I tawndan uleh ngeina dan uh hi leh kilawm in, nu-le-pa te’n i tate uh alet chiang ua mikhat hih ding, mi thupi khat suah ding, mi tung a leng ding chi in i na thuhilh sek uhi. Tulai inle a tam zaw nu-le-pa te’n tua bang in a tate uh hilh ding un i gingta lai hi. Kua man tate haksatak a khosak ding ki phallou ahihziakin amau adia hoih pen ding a ki thuhilh zaw ana ki hisek mah hi. Himahleh hiai bang a i ki thuhilh nate tuh hiai khovel hun tawmchik sung i hinsung ua noptak a i khosak theih na’ang uh ana hi zaw hi. I Khalam ua ding a ki thuhilhna leh ki sinsakna a tawm lolai a, hiai lam ngaihpoimoh na a neu lolai hi’n i muthei hi.
I hong lian uh a, mithupi, mi lohchingte i hong hi ngei uh hi. Mi’ tung ah leng in mite’ zahtak tham in i hong khosa tham ta uhi. Hiai ding mah deih a ki chil tou i hih ziak un, mithanna te, thupina nate delh in niteng in i hunte uh tua ding in i zang liam zungzung uhi. Hiai bang a mi thupi utna lungsim nei a, tua te ngaihtuah a i neihlai un, hiaite Toupa’ deih lam mah ahi gige diam chih i ki ngaihtuah apoimoh mahmah hi.
“…Ka ngaihtuahte na ngaihtuahte ahi kei a, na omdante leng ka omdan ahi sam kei, Toupa’n a chi. Van lei sang a a sangzaw bang in, ka omdante na omdan sang in a sangzaw hi, ka ngaihtuahte leng na ngaihtuahte uh sang in a sang lai hi.” – Isai 55:8-9.
Hiai a i sim mah bang in i lunggel te uh, i omdan te uh leh i lungput te uh Toupa deih dan ahi kim vek kei hial ding chih chiangtak in i thei hi. I ki thuhilhnate uah lut kik nawn leng, hiai khovel dan alohchinna ding a i ki thuhilh mah bang un, thumanna, dohzohna, hehpihna, ki ngaihniamna leh thunuailut a om theihna te leng i ki thu hilh uh apoimoh mahmah hi. Leitung a lohching dia iki hilh bang un i Khalam ua ding le iki sinsak uh apoimoh mahmah hi. Thupina tuamtuam leh min hoih na tuamtuam i dongte uh Toupa deihdan ahi kim vek gige diam chih leng i ngaihtuah uh aki tasam hi. Tua bangte om louh chiang in khovel dan a nopsakna te mah mitsuan in mahni a ki thupisakna, ki tawisang utna te nei in, mi sang ahithei kisak zawk nate i nei uhi. Ei sang a niam zaw haksa tak a khosa leh dinmun niam zaw a omte bang etdan khat in i koih zaw sop zomah uhi. Mi te muh leh khovel etdan in lohchinna, minhoihnate nei in mitung ah leng mah lehang Toupa deihdan a i om louh chiang in i mihing pihte tung a ki ngaihniamna, hehpihna leh dohzohna i tasam mahmah uhi. Leitung a mi lohching leh mithupi i hih bang un, bang chi’n Toupa’ hong pai ni chiang inleng thupina i nei thei dia chih i sut tou ding.
“….Na lak ua thupipen na sikha ua a om zawk ding ahi. Kuapeuh kiliansak a dai ding, kuapeuh kingaineu pahtawi in a om ding hi.” – Matthai 23:11-12.
“….Huchi in kuapeuh hiai naupang neuchik bang a kingainiam, huai mi van gam ah a thupipen ding a chi hi.” – Matthai 18:4
Mihingte ngaihtuahna toh ki lehbulh mahmah mai hi. I hihna uh, i dinmun uh hita leh midangte theihpih i ut uh a, mite’ phat leh pahtawi i ut lai uhi. Tua vuak leng ahi kei a, tua bang dinmun a i om chiang un hon pe pa Toupa phawk lou in, eimah siamna eimah thilhihtheihna i sa sek zomah uhi. I Laisiangthou in hon sinsak toh aki kalh mahmah hi. Mi te tung a ki ngaihniamna, i mihingpihte hehpih theih na te khong haksa i sa mahmah lai uhi. Himahleh hiaite zohzoh theihna ei ah aom hi, eimah in i zohzoh kei lehleng hon panpih a hon zou sak thei Toupa kiang ah i ngen thei lai uh a, i hampha mahmah uhi. Laisiangthou mah i simlai ding:
“….Khrist Jesu a om hiai lungsim nei le uchin: Amah Pathian bang a om hinapi in, Pathian toh kikim a om thil khiaklah ding in a sepkei hi, Himahleh amah a hong ki awngsak a, sikha bang in a hongom a, mihing bang a bawl in a hongom hi; Huchi in mihing mel a honpu a, hong kihihneu in si ding in thu a hon mang a, ahi, Kros a sihna a hong thuak hi.” – Philippite 2:5-8
I Hondampa Jesu leitung a hongpai dan i ngaihtuah ngei hia? Mihingte bangbang mel phu a, haksatna theihtheih na chikim nei a, tua te tampi tak thuak a, i khelhna ua si ding lai ei adia hong sihna a thupi dan. Pathian tapa hi a, a utleh tua tengteng thuak lou a athilhihtheihna a hong zohsak thei hina pi mihingte sikha bang a hongom in, kihihneu in ei te ading in hong si hi. Hiai ah bang i mu a i chih leh eite leng i mihing pihte tung a kingaihniam apoimoh dan, dohzohna apoimoh dan leh haksat hunte athuaksiam kisin a poimoh dan hon sinsak hi. Jesu’n nungzuite kiang a ka nung hon zui un achih bang in eite’n leng i niteng hunzatna uah i Hondampa nung i zuih uh apoimoh mahmah hi.
“….Huaiziak in Pathian in amah nakpitak in a hihlianta a, min laklak a min tungnungpen a peta hi” – Philippite 2:9
Khovel a mithanna tuamtuam te i zong bang un Toupa hongpai ni chiangin tua bang thupina te i neithei uhi. Bang chi bang in i neithei a i chihleh Toupa’ deihdan a i om ua, Amah thupiak te i zuih chiang un tua te i neithei uhi. Ei ah ki let saknate, ki thupisakna te koih khia a, ki ngaihdiamna te nei a Toupa deihna bang a i hinkhua uh i zat ding uh ahi. Tulai a ngaihtuahna honla mahmah nawn ahihleh khovel thupinate i awlmoh bang un i Khalam dinmun uh i awlmoh zou taktak kei uhi. Khovel ki taitehna tuamtuam te ah i hah pan mahmah uh a, i Khalam thil ua ding ahih chiang in koih dan khat ki nei hileh ki lawm in, amasa in i koih kei uhi. Biakinn khai ding hiam, midangte toh ki fellowship tuah ding hiam, ahih kei leh saptuam program chih te om chiang in suanlam ding i hau thei mahmah uhi. Hiai in i Khalam dinmun uh sang a khovel thilte mah ki awlmoh zaw lai a hih dan hon langsak mahmah hi. I hinna dia poimoh pen i Khalam dinmun i awlmoh a, i thupi ngaih uh apoimoh hi. Hiai leitung a hun tawmcik hinkhua nuamtak a zang ding a i ki hah sak bang un, i sihnung ua tangtawn hinna i neihtheih na ding un i Khalam ua ding le hah pan semsem ni. Mi chih i om dan uh i ki theichiat uh a, ki bawl hoih theihna ding i neilai ua i hampha mahmah lai uhi. Khovel kitaitehna a i ki hel bang un, I Khalam ua ding leng panla thathak in hiai te ah ki taiteh zaw ni. Khovel thil te I awlmoh bang ua i Khalam ua ding awlmoh semsem thei ding in kisa thak chiat ni.
“….Huaiziak in a huntak a nou a hon pahtawi theihna ding in, Pathian khut hattak nuai ah kihihniam un” – I Peter 5:6
I thukhit na ding in, Toupa i neihlouh chiang un, Amah toh i ton pahpah louh chiang un i mihing hih na a hong lain semsem hi. Hiai te’n ei ah ki letsakna, ki thupi sakna te hon neisak hi. I thilhih theih nate uh, I dinmun te uh eimah siamna leh pilna sa in mahni a ki tawi sang utna lungphut a om nak hi. Himahleh Toupa deihdan a om a, Amah toh i ton chiang un tua bang te a om kei a, ki ngaihniamnate, kipahna te nei in hon pe pa Toupa i pahtawi zaw uhi. Eimah ki pahtawi na ding zong lou in, i thilhih khempeuhte uh Toupa i pahtawina uh hisak semsem ni.
Toupa’n saulou chik a i thugelhte hon vualzawl sak henla, deihluat ziak agenval leh gen khelh omte a ngaihdamna i ngen a. I gendik leh ahoih omte i tanchiat ua ding in hon vualzawl sak chiat leh i thumna ahi.
- Thangginom Hangshing
(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)
09th December, 2020 | Weekly-Inspiration – 49