IITNA PATHIAN IN MIHINGTE GIMTHUAK A PHAL

2
Eden’ Khelhna ziak a Pathian’ hamsiat leh taangtawn Meidiil a kah-leh-hagawina mun a mohpaihsa mihingte ihi uhi. Huai khelhna in Pathian toh hon khen kia hilou in, gentheihna leh gimthuakna simsenlouh leng hon tun hi.
I Pathian uh iitna Pathian ahi chih 1 Johan 4:8 ah i mu hi. Ama’n iittak (hawmthohtak) in A hon siam a, A iitna sung ah bittak a, Amah toh kizopna hoihtak nei dia A hon siam ihi uhi. Khelhna ziak in Amah kibukmangsan mah le’ng le, mihingte A iitna (huaichu, Amah a pan suak i hih ziak ua, ei hon siamtu A hihna ah i tung ua mohpuakna a kipiak hi’n i theisiam hi) bei ana hizenzen lou a, ei pen A iitna akipat a ei deihteelna (freewill) zang a khelhna teelzawte ana kihi lim hi.
I Pathian Siangthou, a kikhek ngeilou Pathian ahi (Hebrute 13:8). Eden a khelhna a luut ma a, Amah lem kibatpih a hon siamte A iitna leh khelhna a luut nung a A iitna kibang den hi. Khelhna ziak a Amah to mihingte kizopna kitan hilhel ahihlai in, hon limsak nawnlou hilehleng phunna di khat leng omlou ahilai in, Amah lou a phalou i hihlam uh thei in, A ginomna ziak in Jesu Khrist tungtawn in A baan hon zalh a, Amah mah in, kizopkikna nna hong sem hi.
Puuksesa khovel ah mihingte’n Amah i ngai hetkei ua, Amah zong leng khatlel leng i omkei uhi (Romte 3:11). Heldan siam ngen, thumanglou ngen leh mahni kia kibuaipih khop lel i hi uhi. Pathian A zahngaih ziak in hon hih mangthai lou a (Kahlate 3:22), A hehpina ziak a suahtakna hon pia a, i niteng khelhna hinkhua ah le’ng a poimoh asak tan kaan hon thuak saklou hizomah lai hi. Toupa Pathian, iitna Pathian ahihziak in, hon kitheihmohbawl theilou a, i kigawm nawn theihna diing un, Amah mah in pan hong la hi. A iitna mah pansan in Amah toh i kilem theihna diing un Jesu Khrist tungtawn in tatna thupitak hong semkhia hi. Eilam a i sep leh suan diing ana omlouh dan chu! (Ephesate 2:8 & 9). En Amah pan laakna ziak a, pan lathei lel kihi eive. Pan i laaktheihna dia leng, vanzat bukim toh hon thopsa kihi zomah lai hi (Ephesate 1:3).
Huchi in, A iitna in ‘KISIIKNA’ a hon tun a, A hehpihna ziakin A Hotdamna huangsung ah hon piisuakta hi. Hotdam ihih nungin leng huai ‘kisiikna’ pen mah ‘niteng kisiikna’ in hong kikhek a, huai tungtawn a ‘ngaihdamna’ i tante ziak mahin ei-lam ah, hihtheihtawp suah utna leh suahtheihna hon peta hi. Ama’ hon iitna pen geen zoh vuallouh leh i phawkkhak ngeilouh thil lamdang, lungkimna, kipahna leh khamuanna hon tuntu ahih manin, i thuk uut samta hi. “I thuk theihdan om sunsun lah hi, a tawpkhawk leh thupi pen lah hi” chi in, I hinkhua a Kumpi diing in ina saangta hi. “Toupa na deihna bang in hon zang in” chi in Amah’ Adi’n iki ‘pumpiak’ samta hi.
Apoi mahmah khat chu, mi tamzawte’n Jesu Khrist pen i Hondampa diing a saan ana kithalawp mahmah hinapi in, Kumpi diing a pom taktak utlou hileng kilawm zel hi. Kumpi diing a Jesu Khrist i saan nung a chu, Amah thuthu a omtaak diing chihna hita a, lampi zuih diing leh zuih diingdan khat chauh omta chihna hita mai hi. Huai ahihleh, ei kilimsak lou a, niteng a i Khros kipuak a, A’ nung zuih, ahi (Luke 9:23). Huai lampi i zuih diing pen, i sapum leh lungsim in a phawk, utna (desire) chituamtuamte’ lehlam ngen a om ahihziak in, zuih haksa kisa mahmah hi. Huaidan a eimah kilimsaklouh pen gimhuai leh haksa kisa mahmah sek hi. Ahia lah, Pathian’ thuman ziak a gimthuakna chih khong A manphat dan chu, i sia-leh-pha theihna (conscience) lah hon kam diing omlou a, Khalam’ tha hon guantu lah hong hi, i Toupa Jesu dungsuun diing a khanhoih a hon khangsak semsem zomah lai. Thil manphatak ahi. Pathian’ thumang kisiik kuamah om ngeilou hiveh aw!
Awle, Khelhna ziakin Sa, Lungsim leh Kha ah hihsiat in i om uhi. Jesu Khrist’ Hotdamna i saan nungin leng, hiaite thakhat in hong kikhek guih gige kei hi. Mi khenkhatte abul patna di’n kikhek guih masa ommah le uh, sianthouna nna amau ah kisemtou hiaihiai lou tuan lou hi. Ahialah, mi tamzawte i hihleh, kikhek-utna leh tupguhna lungsim, leh Amah a muanna ngakawma a kalsuan pan diing in A Khasiangthou’ thilhihtheihna toh thop i hihlam kithei in i hong kisakheta uhi. Huai akipat in I deihteelna leh Khasiangthou’ pilna leh Pathian’ haatna zang in, thil hoih (Pathian) teelzaw gige a, Ama’ khekhaap zui a, Amah suun deuhdeuh diing in Nungzuihna kongkawchiik lampi i hon zui theita uhi.
Iitna a hon siam, iitna a hon zong muh, iitna pe diing leh saang diing a hon siam i hihziakin, iitna in hon hiip mahmah hi. Hiai iitna tungtawn kia a Amah lam zuan thei diing ihihlam uh Toupa’n thei mahmah hi. Huaiziakin, ei mihingte’n i theihsiam leh poimoh mahmah uh Amah iitna pansan in A Tapa Jesu Khrist hon sawlta hi. Mihingte’n i poimohte hon Siamtu’ Pa Pathian in naak theih lua! Huaiziak in Amah muang kisin ni hang. Hiai kaan a lungmuanhuai leh tawldamhuai mihing hinkhua ah om mahmah lou ahihziak in.
Khelhna ziaka gimthuakna hong om ahi chih i theih kawmkawm a, theih dia poimoh khat ahihleh, gim-gentheihna i thuak pen uh, Pathian thangpaihna leh gawtna ana hizawlou a, sawina leh sinsakna leh thil thupi leh lamdang Ahon muhsak uut ziak ana hizaw sek hi.
MIHINGTE HI’N, A THILSIAMTE HITALEH A THANGPAIHNA THUAK ZOU DIING KUAMAH KI OMLOU AHI CHIH THEI NI. Pathian’ thangpaihna chu MEIDIIL himai ahi a, kah leh hagawina beingeilouhna ahi. Huai mun a paihmang a i omlouhna di ua, I Tanpa Jesu Khrist tung ah Pathian thangpaihna kibungkhe sipsip hi. I Tanpa’ thuakna ngaihtuah thak mah ni maw, ngaihtuah zelzel ni.
I pianthak nung in, khial nawn hetlou a omthei diing bang hita zenzen le’ng le, Job bang a mi diktat, Pathian in Ama’ thupina langsaktu hi diing a Setan’ gawt diing a leng hon pekhe thei hilai hi, chih i theih poimoh hi (Job 1:1-21). 
1 Peter 3:14 na ah, “Himahleh, diktatna ziak a na thuakta bang na hih uh leh, na hampha diing uhi. A kihtaakhuaina uh kihta kei un”, chih i mu hi. Jesu Khrist’ nung zui a, diktatna ngiim kawm a pai sawm i hihleh chu, ei mimal hinkhua a Pathian laukawm a nuntaakna gentaaklouh in, mi khenkhat suahtatna leh kikhekna tungtawn a Setan’ poi i khoihkhaakna hong kilang di inchin, huaite ziak a leng gimthuakna hong om zel diing chihna ahi. Job ginna thupidan chu maw? Pathian muang inchin, ngoh leng ngoh hetlou zomah lai eitelvoi (Job 1: 21-22).
A lamdang leh thupi mahmah chu, hotdamsa i hihnung a i gimthuakna te a thawn khat le omlou a, omzia neivekta hi; ei hoihna di leh Amah thupina di ana hi gige ahi (Romte 8:28). Hiai lei gimthuaknate i lei hinkhua ah leng a athawn a hon koihsak louh kia hilou in, Van ah, i Lal-lukhu diing a hon bawlsak himaizen hia! Kipahhuaidan maw lawmlawm! (Romte 8:18; James 1:12).
Thupi lua, Toupa ka kipaak!
Halleluiah! Amen! 
Huai kia hilou in, Isai 62:3 a i muhbang in, “Toupa khut a kilawmna lal-lukhu leh i Pathian khut a thupina lukhu na hi ding,” chih hi zomah lai hi. Lamdang eive, i Toupa lemgeel siamdan. Hiai puuksesa khovel leh mihing gam a pahtawina neuchikchik i tante natawm in thupina hon guan ahihleh, Thupinagam a pahtawina thupi i tan diingte uh ngaihsun mah ni.
Gimthuakna i chih chiangin niteng hinkhua a haksatna i tuahte ahimai hi. Hiai gimthuakna pen huap lian deuh di’n chi thum (3) in k’on khen hi:
1) Mimal’ deihteelna ziak a piangkhia gimthuakna (The Consequential suffering due to our wilful choices/decisions). 
2)Teel/hih teitei di sa hang a, i utlouh pipi hiam tuplouh a i teel/hih khaakte ziak a gimthuakna  (The consequential suffering due to our stupidity or mistakes)
3) Mimal deihtelna in a thuneihkhum theihlouh gimthuakna (The consequential suffering due to situations we have no control over). 
1) Mimal deihteelna ziak a piangkhia gimthuakna i chih chiang in ei mimal deihteelna zang a, i ut leh utlouh, poimoh i sak leh saklouh dan dungzui a thil i hihte ahi.
Etsakna: Mi khat in ama deihteelna zang in mi sum va gu hen la, mat in omta leh, atung a thu-tanna dungzui a gimthuakna a tuah pen ama deihteelna’ a zatkhelh ziak a, a thuak chihna ahi. A gimthuakna ziak in Pathian in a iit kei i chi thei diam? Chi theilou e. Johan 3:16 leh Johan 15:13 ah Pathian in hon itdan i mu hi. Pathian in a iitna-tawplou (Jeremia 31:3) a iit hinazenpi in, mipa’n a deihteelna a zatkhelh ziak a thuak hizaw hi.
I theih dia poimoh mahmah khat ahihleh, deihtelna zat diklouh ziak a, i gimthuakna pen chu, Pathian adia i thuak hilou chih chian mahmah hi chih, 1 Peter 4:15 ah i mu hi.
“Himahleh, na lak uah kuamah in tualthatmi a hih ziak in hiam, midangte thil hih gensakmi a hih ziak in hiam thuak kei hen.”
Ahia lah, i Pathian Hing leh Siangthou in Hehpihna leh Zahngaihna hau lua ahihman in, ei mimal deihteelna ziaka khial a, i khelhna ziak a gimthuakna i tuah chiang a leng, hon hihdam a, hon hunkhe zel lai hi. Thei kelkul a i hihkhelhte natawm Amah i naihna a hon zatsak hitel ahi. Pathian’ hoihna i chih hiaidan khawng hitel ahi. Kisiik a Amah lam i zot nak leh zaw, hon na nawlkhin ngei mahmah lou hi. Itna lamdang! Halleluiah! (Psalm 86:5)
2) Teel/hih teitei diing sa hang a, i uutlouh pipi hiam tuplouh a i teel/hih khak thilte ziak a gimthuakna ichih chiang in, ngaihtuah sau/man khollou, i theihlouh ziak hiam, tuplouh a mi hon sawl-luih ziak khong a, i va hihkhak phutte ahi uhi. I theih diing ua poimoh khat chu, mi phuutluih ziak a thilhoihlou va hih ngai hetlou, chih ahi. Utlouh bilbel theih ahi chih gen sawnsawn lai ni (Tita 2:12).
Etsakna: Khopi khawng a omte adia bang, ‘Prasad’ khong hon piak chiang ua, laak di lah nuamsa lou, laaklouh di lah nial ngamlou. Phuutluih ziak a ki-awi khollou pipi a neek khak chih bang omthei hiven maw? I huchih leh, ginglou mite’n “Khristiante a huchihim diing” dan a hon koih diing uhi. Huai kia hilou in, i neeklai bang gingtu dangte’n (adiak a ei sang a ginna hatlouzate) hon na mukha/ ana theikha hi le uh, etsakna hoihlou kisuak kha thei lai hi. Huailou inleng, asuanlam ua bang hon zang kha thei uhi (1 Korinthte 10:31-32). Huchi ahihleh, anuam hetlou mihing a kipat leh Pathian in A phal, i thuak diing omzek diing chihna ahi. I gen uut chu, Toupa iitna, Jesu Khrist Sisan ziak in, i tung ah luang den mahleh, ei hai man a thuak khaak theih lua ahi chih ahi. Pathian iitna in ei deihteelna (freewill) pen sawl-lui hetlou a, hilehleng, Amah teelzaw diing in huai ei deihteelna pen hanthawn hizaw hi.
Khelhman om gige ahi chih theih poimoh hi.
“Khem in om kei un; Pathian zaw zekheem a mawkbawl vual ahi kei; mi’n a tuh peuh uh huaimah a aat nawn ngei diing ahih ziak in.” – Galatiate 6:7
3) Mimal deihteelna in a thuneihkhum (control) theihlouh gimthuaknate ahihleh ei teel leh teel louh, uut leh uutlouh in thu pawlou a, haksatna leh gimthuakna i tuahte ahi uhi.
Etsakna: Natnate, sihnate, Ei mohna panghetlou a midangte bawlsiatna i tuah simmohna, gensiatna leh dikloutak a ngohnate khong ahi uhi.
Natna bang ei mimal deihteelna zattheih hileh kiteel hetlou diing hia maw? Innsungmi khat tung a natna ahong tun leh bang chu innkuan a kithuak himai ahi. A damloupe’n inlah thuak chihtak a thuak, iit luat ziak in a thuakna pen innkuanpih dangte’n le thuakpih uhi. Ahialah, natnate tungtawng a, i gimthuak ziak ua Pathian hon iitna pen a bei hituanlou ahi. I gimthuaknate ziak a i ngaihtuahna hong buai inchin, Ama’n hon iitlou khawng kisa kha chih thu ahi. Hiaidan a, ei mimal deihteelna i zatkhum theihlouh gimthuaknate chu Pathian phal i chi thei hi. Huai lou dang khat ahihleh, mi’n ei mohna pang hetlou a hon bawlsiatnate uh khawng leng ahi hi. Huchia thil i tuah sekte un gimthuakna hon tun sek mahleh, Pathian’ pen iitna Pathian ahihna ana kikhek tuan lou hi.
Pathian in A phal ahihleh, omzenei chihna ahi. Amah ngohlou a, hehna leh thangpaihna a kidimsak zawlou in, “Toupa, Na hon sinsak uut leh muhsak uutte, sin-thei leh mu-thei diing in hon panpih in” chizaw thei le’ng ki navaak in ki tawldam tuan mahmah diing hi. Huchi’n chi le’ng, Pathian thupina i muh diing a omte leng kimu kha theita diing hi.
Dikloutaka bawlsiatna hiam, gensiatna i tuah chiang a, i theih dia poimoh ahihleh, amau deihteelna zang a gamtaang ahi uh, chih ahi. En amau deihteelna’ zatdan ah, i va khonung gen theih luat omlou hi. Pathian’ tate i hihna ah, ei deihteelna zang a i hihtheih omsun ahih leh, i dawndan (response) ahi. I melmate iit diing kia hilou a, thuumsak diing a hon sawlpa’ nung zui i hihleh chu, i thukna/dawnna diing zaw i theihsa hi maw? (Matthai 5:38-39 & 44)
Jesu nungzuih i chih, hiai ziak khawng a leng haksapi suak hi. I sa-leh-lungsim’ uutna tung a Pathian’ Thu vualzohsak pen Pathian’ Thumanna hi a, a minthang ‘KONGKAWCHIIK’ leng ana hi ahi. Bangteng hileh, ei deihteelna zang a, Amah tel gige dia panpihtu muanhuai leh haat Pathian ahihlam Amah mah in eite hon khamuanna Laisiangthou mun tampi ah i mu hi (Sam 46:1; Sam 54:4; Sam 145:18; Hebrute 13:6; Isai 40:31)
Huaiziakin, gimthuak diing Pathian in phal ahih leh chu, omzenei ahi chihna ahihdan enchian zek lai le’ng ka uut hi:
1) Gimthuakna i tuah chiang in, ze-etna chihna hi a, I muh diing leh sin diing khenkhat om chihna himai hi (Jakob 1:2-4). Huai hun a, i muh leh sin diing a Toupa’n A deihte mulou a, phattuampihna leng neilou a, phunna leh khasiatna kia a ina dim khaak leh poi law diing hi. I huchih leh, gimthuakna pen omzia a neihna beisak di hang a, athawn a thuak ihih khaak diing lauh huai hi. Kei hon lungmuan leh hanthawn sek mahmah ahihleh, hichidan a i gimthuaknate’n gah manphatak leitung ah suang di inchin, Van ah leng i gou kikholkhawm suak zomah lai hi, chih ahi (Matthai 6:20).
2) Khalam a kuhkalna diing a kisawizawina (exercise) ahi a, hiai kuhkalna in theihtelna tun a, theihtelna in lametna tun hi (1 Korinthte 9:25; Romte:5:3-4; Jakob 1:3).
Amah i sut zawk semna diing leh Amah kiang i tun theihna dia gimthuak ki hi (1 Johan 2:6; Hebrute 12:2). Huchilou a, nopsa kawm a, Amah suun deuhdeuh diing a kikhekna omthei hileh, Toupa’n gimthuaknate pal diing a hon phal hetlou diing hi. Thudik, gingtu diktakte kithukim theihna hidia ka ngaihtuah ahihleh, ‘haksatna/gimthuakna lou a bangmah kisin lou a Pathian lam kinga mahmah lou ahi’ chih ahi.
3) Jesu Khris’ hotdamna i saan leh gimthuakna leng i saan tel himai hi. A nungzui i hihlam a kilat na’ng leh Ahihna koppihtute i hihlam akilat na diing ahi. Tanvou manpha ahi hi.
(Matthai 10:38; Isai 53:3; Philippite 1:29; 1 Peter 2:21)
4) A iitna leh ginomna a kilat na diing ahi (Romte 8:35). Pathian in A iitte sawi nak chih ithei hi (Paunaakte 3:12, Hebrute 12:6). Sawi a om i hihleh, Pathian in hon iit luat ziak a hon sawi chihna ahi. Houchik in gen leng, mihing khat i hihna ah, hon tai diing neilou himai zen le’ng, khasiathuai lawlou di? Ki kingaise law di’n ka gingta hi.
5) Mi i theihsiamna diing a poimoh leng ahi. Mi i theihsiam leh, hanthawntu leh hehnemtu in pangkaitak in Pathian’ Gam adiing in ki pangkha thei hi (Romte 12:15 ; Hebrute 10:24-25; Galatiate 6:2). Theihsiamna i hauh leh, mi toh kingaihnat tuah baihsam hiven maw? Theihsiamna in iitna piangsak sek a, iitna in hehpihna leh zahngaihna pawkhe zel a, I Toupa Jesu Khrist in Thu hon piak, i innvengte ei i ki iit tuk a iit diing, chih taangtungsak ki suak zel hi (Matthai 22:39). Hiai i taangtunsak chiang in, i Toupa Pathian pen, i lungtang tengteng, i kha tengteng leh i lungsim tengteng a iitna lam manoh i hi chih aki latna leng ana himai mah hi (Matthai 22:37).
I leitung khualzin sung in ei mimal deihteelna zang tou charchar di i hihziak in, hiai i deihteelna pen, thilhihtheihna (power) Toupa’n Amah teelna diing a hon piak ahihman in pilvang thei pen in zang le’ng, a manphatdan dungzui a kizang kha diing hi.
Hiai deihteelna (freewill) ahihleh, mihing i hihna tektek, A Hu (breath) hon hatkhum a kipat a Pathian in hon thop ahi. Thil hihtheihna haattak (powerful) ahihman in Setan khemna natawm akipat a kihepkhiaktheihna, “I!”/”NO!” chihtheihna diing leh, Amah teel theihna dia hon piak ahi hi. Mangngilh kei ni hiai thudik!
I deihteelna i zatkhelh lehleng, A iitna a ngeingei hi thouthou hi. Ei deihteelna i zat diklouh hiam, zatbuaiziak hiam a Amah hihna ana kikhek mahmah lou ahi chih chiamteh ni. Amah ngoh bang baihlam sek na inchin, hoihtak a ngaihtuah detdet peih hile’ng chu, i gimthuaknate atamzaw ei leh ei i ki-got ana hi. Zahngaihna leh zaidohna a dim Pathian ahihziak in, ei leh ei i ki-got gimthuakna hileh leng atamzaw honna hepkhiaksak hiam, hon hunkhe sek hiam hi zomah hi. I gensa mah bang in, Akhenchiang in sinlai i neihtheihna diing in i thuak zek phal sek hizaw hi.
Thil tengteng siamthak a aom ma chu, gimthuakna chi tuamtuam thuak zelzel diing i hihman in, kisiingsa thak in pan la thak ni maw? Toupa’n Ama’ Galvan (Ephesate 6:13-18) hon piak pen leng zang changkaang sam le’ng chih huai hi; ap leh tui-ek gawp khawng a ana om louh na diing in. Amah nungzuihna a mite muh diing a gah suangthei (Galatiate 5:22-23) a om diing a hon deih himhim leng manpha law khin hilou maw? Ama’ sianthouna leh hoihna ei mikhial leh niinte tungtawn a langsak uut hitel eivoi! Khovel mial taanvak ding a mohpuakna thupitak leh saangtak piak a om kihi zomah lai hi (Matthai 5:14). 
Gingloumite vangtah dan chu maw, a gimthuakna un khovel hinkhua kheel a omzia nei ahihlam theilou ua, manpha ahihlam leng theilou diing uhi. Mihing hihna ah, haksatna atuahte uh tungtawn in sin khat-le-nih nei zel mahle uh, A sinsaktu om ahihlam theilou ua, iitluat ziak a sinsak a om ahihlam uh leng kithei lou lai diing uhi. Hamsia uh a, hehpihhuai petmah uhi. Alehlam ah, ei hotdamsate I hamphat dan uh chu maw, gimthuaknate ei a dia, a thawn om lou himhim chih gen thakthak lai ni. I lampai dikna diing a sinsakna ahihkeileh Pathian’ Thupina i muhna diing ana hi gige hi. A hon iit ziak mah in i gimthuakna pen athawn in koih lou hi. Mihingte siatna leh khelhna a dim i hi ua, i tung ua tung gimthuakna khempeuh Khelhna ziak himah leh, Toupa’n a zahngaihna ziak in i khelh gahte natawm vualzawlna hon suahsak zel hi. Huaiziak a, i theih dia poimoh ahihleh, gimthuakna pen ei mimal ah hi’n, ei tungtawn ah hitaleh, Pathian’ Thu leh Tup tangtunna diing hizaw hi. Gimthuakna pen, A Hehpihna ziak in, Amah dungsuun i suahtheihna diing in vanzat manphatak in hon bawlsak sek hi.
Pathian’ tate a dia gimthuakna poimoh ahi chih pom in, Amah lam a hon sapna, hon kaih-naina leh A thupina i muhna diing hi gige ahi chih i lungtang ah vom ni. Gimthuakna tengteng theihsiam zoh seng di hikei mahleh, gimthuaknate tung a Thuneipa muang ni. A mai ma ah thunuailuut in kipekhe le’ng, Ama’n ei phattuamna diing leh Ama’ Min thupina diing in soiseelna bei’ iitna leh thil hihtheihna bukim toh Nna sem gige ahihlam kimu semsem diing hi. I huchihchiang in i gimthuaknate ah leng kipahna i sintheita diing uhi (Romte:5:3-4 &8:28; Jakob 1:3).
Gimthuaknate tuak a, haksa i sak mahmah hun chiang a leng, Amah muang ngam diing in, Toupa Pathian in, i ginna uh hon hihhaatsak chiat hen aw, Jesu Khrist min in. Amen.
– Chingngaihlian Tunglut
November 08, 2019/ Article No. 08
(Laigelh toh kisai kupbeh nuam a om leh, +919892316430 ah thuzaak theih diing hi.)
Chingngaihlian Tunglut
WRITTEN BY

Chingngaihlian Tunglut

She is one of our co-founder and our in-house counsellor. She does freelance counselling in church and community. She is also involved as a counsellor at Bombay YMCA Counselling Centre, CBD Belapur, Navi Mumbai.

Leave a Reply

Your email address will not be published.

2 thoughts on “IITNA PATHIAN IN MIHINGTE GIMTHUAK A PHAL

  1. Heutunu, hiaibang thuhilh na leh hilhchet na non gelh sim nop mah² leh angtang kaki sa mah² a, na tung ah ki pah thu gen kom in iit tawp lou a hon it ipa Pathian kiangah ki pah thu gen in a min ka phat ahi.

Book Appointment