KA THUMNA TE BANGZIAK A DAWN A OMLOU A

0

Tulai a lungsim a hong lian mahmah ka sak khat chu i thumna te uh ahi. Bang ziak a thum i hia? Bang lamen a thum i hia? chihte ngaihtuah a nei detdet khollou a i hai thum hun uh om ding in ka gingta hi. Thum ding ahihziak a thum hi tawp, i thu ngette, i thugente leh i kipahthu gente gen suk  ziauziau a thumna nei iki chih hun om ding ka gingta hi. Tua bang dinmun leh hiai bang a hun tampi kana zat khak ahihziakin kei mahmah inleng kana tuak kha tham hi. Thumna a poimoh dan i theichiat uh a, mi khial leh hoih lou pen i hi iki chi inleng thumna chu i poimoh pen uh ana hi sek hi. Bangziak a i thumnate uh (atamzaw chini) dawn a omlou ahia? Ahihkeileh i thumna te uh dawn a om lou ahih lam bang chi theih i hia chihte saulou in i en ding.

“….. nou migilou in bawn, na tate uh thil hoih piak dan na theih un, na Pa uh van a om in a ngente thil hoih pe zawsem louding hia?” – Matthai 7:11. Hiai Laisiangthou a i sim bang in, Pathian in i taksapte, i ngette hon pe lotel ding ahi dan i thei hi. Himahleh i thumnate uh dawn a om vek louh mawk a ziak ana om hi. Mihingte’ utdan bang hileh zaw i thumnate uh a dawnna i thei ut pahpah mai uhi. Himahleh tua dan ana hikei a, Pathian in ei adia hun asak, ei toh ki tuak dia ana gel hun hongtung chiang in ei ah nna hon sem panpan hi.

Bang chi bang in i thumsek a? I thu ngette Pathian deihdan ahi diam? Amah deihdan toh ki tuak ahi diam? Ahihkeileh bang a thum i ki thalawpna chih te eimah in i theih apoimoh mahmah hi. I thumnate eimah nopsakna ding lel ngaihtuahna ziak a thum lel i hih khak ding pilvang apoimoh lua hi. Hiai khovel a i damsung in zaw nopsakna nei zel sam mah ni, himahleh nopsa den ding a om i hikei chileng i gen khial ding in ka gingta kei hi. Tua ahihziakin i thumna neihte ei nopsakna ding kia lamen a thum i hih louh apoimoh hi. Hiai mah tuh i Laisiangthou ah leng chiang tak in i muthei hi. “… Na ngen ua, na nget diklouh ziak un na mu kei uh, na nopsak bawlna ding ua zat na tup ziak un– Jakob 4:3. I poimoh i taksap omte Toupa’ kiang ah ngen mahni, i ngetding mah ahi. Himahleh i nget dan te adiklouh chiang in tua te ah dawnna i mukei ding chih hiai ah i thei hi.

I thumnate dawng a om theih na ding in Pathian deihdan a i om apoimoh masa hi. Neulai khong leh i high skul kai lai khong in, exam ding aki lau thei mahmah hi. En lah lai ki sim peih mahmah lou, sim le utlou a ki thukhel zomah. Huchi pi a exam hun chiang a ki thum ekek mai, Toupa hon ompihin aw lohchinna nang a ahi chi khong in ken kana ngen kha zialzial hi. Bangziak a hiai hon gen ka hi hiam i chih leh, Pathian in tua bang thumna te hon dawng ding in i gingta kei hial hi. Eimah le kisiam tanlou, I hih na ki thei gegu na pi a Toupa’ kiang ah lohchinna te i ngen zaw sop zomah ua, tua te Amah deihdan leng ahi kei hi. Tua mah bang in ei ah khelhna om ahih chih i ki theih a, tua te a pan ki sik na neilou a i ki bawl hoih tuan louh chiang in i thumna neihneih te’n Pathian lung atuak ngei kei ding hi. Hichi bang hunte ah ei mahmah bang in leng thumna neih haksa i sa a, i thumna te i gingta zou kei hi. “… Ka lungtang a thulimlou ka limsak leh Toupa’n hon ngaikhe kei ding…” – Sam 66:18.

I khelhna te apan kisik a, Pathian deihdan a hinkhua zang a, i hunte i honzat chiang in Pathian mel i hon muthei pan hi. Tua bang a i om chiang in ei mahmah ahleng hangsan na i nei ta dia, i thum ding bang a thum in Toupa i naih semsem thei ding hi. Hiai in ei ah kikhekna om masak apoimoh dan hon sinsak hi. I Toupa a siangthou bang a siangthouna toh i om gige apoimoh hi.

“Deihtakte aw, i lungtang in siamlouh a hontan kei leh Pathian lam ah i hangsan hi: A thupiakte i zuih ua, a mitmuh a thil kipahhuai i hih zel ziak in i nget peuhmah amah a kipan in i muzel uhi.” – 1 Johan 3:21

“Hiai pen amah tung a i hangsanna ahi, bangpeuh amah deihlam bang a i nget leh aman a hon ngaihkhiak sak hi. Huchi in bangpeuh i nget a hon ngaihkhiak sak chih i thei leh a kiang a i thilnget i muta chih i thei hi.” – 1 Johan 5:14

I theih nawn ding ua poimoh nawn mahmah ahihleh, hunhaksate ahleng Toupa nang thu hi hen chi thei chiat theileng a hoih mahmah ding hi. Tua banah Toupa’n i thumnate uh lam chi tuamtuam ah a hon dawng thei hi. I theihchet pah bang leng aom thei a, himahleh a khonung a i phawk khiat bang leng a om thei hi. Pathian thil bangkim siampa leh i kumpi uh ahih ziakin i ngetna te uh a dawnna aman hoih asak bangbang in i tung ua hon tungsak ding hi zaw hi. I tung ua thilhoihlou hon tungsak lou ding ahi chi thei ni. I theihsiam louh omte leng denchiang a i theihsiam hun hong om ding a, Sawltak Paul te lungkelou a athum bang un eite’ leng thum ah tawlnga lou in thumni. Hiai Laisiangthou i theih sasa uh himahleh sim thakthak ni, “…Huai thil tungtang thu ah hon awngsut theihna ding in Toupa thumvei ka ngen hi. Huan aman ka kiang ah, “Ka hehpihna nang di’n a hun hi, ka thilhihtheihna hatlouhna ah ahi hihkim a a om” a chi hi. Huchi in Khrist thilhihtheihna ka tung a a omtheihna ding in kipaktak in ka hatlouhnate ka suang zaw ding hi. Huaiziak in Khrist ziak a hatlouhna ah, liamna ah, taksapna ah, sawina ah, lungngaihna ah ka kipak zel hi; ka hatlouh peuhpeuh chiang in ahi ka hat zawk.” – 2 Korinthte 12:8-10.

I thukhit na hiding in, i thumna neihte uh Pathian min thupi na ding, Amah pahtawi a hong om na ding hong hi henla. Eimah nopsakna ding leh eimah utna dingte a thum hi zaw lou a Toupa nang deih dan hong hi zaw hen, Nang mah deihna bang in hon zang inla, na Min thupi na dingin hon zang in, chi in thumni.

“Huan ka min a na nget peuhmah uh ka hihzel ding, Pa, Tapa a pahtawi a a om theihna ding in. Nou ka min a bangpeuh n’on nget uleh, ka hihzel ding hi” a chi hi. – Johan 14:13-14

Toupa’n saulou chik a i thugelhte I tanchiat ua ding in alehtampi in hon vualzawl sak henla. Gelh kimlouh leh genval i neih omte a ngaihdamna i ngen a; i gendik sun omte a sim khempeuh adia Khalam kipahna hisem ding in hon vualzawl sak hen!

  • Thangginom Hangshing

(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)
11th November, 2020 | Weekly-Inspiration – 45

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published. Required fields are marked *

Book Appointment