Khovel ah thilteng a bukim mahmah a, i neih a i utna ahih nak leh i deihdeih muh theih leh neihtheih ding in a om hi chileng i khial kei ding. Huchi ahihlai’n lungmuanna leh kipahnate koi ah a om a? Lungmuanna i leitheih a i neihtheih adiam? Khovel ah lungmuannate koi ah aki mu a? Nang leh ken tuate i nei hia? Lungmuanna leh lemna tuntu i hi hia, ahih keileh deihlou a tua te om ding lau a gamtata i hi hia le? chih i ki velna hileh i chi ahi.
Laisiangthou Isai laibu a i muh mah bang in, mihingte’n bitna leh lungmuanna taktak aki nei tawm mahmah hi. Siat theihna ding atam a, i khelhnate uh le athupi thei mahmah hi. I ngaihtuahna te uh banghiam thil hoihlou ngaihtuahna in i zang sek ua, tua thil hoihloute hih ut in, va sepsuah hun diing kal bang i ngaaklah zomah lai uhi. (Isai 58:7). Hiaite ziak in lungmuanna i gam uah a om thei kei hi. Bangziak a lungmuannate neilou a, khelh utna lungsim toh omom i hi di uam? A dawngna zaw Jesu i neihlouh ziak uh ana hi gige hi. I neih masak ding Jesu i neiIlouh chiang in lungmuanna leh bitna taktak koi mun peuh ah aom thei kei hi. A changchang in kipahna leh nopnate om zel mah leh hiaite’n sawt a daih kei a, tua te’n lungmuanna taktak leh bit kisakna taktak a hon tung thei ngeikei ding hi. Jesu toh iki tuah nung in bel lungmuanna taktak Amah tungtawn ah i nei thei a, akal lah a haksatna te hong om zel mahleh tuate’n hon buaisak lou in Amah ziakin bittak leh Khamuang takin i om thei zaw uhi.
Khovel nopsaknate a lungmuanna i na zong khak sek pen uh i na hih khelh uleh lampi diklou ana hi gige hi. “Lungmuanna lampi a theikei ua; a paina uah dikna himhim a om ngeikei: amau ading in lam kawi bang a bawl ua; huailai a pai peuhmah in lungmuanna a thei ngeikei uh.” – Isai 59:8. Mi tamtak te’ i buaina uh tuh hiai ziak ana hi gige hi. Hiai i thugelh asim kha liai te tuh gingtu i hih vek uh ka gingta hi. Huchi ahihlai in ei te’n i mohpuak uh tuh khovel a mi tamtakte lampi dik hilh tu, amaute lampi diklou a pat apaina ding uh lampi salvak sak tuh i makaih uh i mohpuak uh ahi hi. Midangte tung a lungmuanna leh bitna lampi i kokmuh theihna ding in ei leh Pathian kal i bawl fel masak apoimoh pen hi. Khamuanna taktak leh lungmuanna taktak Toupa ah i neih zohchiang in midangte i panpih thei ding a, amau te lampi dik ah Toupa deihna bang in i pi thei ding hi.
I gamsung leh i khotang uah Pathian lauhna a tawm hialhial a bang ta a, michih tung ah hi’n, namkal ah hitaleh lemna leh lungmuanna te om bangmah leh tua te’n bangtan hon daih ding a chih i genthei kei hi. “Khamuanna lampi a theikei ua, A mit uah Pathian launa a omkei,” chih gelh bang in.” – Romte 3:17-18. Niteng, hunteng a Pathian thute mah i ki hilhhilh ua, i gengen uh tuh alouthei lou leh apoimoh pen a suak ta hi. Tua ding in nang leh kei i kisak angai a, midangte tung a lugmuanna leh lemna tuntu hi thei gige i hihdan uh i ki pom ua, tua ding mah a iki sak uhleng apoimoh hi.
A langkhat lam ah i mihinpihte tung a lungmuanna leh lemna bawl ding chih i ngaihtuah chiangin a haksa mahmah hi. Himahleh hiaite tuh Toupa hon sapna chi khat leng ahi hi. I zoh hi in i zohlouh hitaleh i sawm a i sep tuh i mohpuak uh ahi zaw hi. Toupa ompihna toh tua te zou thei gige i hih dan uh leng iki theih uh apoimoh hi. Jesu’n vualzawlna agen na ahleng ahon hilh hi, “Lemna bawlte ahampha uh, Pathian tate chih ding ahi ngal ua!” – Matthai 5:9.
Koimun peuh a om le hisim leh i tuahkhak zeuhzeuh uh khat a om hi. Tua chu pawl sung khat hiam committee sung khat hiam, bang hiam group khat ah hitaleh meeting na khong om chiang in anuam lou hon tungthei ding aom hun a om thei dekdek hi. Tua te tuh mahni ngaihdan kia hoihsakna, midangte ngaihdan lak utlouh na leh pom nuamlouhna chih khong aom thei hi. Hiai te’n chidamlouhna chii, ki lemlouhna a hon tun thei hi. Huai thubuai hiam thu ki polut pen alampi ding ngaihtuah sawm lou in, ami pen bang lungsim a koih zaw chih bang a om thei hi. Hiai in lemna leh lungmuanna sang in midang toh ki lemlouhna hontun thei hi. Tua lou in mi khat leh nih in thu neilua, hih na lian lua in midangte ngaihdan leng genkhe sak ngamlou leh pau khesak ngamlou a om sak chih bang aom thei hi. Hiai thute bangziak agen khe kha i diam ichih leh mi tamtak te’n pratical tak a i tuah uh ana hi gige hi. Toupa’n lemna bawlte ahampha uh, Pathian tate chih ding ahi ngal ua hon chih lai a, ei Pathian tate tua bang hilou a, mahni kia ngaihdan hoih sa a, buaina leh midangte adia haksatna tuntu I hih khak ding uh leh i ki vel chetna ding ua i gensau ahi zaw hi.
Midangte toh kilemna deihlou kuamah i om kei ding uhi. Khrist a i mi i sate toh bang ki lemlouh a om ding kuamah i ut kei hial ding uhi. Sawltak Paul in leng tua mah tuh Korinth saptuam te kiang a avai khahna ahi hi. ”A tawppen in, unaute aw, kipaktak in om un, na omdan uh bawlhoih unla; k’on ngetna limsak unla, khamuangtak in om unla; lungsim munkhat pu unla, kituaktakin om unla; huchi in itna leh lemna Pathian na kiang ua om ding ahi.” – 2 Korinthte 13:11
Midangte’n i tung a lemlouhna a hon neih ua leleng amau tung a en hoih na i lah a amau hon koih dan leh hon muhdan uh enlou a amau toh ki lemna ding i ngaihtuah tuh i mohpuak ahi nawn hi. Hiai mah tuh Laisiangthou hon sinsakna mah ahi hi. “Kua gitlouh leng gilou in thuk kei un. Mi tengteng muh in thil kilawm ngaihtuah un. A theih liai leh noumau lambek, mi tengteng toh kituak in om un.” – Romte 12:17-18.
I thukhitna hiding in apoimoh pen leh alou theilou midang toh i kilem a i ki tuahtheih na ding un Pathian toh i kikal uh aki lem a, a siangthou gige apoimoh pen hi. “Huaiziak in, ginna ziak a siamtansak a om in i Toupa Jesu Khrist pansan in Pathian toh kilem in i om uhi.” – Romte 5:1. Toupa vulzawlna leh a ompihna i muh bangbang te midangte tung a lak khethei ding, midangte toh kilemna nei gige a lungmuang tak a om thei chiat ding in Toupa’n simtute hon om pih hen.
“Keimah a na thil theihte, tante, zakte leh muhte uh, huai thilte hih un. Huchi in muanna Pathian na kiang uah om ding hi.” – Philippite 4:9
Saulou chik a i thugelhte tungtawn in Toupa’n thupina tengteng tang hen. I thu gelh diik omte i tanchiat ua Khalam khanna leh lungmuanna hontung tuh a hong hih theih na ding in hon vualzawl sak henla, i theihna bukim louh ziak a i genkim louh leh genval khak omte a ngaihdamna i ngen lailai hi.
Amen.
- Thangginom Hangshing
(Laigelh toh kisai kupbeh nuam omleh, Laigelhtu +919615804759 ah thuzaak theih diing hi 20th January, 2021 | Weekly-Inspiration – 55)