Text: Deuteronomy 6:4-9
Israel mite aw, ngaikhia un, TOUPA na Pathian uh kia TOUPA ahi. TOUPA na Pathian uh na lungtang tengteng un, na lungsim tengteng un, na hatna tengteng un na it ding uh ahi. Hiai thu, tuni a ka honpiak na lungtang uah a tam gige ding a; na tate uh phatuamngai tak in na sinsak ding ua, na in ua na tutlai un, lampi a na pailai un, na luplai un leh na thoh chiang un na gen ding uh ahi. Chiamtehna ding in na ban uah na vial ding ua, na mit kikal uah talgakna di’n a om ding ahi. Na inn kongkhak biang leh na kongkhak uah na gelh ding uhi.
Judate a dia thumna poimoh mahmah Shema kichi hi. Hiai ahihleh ginna puankhiatna, Pathian hihna puankhiatna leh Pathian lam a sep ding (duty) puankhiatna a agen uh ahi. Thukhunthak ah I Toupa Jesu’n Thupiak thupipen leng ana chi hi (Matt.22:36 & Mark 12:29- 30).
Israelte gamchiam lut dia kisa, Moab phaizang a-a omlai ua Mosi in Pathian apan a amuh agenkhiak ahi. Kanan mite toh kibanglou ahihna uah amau bangbang a va khosa a, zi leh pasal a kineituah a, apathiante uh khawng ava biak ding uh Pathian in deihlou ahihman in thupiak zuih ding Mosi tungtawn in pia hi. Isai 49:6 Jentelte vaksakpa ding in k’on sep ding, kawlmong pha a hondampa dia na om theihna ding in, a chi a. Pathian in JenteIte laka vak vatun ding in Israelte tel a, mohpuakna a piak lai in namtel ahihna uh kia kisaktheihpih in asep dingpen uh semkhalou in, Jentelte a dia daltu a hong om chiang un I Toupa Jesu, Jentelte lak a vakna tun ding in a hongpai ngai hi (Johan 8:14 Jesu’n, “Kei khovel vak ka hi; kuapeuh honzui mial ah a khosa kei hial ding, hinna vak a nei zaw ding” a chi hi). Israel diktak tuh Jesu hong suak hi aziak Israelte sepding a kipia semsuahtu leh tangtunsaktu hong hi ahihman in. Amah gingta a anungzuite tuh Abraham suan, namtelte ihong suakta uhi (Gal 3:7 Huchi in thei un, ginna a omte Abram tate ahi uhi).
Hiai thu- shema, Mosi in zuih ding a agen ahi. Deut.6:2,3 “…na damsung teng ua a dan leh a thupiak k’on piak tengteng na zuihna ding uh… ngaikhia unla, zui ding in pilvang un”
Na Neihloupi Bangchi’n Na Tate Na Pethei Dia?
Hiai thu, tuni a ka honpiak na lungtang uah a tam gige ding a. (v.6).
Nulepa leh Sinsaktute lungtang a Pathian a om masak a, Pathian iit leh A thu zuih leh hinpih masak ngai ahihdan chiang mahmah hi. Pathian thu tangthu theih a theihthoh dinglel a piak ihi kei a, i zuih ding leh i hinpih ding a Pathian in hon piak ahi. Gingtute’n Pathian thu theihthoh lou in zuithoh zaw leng bangchituk in innsung nuam leh khotang hoih a bawl dia. Pathian hon thupiak lungtang a tam gige ding chih ahi. Lipservice, nak nuai kamsiam kia hilou, lungtang a gingta, lungtang a gelh a om a, zuih ding chihna ahi. I lunglutte leh poimoh isakte i lungtang a om a manglou hial hi. Paunakte 7:2,3 Ka thupiakte kem inla hing in; huan ka dan na mittang bang in 3Na khutzungte tung ah vial inla; na lungtang suangpek tung ah gelh in.
Sam 119:11 Na tung a thil ka hihkhelh louhna ding in na thu tuh ka lungtang ah ka kem hi. Pathian thu I lungtang ah dimsak kiehkeih zouleng zaw hihkhelh tawm dia, I kam a pawtkhia te mahmah bangle manpha ding hi a, tuachu huchilou I kam a pawtkhete bangle eilawi gen dia kilawmlou tampi om sek hi. Na lungtang a tam gige na deihlouh bangbang om hi’n na thei a? hehna maw? thangpaihna, phulak utna, huatna, hazatna khawng ahi hia? Pathian in a deih tuh Amah i lungtang tengteng a, I lungsim tengteng a, I hatna tengteng a iit ding ahi. Hiai in a gennop ahihleh I pumpi, I gamtat khohei in Pathian i iitna alatsak ding ahi. Johan in,
Khovel it kei unla, khovel a thil omte leng it sam kei un. Mi kuapeuh in khovel a it leh Pa itna amah ah a omkei hi .Khovel a thil om tengteng, sa utnate, mit utnate, damsung thupina limte Pa a kipan ahi kei a, khovel a kipan ahizaw hi.Khovel, a utnate toh, a mangthang lellel ahi. Pathian deihlam hihmi bel tangtawn in a om gige ding hi (1 Jn 2:15-17).
Eilawi in i hihsiam leh i polhkhawm siam mahmah uh himahleh Pathian lungtang suna mahmah tuh Pathian leh khovel kop khawm ahi. Nungak leh tangval kingai ginomloute bang a Pathian a ding a ginomlou tampi ki-om hi. Nulepa tampite hichi bang a i hong om chiangin itate i zuihzohloupi thuhoih lahoih gengen lele a omzia omlou toh kibang kasa hi. I pau in vailak zunthak achih toh kibang hi. Ei ah muh ding omloupi a tate piakkhiat sawm teitei, ei a sianthouna muh ding omloupi a tate siangthou ding a deih, ei piangthakloupi a tate pianthakna thu genpih, en Pathian thu hinpihloupi a tate Pathian thu hinpih ding a i deih chiang in haksatna tampi om hi. Tate lungsim ah zuih dia hoih ahihleh bangachia nang zuilou chih om sek hi.
I lungsim a Pathian iitna sangin khovel thilte’n luahdim zaw ahihman in huaimah itate lungsim ah om hi. Thil manpha(value) a sakte bang uhle khalam thilte hinawnlou, khovel thupina leh hausaknate khawng hita. Khatvei ka lawmte khat in lamka I hongtun leh innmun deihna, gari deihna, sum deihtakna in hon zou gawp a ka khalam bangle keu hulhul a thei hiveng aw hon chih leh a thugen dik kasa a ngaihtuahtham kasa hi. Na tate tung a na neih pe ding hilechin bang na pe dia?
Na tate uh phatuamngai tak in na sinsak ding ua,… na in uah,… lampi ah,… tutlai,… pai lai,… thoh chiang in,…ban ah vial,.. talgakna dia,..inn kongkhak biang ah,… inn kongkhak ah gelh in…” (t.7,8)
Mi’n Pathian a iit dan uh hilou in nang Pathian na iit dan na tate phatuamngai taka sinsak ding chih ahi. Midangte neih apan hilou in nang neih apan pekhe lechin na tate’n sang thei zaw ding uhi. Pathian iit kichi in Pathian thu a mang a, Pathian deihlam asem hi. Lungkelou a theihtawpsuah a tate sinsak ding chih ahi. Ahihleh i tate phatuamngai tak in i sinsak hiale?
Nulepa tampite’n Sunday school heutute sinsakna sen top bang om uhi. Tate toh hun zatkhom sunsun chiang bang ale phone mah buaipih zaw nulepa ihi hia? Pathian lamettan tungzou hi’n na kithei hia?
Tate sinsakna mun ding tuh innsung kia hilou in kholak vakna munte leh mundang a hohna munte leng ahi vek ding ahi. Pathian iit te’n Pathian thilsiamte iit uhi. Kiim leh kiang kemtu ihihdan, Pathian thilsiamte kemtu ihihdan i tate innsung leh kholak a sinsak ding ahi. Nulepa zumna tuntu leh mualphousaktu ahihlouh na ding un i tate pilvangtak a i sinsak poimoh mahmah hi. Paunakte 17:25, Tapa hai a pa ading in lungkhamna ahi a, amah piangsaknu ading in khatna ahi. Nulepate’n tate sinsakna ah Pathian deihpen leh poimoh ngaihpen tuh omdan ahi. Pathian thu hinpih hi’n na tate’n hon thei uhia? Nang hon thei hoihpen tuh na innkuante- zi/pasal leh na tate ahi. I tate’n ka nulepa’n zaw a lungtang tengteng, lungsim tengteng, a hatna tengteng a Pathian iit ahi hon chi ngam ding uam? Ahihkeileh a lemching maimai ahi, thutak muh ding om kei. Nek ding om kei. Zuih dingle om kei hon chi maimah ding uam? Na neihloupi na tate piaksawm non ken! Na theihlouhpi na tate sinsak sawm non ken!
Pastor M. Thangkhenmung (February 25, 2021_Short Sermon)