Mi tamtakte’n lametna kanei, ginna kanei i chisek uh a himahleh bang pentak a i lametna uleh i ginna uh chih kitheichet a poimoh hi. Hun haksa i phut khak chiang un lamet bei kisaknate hong om pah zel a, eivuak a tua haksatnate tuak mah bang sakna neih abaihlam mahmah hi. Hiai bang hunte ah lametna hing Toupa a neih a lungmuang a om theihna apoimoh mahmah hi. I Laisiangthou a i muh mah bang in, Ginna tuh thil lamette omngei a theihtelna leh thil muhlouhte theihchetna ahi chih, Hebrute 11:1 ah i muhi. Khenkhatte nek-le-tak ding buaipih in haksatak in i om uh a, khenkhatte lah insung buaina ziak bang, damlouhna ziak bang leh thil tuamtuam ah buaina i nei chelchul uh a, i buainate uh a kibang vek keihial hi. Himahleh buaina atuak lou ki omlou hi. Hiai hunte ah i ginna uh koi aom hiam, tua i ginna in hiai hunte ah hon panpih lou hia? Ahihkeileh i ginnate’ phawkphak a neilou a lungkhamna a kidim suk zel i hi hiale chih ngaihtuah tham a ching mahmah hi.
Ginna i chihchiang in huai ginna pen gingta hitawp lah bang a huai ginna pen chihle theilou in a om theih hi. Ginna dik tuh Pathian thu mahmah huai Tanchinhoih ahi bangbang a pomkipna, tuate i hinkhua a lahkhiatna ahi chileng i genkha pen ding ka gingta hi. Pathian i it theihna, Amah deihna bang a i om theihna leh mohpuakna i neihtheihte utuh Ginna ziak chouh ahi hi. Hiai bang a i om theihna ding ua ginna tuh Pathian apan i muh uleh i dong uh ahi hi. I Pathian it huai leh ngaihhuai ahihdan, phatphat dia kilawm ahihdan leh phattak ahihdan i phawk thakthak uh a hoih hi. Hiai bang a Pathian phawkna in i ginna hon hatsak semsem in khelh theihna lam chituamtuam apan inleng hon kembit gige hi.
Ginna in Pathian deihna bang a nungtakna leh khosakna hontut a tuate tungtawn a Toupa hoihnate i chep ding uh ahi hi. Himahleh khenkhat te’n ginna bang a chi’n buaina i nei uh a, thillamdang pipi hihtheihna ding bang leh chiamtehna latsak ding bang i sa uhi. Tua bangte zaw ginna dik leh lametna dik ana hi keihial hi. Ginna diktak zaw i gen taksa bang in Pathian thu ahi bangbang a pomkipna ahi chih i genzou ta hi. Ginna tungtawn in Pathian theih semsemna, Amah deihna bang ahingkhiat semsem na i neithei uhi. Ginna leh thumanna tuh atonkhawm gige ding ahi. Ginna i neih bang in thumanna apoimoh hi. Amah thu akingak na tuh a thumanna ahi. Nungzui Peterte bang a sihtan pha a thumanna tuh gingtute hinkhua a apoimoh pen ahi chileng i khial kei ding. I ginna in niteng a i Khalam hon khansak semsem a, I hoihlouhnate uh kibawl hoih semsem na hontut ding ahi. Tua bang hilou a thillamdang hih utna, muh utna leh chiamtehnate i mitsuanna lel ahihleh zaw i ginna i ki-et thak leh i ki-vel thak apoimoh mahmah ding hi.
Jakob 2:14-26 kikal ah ‘Ginna leh Nasep’ chih chiangtakin i muthei hi. “..Min ginna ka nei chi mahleh thilhih a neihkei leh bang a phatuam dia? Huchibang ginna in amah a hondam thei dia hia?…”. Ginna leh naseptel lou zaw ginna si toh akibang hi. Hiai a i Laisiangthou tel mahmah bangleng mitamtakte’n kiselna leh kinialna a ana neih uh ahitang pi hi. I ginnate eimah hinkhua a practical a i lahkhiat apoimoh mahmah a, hiai mah tuh ginna tungtawn a i nasep uh ahong hipah hi.
Tehkhitna khat enleng, vaigam khong a khosa a omte’n i tuak mun mahmah ding uh a, vaite tawndan asahkhua uh vazui hikeimahlehang thil neu chikchik ah asahkho biakna uh hih ding aom zeuhzeuh ta hi. Midangte mai a khutkilh a kunna bang, prasad kichi milim mai a alatsa uh a nekte uh bang hon hawm zel uhi. Tua lou in tu naizek a i theihkhiat thak uh yoga kichi bang houchik a ngai mitamtak i om zomah uhi. Tuate awareness dan a gen a kihilh ding chilengle a za utlou bilbel a agumlam ding ki om zawsop lai hi. Hichi bang thilte leh hiai bang hunte a i ginna uh koi a om ahia? Bang a i ginna uh? Khovel dan a om lai sawmsawm a ginna kichian neilou a omom lai ding mah i hidi uam? Kingaihtuah thakthak a i ginnate uh bang a chia kisinsakna bang hong poimoh deuhdeuh ding hi.
Tumlam gamte ah hipi in thoveng lam amanoh lai’n, eilam ah Lamka khosung bang ahon nuaisan hi. Hiai bang ahihlai’n natna hii dalna ding chi a abawl uh oh-ding, “VIRUS SHUT OUT” kichi ahong kithang nawn leuleu hi. Hiai pen katheih chian taktak ma in I-Card bang kana sa a, tua ahihlouh tawp inle ‘Curfew Pass’ dan a a-oh uh hinte chi’n kana ngai leuleu hi. Pathian a ginna leh lametna neite’n hiaite khong i hih di ua kilawm mah adiam chih kei mimal ngaihtuahna ah ahong lian mahmah hi. I na theihlouh ziak uh chilehanglah miteng in theihtheihna leh pilna sang taktak i neita ua, a hihte mah bangle tuate mah i hi zel uhi. Hiai I-Card bang a thil ohh in damna hiai hipi apan hon venbit zou ding ahihleh miteng phial in vaccine kikap bang in i poimoh chiat ding un kagingta hi. Hiai thil neuchik tung a i lametna uh i chi hia, i ginna uh chi zaw ding i hi hia le? tuate sang in i Pathian muanhuai zaw hilou hiam?! Hiai bang thilte khong i theihlouh kal ua milim biakna le ana himai diam? Kingaihtuah a ki-et thakna ding a tam mahmah mai hi. Gingtu khat hingal a ginglou mite’ sang ale i omdante uh, i gamtatdante uleh i thil hihte uh kilawm mahmah lou lah dik i kisakna uh atam mahmah mai hi. I Laisiangthou mah uah kik thak in, thildangte a buaichihtak a i buai mah bang un Pa hon itna thute ah buai zaw leng i ut mahmah mai hi.
Pil i kisaknate uh et thak a nei in i lungsimte uh Toupa lam ah hong thak thei chiat leng i ut mahmah mai hi. Mahni hihnate diksa a, pil kisakna a omchiang in zaw Toupa awte a zakleng abaihlam kei hial hi. Pathian in hon veh ding bang in honvehthei kei a, a aw te i zakei un i keuthei mahmah uhi. Sawltak Paul in hiai bang in ana gen hi, “Khovel min Pathian Kha thilpiakte a sang kei nak hi, amah ngaihdan in haihuai ahi ngal a, kha a theihchet a hih ziak in a theithei kei hi.” – 1 Korinthte 2:14.
I thukhitna ding in hiai bang dotna kidong leng. Buaina haksatna i tuah hun khia hilou in panpihna i poimoh hun in Toupa i zuan hia? Ahihkeileh eimah a tuate sukbuchin sawmsawm lai i diam? Khovel a thil omte a siamtu om ahi chih phawk lou a, ahidi mong a hong om ahi na chimai hiale? Ahihkeileh Pathian thupinate ahi chi’n Amah kiang kipahthu i gen zel hia?
I Hondampa Jesu hon sinsakna bang in i buainate uh amah kiang ah gen in thumni. Haksatna i tuah hun un i ginnate uh bang a chia lungmuantak a om leng ahaksa thei hi. Himahleh theihsiamna, lungmuanna leh pilna honpe theitu i Toupa a muanhuai hi. “Ngen un, piak in na om ding uhi; zong un, na mu ding uh; kiu un, a hon honsak ding uhi; Kuapeuh a ngen in a mu a; kuapeuh a zong in a mu a; kuapeuh a kiu honsak in a om ding hi.” – Matthai 7:7-8.
Toupa’n i thugelhte tungtawn in theihsiamna leh Khamuanna i tanchiat uah hon piak i ngen a; kibawl thakna ding leh ki-et thakna ding omte a kibawl thak theichiat ding in simtute hon ompih hen.
Theihna bukim louh ziak a i gen khelh omleh tuate Toupa kiang ah ngaihdamna i ngen lailai hi.
- Thangginom Hangshing
(Laigelh toh kisai kupbeh nuam omleh, Laigelhtu +919615804759 ah thuzaak theih diing)
23rd June, 2021 | Weekly-Inspiration – 75