KHEMNATE BANG CHI BANG ADOU A, KHELHNA PUMPELH THEI DING I HIAM

0

Khem a om tuh khelhna ahi pah kei a, himahleh hiai khem a omna in khelhna ahon tung thei hi.  A poimoh mahmah hiai khelh theihnate apa’n suahtakna hon tungthei a om gige hi, huaituh Laisiangthou simtam a, athute theih a chiamteh theihna ahi. Gingtu ngen i hi uh a, bangziak a gingtu kihi hiam chih lungsim a neih apoimoh gige hi. Niteng i hunzatnate ah i gingtu hihna hinkhua bang chi’n i zang a, i ngaihtuahte bang a, i lunglutte leh i hih utte bang a chi a mahni a kidawt theihna hun neih tuh gingtu khat a dingin apoimoh gige hi.

Kuamah i demna ahi zenzen kei a, Pathian adia kizangte i maitang phatna lam le ahi zenzen kei. I gen ut pen tuh Pathian adia hih theih khomkhom a kizang a kikhami sak, ki pathian thu awisak chi a i gen a, i muhte toh tua bang a kizang hetloute dinmun a kikhiatna tampi a om hi. Tua mah bang in Laisiangthou sim tamloute dinmun leh a simtamte dinmun a kikhiatna a lian mahmah hi. I hondampa Jesu gamdai a ni sawmli leh zan sawmli ann a ngolh nung a Diabol khemnate i thei hi. (Matthai 4:1-10) Hiai a Jesu dawngnate thu Laisiangthou pansan ngen ahi vek hi. “Mihing tanghou kia in a hingkei ding, Pathian kam a thupawtte in a hingzaw ding…”v4,

“Toupa na Pathian ze-et ken chih gelh ahizaw,” a chi hi. v7.

“Setan, hiai a kipan paimang in, Toupa na Pathian na biak ding a amah nna kia nasep ding ahi chih gelh ahi,” a chi hi. Huaizoh in Diabol in a paisanta a, ngai in, angelte’n amah nna a hong sepsak uhi. v10b,11

Hiai apan mahmah inleng Laisiangthou thu theih apoimoh dan leh tuate theih a hingkhiat pih a poimoh dan akilang mahmah hi. Hiai in niteng a khemnate leh khelhtheihna, utnate apan leh melma Satan khemna sal apan kiveng zohna ahon tung sek hi. Kumpi David in Sam laibu ah hichi’n ana gen hi, “Na tung a thil ka hihkhelh louhna ding in na thu tuh ka lungtang ah ka kem hi.” Sam 119:11. Hiai  apan inleng chiang takin i gen utpen a kimu nawn hi. Khelhnate apan siangthou den ding leh kihumbit zou gige ding chih confirmation ahi pah kei a, khelhna sal a lut khathei i hihziak un tuate apa’n suahtakna kivengna hon tutna ding in Toupa thute, Laisiangthou mahmah simtam a theih apoimoh hi.

Bang chibang a hiai khemna, khelhnate apan kiveng bit theiding leh pan bang chilak ding chih tuh mitam takte’ i buaina uh ahisek hi. Piangthak sate buaina leng ahi a, a nung i zuihna ua leng i poimoh pipen uh ahi den hi. Jakob in hiai bang in gen hi, “Huchi in, Pathian’ kiang ah kitulut unla, Diabol tuh dou un; huchi in, aman hon taimangsan diing hi.” – Jakob 4:7 ana chi hi. Bang chi bang leh bang ziak a Pathian’ kiang a kitulut ding i mawk a? Pathian i itna ziak, a thupiakte i zuih ziak in ahi. “Nou n’on it uleh, ka thupiakte na zui ding uhi.” – Johan 14:15. Gingtu taktak i hih a, hotdamna kichiantak Toupa a i neih chiang in hiai khovel dan bang a va om gige ding thil ahi thei nawn keihi. Pathian a kitulut gige apoimoh a, khovel dan thilte a va kibual ding gingtu khat a ding alem theinawn keihi.

A diak in ei singtangmite hih mi i etdan uh, tawndan a i na paipih uh hileh kilawm khat ana om hi. Mi kuahiam in banghiam thilthak, kipahna maw, lohchinnate maw ahihkeileh hauhsakna leh banghiam neihnate a hon neih chiang in ngaihdan dik hia diklou hia chilou in suangtuahna lungsim khat i na neisek uhi. Mi i ngaihsangte ngal uh naktakin i ngai thupi ua, mi i thulim louhte ulah a hoih a le enthei nawnlou ding khop in i koih sek uhi. Tua dante gingtute ngaihsutna om ding dan ana hi zenzen keihi. Eite’n i et ding uh zaw i hondampa Jesu vuak ahi zaw hi. Amah ahi i poimoh zawk uh, i kiim-i-kiang a mite hi zaw lou in. Tulai a mi khenkhat i na puknawn na utuh Pathian mizatte, Amah adia kizangte a hong puksiat khak chiang un ahi. ‘Kare, hiai nu hiai pa huchi maw, hicia kizang a tua hicia om mawk’ chi in amah omdante ziakin bahlohna leh gensiatna i na neisek uhi. Khenkhat inlah, ‘ka gingtak mah, kana etkhiat gige’ chi in hongpuk siat ding ngaklah hileh kilawm in i na ngak uhi. Hichi bang a omte dinmun i theihsiam a, diklou le Pathian deihdan hilou a om uh ahi chih i theihleh I thumpih ding uh amau adia thil hoih pen ahi zaw hi.

Mi khempeuh in Toupa a hotdamna i hon muhnung uh khelhna nei nawnlou himhim ding chih ahi kei a, khelh theihnate apan suahtakna nei ding. A tom agen in khial vang zaw ding chih ahi zaw hi. Hotdamna kichiangtak i neih nung a hih thupi a om pah kihinailou a kihihziakin, khelhtheihna kinei lai ahi chih i theih uh apoimoh mahmah hi. Khovel hamsiatna nuai leh khelhna dimna a khosa lai i hih ziak un. Hiai i chih ziaka khelhtheihna pen phatuamtak (advantage) a lak ding ahi zenzen keihi, kihih khial mahmah zaw ding hi. Midangte om dan gentu, enkhetu hilou a, mahni hihna ki-en leh Pathian kiang a mahni hihna kigentu i hih kiphamoh zaw hi. Midangte ziak a hotdamna nei ding i hi zenzen kei a, ei leh i Pathian kal bang achi chi a Laisiangthou thute pansan a i ki-et uh apoimoh zaw hi.

I thukhitna ding in khemna leh khelhnate i zou zohna ding ua poimoh mahmah tuh thumna ahi. Zing, nitak hun a i thumnate vuak uh hilou in, hunteng in i thumden thei hi. Ei Pathian nei a gingtute i hamphatna mahmah utuh thumna ahi pen hi. Eivuak, nang vuak na om inleng Toupa toh na kihou thei a, lungkhamnate dahnate mi dang kiang a i genkhiat ngamlouhte thumna tungtawn in Toupa’ kiang i tung thei gige uhi. Khem a om kahi, ahihkeileh ka omdan diklou om ahi chih i kitheih hun in Toupa kiang i thum ding ahi. Toupa thute ngaihtuah a, Amah A hon hihhatpa Khrist ah thil tengteng kihihthei (Phil 4:13) hi chi’a i thum ua, khemnate leh khelhtheihnate i dou ding uh ahi. Sawltak Paul inleng hiai bang in ana gen hi, “Huchi in hiai ka chi ahi, Kha ah om un, huchi in sa utna na hih tangtung kei ding uhi.” – Galatiate 5:16.

“Mihing thuaktheih val khemna himhim na tuang uah a tung ngeikei hi. Pathian zaw a muanhuai hi, aman na thuaktheih val uh khemna na tuah uh a phalkei ding; na thuaktheihna ding un khemna peuh ah taikhiakna lampi a bawl zaw ding hi.” – 1 Korin. 10:13. Pathian a kinga photphot in agam leh adiktatnate zong in mahni ah ki-en chiang phot leng khemnate leh khelhtheihnate apan suaktakna lampi a hon bawl sak zaw ding hi. Tuni’n Toupa ah kihihhat thak in, Amah a i muannate uh nga in, Amah ading kalkhat khekhatte suang in panla thak chiatni.

Toupa’n i thugelhte tungtawn in theihsiamna leh Khamuanna i tanchiat uah hon  piak i ngen a; theihna bukim louh ziak a i  gen khelh omte angaihdamna i ngen lailai hi.

  • Thangginom Hangshing

 (Laigelh toh kisai kupbeh nuam omleh, Laigelhtu +919615804759 ah thuzaak theih diing)

14th December, 2021 | Weekly-Inspiration No. – 82

 

Thangginom Hangshing
WRITTEN BY

Thangginom Hangshing

He is one of our co-founder. Apart from writing our 'Weekly Inspiration' and expending himself  in technological works in church and community, he is also our technological whiz who single handedly created, managed and run this website.

Leave a Reply

Your email address will not be published.

Book Appointment