TUNGLAM PILNA

0

Gingtute tamtak te’n hunteng a i hih zoh gige louh uleh bang tan hiam a noplouh sakna i neih sek utuh Pathian thu midang te kiang a gen khiat ngamlouhna ahi mawk hi. A diak in Pathian thu a hat zoulou deuh i sak te kiang bang leh i awlmoh sim te kiang lak a hichi’n om aw, hiai Toupa deih dan ahi chi a va ki thuhilh ding pen hou chik abat hang in nna thupi tak ahong suak hi. Hichi bang a nopsak louhna i neihte uh a kibang kei ding a, khenkhatte ading in amau lauhna ziak bang ahihkeileh ei dinmun khosakna khong hon theihluat ziak ua tua bang thuhoihte gen khiat ngam louhna chih bang a om thei hi. Himahleh hiai bang a midangte’n bang hiam a hon koih ding uh lauhna i neih pen eivuak in i neih uh ana hikei hi. Laisiangthou a Mosi, Isai chihte leng mihing lauhna ziak in tua bang in ana om kha sam uhi. Ginna a Pa chih a om Abraham hial inleng mihing lauhna ziakin a zi Sarah “Ka sanggamnu ahi” a chi sak hial hi.

Hichi ahi a, Aigupta gam lut dia a kisaklai un, a zi Sarai kiang ah, “Ngai in, numei melhoih tak na hi, chih ka thei hi. Huchi in hichi ahi ding a, Aiguptate’n nang a honmuh chiang un, hiai a zi ahi, a chiding ua; kei a honthat ding ua, nang a honhawi ding uhi. Nang ziak a hoihtak a ka om theihna ding in leh nang vanga ka hin theihna ding in, a sanggamnu ka hi, hehpih in chi zel in” a chi hi. – Genesis 12:11-13.

Hiia a Abraham thil sawm pen hoih in diksim in kilang mah leh thu zuau pi, Aigupta mite a lauh ziak lel ahi zaw hi. A tanchin uh i sim suksuk leh hiai i mu nawn hi, “…Abraham in, “Hiai khua ah Pathian lauhna a om hetkei ngei ding a, ka zi ziak in a honthat mai ding uh, chih ka ngaihtuah ziak ahi.” – Genesis 20:11.  Amah muhdan leh theihdan in Aigupta mite’n Pathain lauhna anei kei tham uh a tua ziakin a thil hih pen adik mah a hong suak hi. Himahleh hiai a i muhtheih tuh Pathian a muanna leh Amah lauhna sang in mihing lauhna hiai hun ah ana nei lian zaw a ahi.

Eite hinkhua ah Abraham dinmun toh kibang in om keimahlehang, niteng a banghiam i sep i bawlna uah, i pawt i pai uah Pathian a muanna leh Amah lauhna sang in i mihing pihte maipha etna leh amaute i lauhna ziak un tup louh tantan a va om khak hun a om thei gige hi. Tulai hun inleng Pathian muan zohna taktak neilou hileh kilawm in om uh a; Amah lauhna taktak toh i khosa zou mahmah kei uhi. Huchi kawmkawm in pilna siamna sang taktak te i delh uh a tuate hon pethei tu Pathian kiang a ngen lou in eimah hih theihnate leh midangte siamnate i suang mahmah uhi. Jakob 1:5na ah, “Na lak ua kuapeuh in pilna a taksap leh mi tengteng kiang a itlou leh tailou a pepa Pathian kiang ah ngen hen, huchi in a kiang ah piak a hi ding hi” chih i mu hi. I poimoh i taksapte uh Toupa’n hon theihpih lou ahi zenzen kei a; Amah toh i kinaih semna ding uleh a vualzawlnate i dong semna ding ua Amah toh ki hou a, thumnate i neih tam uh apoimoh hi. Paunakte 9:10a na ah, “Toupa kihtak pilna bul ahi” chih i mu nawn hi. Laisiangthou version dang ah Toupa lau tuh pilna bul ahi chi’n a kilet hi. Mi pil misiam leh mi lohching i chih khovel a tampi a om a, tuate lak ah ginglou mi tamtak leng a om tham uhi. Himahleh i gen ut pen tuh mi pil misiam leh mi lohching i chihte zaw Pathian lau mite ahi ua, kipahna dan thei mi, lungkim theimi ahi uhi. Kei mimal hinkhua mahmah ahleng Pathian phawk ut hina pi phawk zou lou ding khop a om in, tua bang a hon dal theidingte ka ki zoh sak hun aom kha zel hi. Huchi sasa in pilna, lohchinna leh banghiam zoh utna ka zong a khovel etdan in lohchinna nei mahleng tuate’n kipahna taktak a hon petuan kei hi. Bangziak in, ka zong ding leh ka lauh ding Toupa zong leh lau masa lou a ka hih ding leh ka bawl ding te a lunglut zaw a, tuate a lungsim tengteng ka pe kha zaw hi. Hiai in kipahna taktak, lungsim nopna a hon piak sang in huchi kha leh chihna hiam, kisikna chihte a hon pe zaw hi. Matthai 6:33 na a i muh bang in, a gam leh a diktatna zong masa photphot in Toupa lauhna leh Amah ah ki nga photphot le hang i poimoh i taksap tengteng uh a honpe ding chih ahi lel kei a, ahon piak behlap lai ding hi chih ahi lai hi. Bang a chi de aw, bang ka chi de aw, mite’n bang hon chi muh ding uam, huai dan in om keileng chihte i neih tamluatna in Toupa a muanna taktak nei zoulou i hih dan leng a hon lang sak ut mahmah hi.

Pathian a muanna ziak a pilna nei mite tuh mit mahmah ah leng muhtheih ding a om hi. Jakob 3:13na simleng, “…Na lak uah kua ahia pil a, thu theithei om? Thunuailut tak leh piltak in a nnasep hoihte a -omdan in ensak hen.” – Jakob 3:13. I omdan i gamtat te midangte muh ah, ahih keileh kuamah muh louh na a i om dante’n Pathian neimi i hih dan, Amah tate om dan ahih dan a lah angai hi. Mite muh a pil vuak hilou a Pathian deih bang a mi pil i hih theihna ding in Amah lau kawm leh a deihdan a i om uh a poimoh gige hi. Khristian tampi te lak a khenkhat midangte theihsiam thei mahmah lou, mahni ngaihdan kia paipih, mite awlmoh lou leh hehpihna neilou leh midangte toh ki lem thei mahmah lou tamtak a om hi. Hichi bang a omte i dem kei a himahleh Pathian apat pilna a taksap ziak uh ahi zaw mai diam chih tan i gen ngam hi. Jakob 3:17 na ah, “…Tunglam a kipan pilna bel, a tung in a siangthou phot a, huaikhit in kituah a ut a, a nunnem a, a chihnuam a, hehpihna leh gah hoih in a dim a, khentuam a neikei a, a lepchiah kei hi. Diktatna gah kilemna bawlte’n a tuh uh lemna gah ahi.”

Khovel dan a pilna i chihchiang in et dan tuamtuam in a et theih hi. Etsakna khat enleng, mi dangte toh kiselna (kidemna) tungtawn a vualzohnate, huaituh pathianthu hi zaw lou a khovel vai toh kisai a midangte tung a vualzohnate tuh khovel pilna a hong suak hi. Himahleh Pathian deihdan a pilna in bel midangte it theihna, midang te theihsiam theihna leh i kiim-i-kiang a mite’n ei ziak a nop asak theihna uh, i kiang nop asak theihna uh ahi zaw hi. Hiai te tuh ei apa’n hilou in tunglam apa’n pilna Pathian apat i dong uh ahi zaw hi.

Saptuam sung khong leh kho-tang vai khong ah ahoihlam deihluatna ziak in kisel khakna, kinial khak na chih a om thei tham hi. Himahleh hun tam zaw a hiaite chu midangte toh kituah louhna chikhat a hong hizaw hi. Ki hazatna hiam, dinmun hoih zaw deihna ziak hiam leh mahni thu vuak deihna om chiang in kithutuahna om sang in kilemlouhna a om ut zaw sek hi. Hiai bang te tuh tunglam pilna Pathian apat ahi kei chih chiang tak in Laisiangthou mah ah i muthei hi. “Himahleh na lungtang uah hazatna thupitak leh kidemna na neih uleh thudik zuausan kei un. Huai bang pilna zaw tunglam a kipan a hong paisuk ahikei a, khovel leh pumpi utna dawi a kipan ahizaw hi. Hazatna leh kidemna omna ah buaina leh thil hihkhelhna chiteng a om hi.” – Jakob 3:14-16.

Tuni’n ah pilna leh siamna nei kahi chi a i kisak theihpih lailai in tuate bang chi bang in i zang a; i kiim-i-kiang a omte’n hon hamphat pihna uh ahi hia? Ahihkeileh amaute nopsak louhna tungtu leh thadahna tung saktu a zang i hi kha diam chih te in kivel thak ni. Pathian apa’n pilna i dongte midangte adia vualzawlna a hong hih a, khat-leh-khat kal a ki itna, kitheihsiamna a hong hih semna ding in mahni hihnate ki-en in kilang khe thak chiat ni.

“Thupiak thak konpia ahi, ki-ittuah un; ken nou k’on it bang in, nou leng ki-ittuah un. Na ki-ittuah uleh mi tengteng in ka nungzuite na hi uh chih hiai ah a thei ding uh” a chi hi.” – Matthai 13:34-35.

Toupa’n simtute a thute tungtawn in hon houpih in hon ompih chiat hen. Theihsiamnate bukim zoulou ahihziakin genkhelh khak, lak khelh khak omte Toupa ngaihdamna i ngen ahi.

  • Thangginom Hanghsing

Laigelh toh kisai kupbeh nuam omleh, Laigelhtu +919615804759 ah thuzaak theih diing) 28th June, 2022 | Weekly-Inspiration – 102

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published.

Book Appointment