NANG CHAUH NA KISAKHA D’E

1

….. Leitung nang ziak in hamsiat in a omta hi. Gen.3:17

Hiai hamsiatsa khovel ah om ei mihingte nuamsatak leh thovengtak a om gige a vang mahmah ding! Khovel a mi masa pen Adam leh Eve hun a kipan tuni tan dong in geldetdet in sui vengveng le’ng lungmuang den, gimthuak ngeilou a khosa mihing om kei hial ding. Hiai i gen in khovel mite leh piangthakte leh piangthakloute uaptel in, a kilamdanna khat bel piangthakte in bangmah neikei mahle lungkham leh mangbat hun in lungkimna thuguk leh lam etna hing kinei a, sih khamuanna kineih behlap hi.

Adamte nu-pa inleng amau khelhna mulou a ngawh theihteng a na ngohziak un ngaihdam ngen mangngilh ua, Kain kiangah a nau omna kan ahihlai in a nau donpa hilou chi’n ngaihdam nget naksang in akitheihmawhbol maimah hi. Hun paizel in, Noa nuihsante’n haksatna a hon tuak ua, panpihna a nget un – zekai ta uh! (Gen.1-7)

Adam leh Eve mawhsak a baihlam na ua, hilehleng khatvei a khelhna gah uh naktak a lou ahi uhi. Kain inleng a khelhna gah a haksa asak luatziak in TOUPA kiangah “N’on gawtna a na mahmah a, ka thuak zou kei ding” a chihial hi. Noa bangleng Pathian thu-awi himahleh mite nuihsan leh nelhsiah in a om, himahleh a nelhsiah mite a kisik un a kikhelta! Nang leh ke’n i khelhna bangzah vei i kitheih mawhbawlta mah diam aw? Sim seng nonkei ni maw.. huchilai’n, i hamphatna uh hehpihna hun ah i om ua, i khelhna gah i lou sipsip naikei. I hamphat nonsawn diakna kisik a, i omdan gilou i taisan a TOUPA mai a i kituklut leh i khelhna man a piaksak sa ahi a, i sihnung chiang in Tangtawn gamnuam kitung ding hi. Himahleh i omdan gilou taisan nuamlou a i nuntak detleh zaw, Noa nuihsan mite’n banga a kikhel nunga gilou taisan in omzia nei nonlou ding!

Piangthak hilengle hiai khovel a ginglou mite sanga tan mun nuamzaw kipiak hetlouh ding leh gimthuak ding mah i hi chih i pomsiam a ngai. A ziakbel, i Laisiangthou in “Pathian migiloute leh mi hoihte tung ah a ni a suaksak a, mi diktatte leh diktatloute tung ah leng vuah a zusak hi” chihleh Jesu Khrist ngei in “K’on hilh ahi, na khitui uh a ke ding a, na kap huphup ding uh, khovel bel a kipak ding; na lungkham ding ua, himahleh na lungkham uh kipahna a suak ding hi” leh “Khovel ah gimthuakna na neiding uh, himahleh khamuangtak in om un, ken khovel ka zouta” chi’n haksatna i tuah ding a na gen khol khin hi. (Johan 16)

Hiai a tunga i gelhte khong thei gegu mahle’ng haksatna in hon bing phut a, lam etna leh beidotna tuahchiang in – mahni kithudot a hinman omlouh sakna, lungliap leh lungngai vungvung a om a, zingthou lenglah bangmah sem peihou kia hilou, nek ding natawm a nekpeih huaikei, nitak chiang in ihmut a haksatel! Huai tengkia in hun leh zaw a dan om ding hive’n, mite’n kampau houchik bang a a ngaih uh hileh kilawm a hon houna te’ un mittui daisak a, khasiatna ding ngen kimu. Ihmu lou, ann ne lou, a khitui toh hinkhua zanga, ni leng tum theilou bang, zingkhua leng vak theilou a bat hun chiangin hinkhua a haksa tel mai! Himahleh i phulel a Toupa’n hon pi hileh tudimun a ding hetlou ding, hin leng hing nonlou ding hilim hang!

Hatsat hunte a Toupa lam i ngat leh A’ Laisiangthou thute tungtawn in hatna hon pia zel hi, huai di’n Laisiangthou simtam poimoh petmah. Laisiangthou simsim ziak a haksatna tuaklou kihilou in, tuaklengle haksat hun ah Laisiangthou a kigelh – Joseph hinkhua lungsim ah hong langthei in, hampha ka hihlam kimuh suah theih hi, Ka sanggamte’n sum in hon zuak ngeikei ua, suangkul a mawhna neilou pi a khum khak inleng ka omkei! Huchih lai in mit utna leh sa utna khong ah ka puk zawsop maimah a, himahleh Lametna neilai ka hihdan Jesu Khrist sihna leh thohkikna ziak a nei ka hihlam ka thei thakthak, mahni deihtelna toh meidil lut hial sangin lametna hing Jesu lam mitsuan in hinkhua nuamtuan keimah leh, hiai khovel a haksatna tampi tuak mahle’ng, ka sih nungchiang in Tangtawn gamnuam ka tung ding chi’n thathak ki la thei zel hi.

Haksatna khatvei chauh kituak hilou ahihman in, zawng leh genthei kisa a bah leh ngui a ka om chiang in “Tungleng vasate en un; buh a tuh kei uh, a at kei uh, buh in ah leng a seklut sam kei uh. Himahleh na Pa uh van a om in amau a vak hi. Noute amau sang a nakpitak a manpha zaw hilou na hi umaw?” chih leh “Kawlgit nih dal dangka khat in a zuakzel uh hilou hiam? Himahleh a lak ua khat leng na Pa uh theihlouh in lei ah a ke kei ding hi. Na samzangte uh nangawn leng simvek ahi. Huaiziak in lau kei un; kawlgit tampi sang in na manpha zaw uhi.” chihte bang lungsim ah hong kilat komkom in, Job hinkhua lungsim ah hong kilang thei zel hi. ( Matthai 6&10)

Job in a tate thakhat thu a suun vek lai in tuni tandong Pathian in ka inkuan hon chidam sak dan khong ngaihtuah in hampha kakisakna ka theihbeh semsem a. Hin man omlou sakna tampi komkal ah hamphatna tampi ka muhsuah behlap hi.

Hiai bangteng khong ngaihtuah a lametna hing neih guk pen mitsuan a Pathian hon lemsakpihna ziak a dam a nungta in, khatveivei Mikhial kei penpen bangmah thuaklou a khelhna neilou Jesu Khrist kei a dia a sih lawmlawm tel chihtheih hun bang hong om in, a kua sawllouh Sawltak Paul in Khrist a itna in a sawl teitei ziak a haksatna leh gentheihna, zawndan leh hauhdan a siam khong thupi mahmah hi. Khris Itna mah hiveh aw bangkim simdan hon siamsak! Hinna hu diik khat natawm kibehlap theilou kei leltak TOUPA’N hiai tantan hon ompih chih chiansemsem anak hamphat huai dan!

Hiai khovel zaw haksa mah ahi. Jesu Khrist ngei inleng a na gen! piangthaklou leh Pathian theilou mite’n leng lungkimna neituan lou hial uhi. Huchihlai in, ei Pathian thei mite hamphatna zaw sih nungchiang a gamnuam zuan ding a thupukna bawl thei leh lampi zuih enchian theihna leh panpihtu naichik a om gige ahihmahmah ahi. Ginglou mite’n bel mihing, neih-le-lam leh gou khong ah a lungsim uh a nga ding ua, sihnung chiang a a zotna ding uh theihsa! Gingtute’n leng i zotna ding theisa na hang maw?

Nang chauh hilou na hi! Hiai hamsia khovel a om i hihziak in haksatna, gentheihna , buaina leh beidotna i tuah hunchiang in Lam etna nei nonlou, hinman omlou sak na leh hunta chih a baihlam mahmah hang in! Noa, Joseph leh Job te ngaihtuah zel ni, simmohna, gentheihna, leh haksatna a tuahnung ua vualzawlna a muhte uh. Amaute sanga ei hamphatdiakna Jesu Khrist sisan a sawpsiangte i hi zomah! Jesu’n “NA LUNGKHAM UH KIPAHNA A SUAK DING” hon chi zomahlai!

Piangthak nunga leng haksatna beilou chih sangin, piangthakloute toh piangthakte kilamdanna omlou chihsangin, ka phulel a Toupa’n hon pi hileh hiai tan phulou inga, hiai khovel haksatnate sangmah aleng haksa zaw thamtham ka tanmun ding gawtmun ahihdan ka chiansemsem i chihtheih chiangin Toupa toh i kinaihna kipsemsem in, i tantawk a lungkimna leng kinei hi.

I tantawk uh hiai khovel a Pathian hon thilthawnpiakte hinna, damna leh a vualzawlnate hilou in GAWTMUN hiveh aw i tantawk! Himahleh a hon hehpihluat ziak in A’ tapa Jesu Khrist sihna leh thohnonna tungtawn in vualzawhna hinkhua zangthei dingte hihang! Hiai khovel ah zaw haksa tuaktou zelzel dingmah hi hang. Nang chauh hilou na hi.

  • Liansang Khuptong

Leave a Reply

Your email address will not be published.

One thought on “NANG CHAUH NA KISAKHA D’E

  1. · April 6, 2022 at 11:04 am

    Thugelh te nuam in hon hanthawn thei mahmah e

Book Appointment