poimoh zaw hi. Hiai te’n Toupa belhsemna, Amah kingakna a hon tung ding a, midangte buaipih lou ding chihna hizaw lou in ei mahmah i kibuaipihna ding uleng tam lua ahi i chih utna ahi.
Leitung thilte ah i kibual luat chiang un mahni hihnate ki mangngilh khak leng abaihlam mahmah hi. Laa in a gen bang in Toupa Jesu mahmah ahi i buaipih zawk ding uh, sihpih tham Jesu, kahpih tham Jesu, dampih tham Jesu, hin pih tham Jesu leh limpih tham Jesu hi e.
Tuni’n Toupa Jesu mah mitsuan pen in nei ni. I kim-i-kiang ah puktheihna ding tam mahleh Toupa toh tuate mualsuah theihna hatna kinei ahi chih phawk thakthak ni. Hiai bang ze etna leh khemna thuakzou ding in kisa chiat ni. Tunglam a thil omte i Toupa ah lungsim nga ni. Chikchiang Toupa hongpai ding hiam chih kuaman i theikei, tua ni hongtung ma in manpha leh siangthou takin i hih peuhmah uh Toupa toh ton kawm in hih ni.
“Na tung a lungsimnga mi, nangmah a honmuan ziak in, muanna kim in na kem ding. Toupa tangtawn in muang un” – Isai 26:3-4b.
Toupa’n i thugelhte tungtawn in theihsiamna leh Khamuanna i tanchiat uah hon piak i ngen hi. Khalam a masawn semsem thei ding; Tunglam thil te a lungsim nga thei gige ding in simtute Toupa’n hon ompih chiat henla, theihna bukim louh ziak a i gen khelh omte angaihdamna i ngen hi.Toupa’n hon vualzawl hen!
- Thangginom Hangshing
(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)
1st March, 2022 | Weekly-Inspiration No. – 91