Hiai kidong leng Pathian i kibukna ahi taktak mah hia? Pathian a kibukna kichi bang hi hiam? Bang hiam haksatna leh buai nate i tuah hun un hon heh nem tu ding hiam, hon khamuantu ding hiam i mitsuan sek uhi. Hiai bang hunte a hichi bang a lam etna pen i utthu uh leng hon hi nawn lou in a hun mahmah in a hon puak khiat ziak leng ahi tangpi hi. Lungnopna leh bitna i neih theihna ding un hichi bang hunte ah Pathian i sam zel uhi. Kumpi David hinkhua mahmah le enleng, Laisiangthou sung a mi tamtakte tanchin a kigente sang mah inleng Amah mah in hiai bukna thu a gen mun zaw hi. Melmate luahna ziak hiam in leihawm, kawlbuk chihte a om chiang in Pathian a sam zel hi. A thumna late en zual leng,
“….Toupa aw, honsam ding hi ing; ka suangpi, kei lam ah na bil ngongsak ken: huchilou in zaw; nang n’on daih san leh, kawkhuk a lutsukte bang lel in ka hongom kha ding hi.” – Sam 28:1
“…K’on sap a, ka khutte na biakna Mun Siangthou lam a ka zak leh, hehpih ka ngetna awte ngaikhia in. ” – v2
“…Toupa ka hatna leh ka phaw ahi a; ka lungtang in amah a muang hi; huchi in huh in ka om hi; huaiziak in nakpitak in ka lungtang a nuam a; ka la in amah ka phat ding hi.” – v7
Eite hinkhua mahmah le ki-en leng, Pathian a bitna ding zongsang mah in sungkuan pihte thute bang leh lawm-leh-vual te gen le sak te bang in hon zou masa hi. I Pathian uh a phawk lou i hi pah kei uh a, himahleh Amah a lametna koih masak sang in i kim-i-kiang a thil omte ah muanna leh bitna koih khak abaih lam mahmah hi. Etdan dang a i hon et nawn chiang in hichi bang a buaina leh haksatnate i hon tuah hun un mahni hatna a tuate mualsuah sawm in hatlou pipi hat tak bang in i kisa lai uhi. Tuate sang mah ale apoi mahmah nawn tuh khangthak Tuailai tamtak te’n hiai bang haksatnate a mangngilh theihna ding un leh hichi bang hunte a nuamtak a aom theihna ding un nek-leh-dawn, zu-leh-sa in a kibual kha zel uhi. Tuailai te lak phet lou in piching, papi, nupi te lak mahmah ah leng hichi bang a om na atam mahmah hi.
I gen utpen bel khovel ah bitna, kipahna leh lungnopna honpe thei om tham mah e, himahleh hiaite’n lungnopna leh bitna taktak a honpe thei kei ding a; tua naksang in i buaina uleh i haksatna uh hon behlap zaw ding hi. Tuni’ a i ki hanthawnna a apoimoh pen i sak tuh khovel thilte leh i kim-i-kiang a mite tung a kingak sang in Pathian ah i lametna uh ngak masak penpen i nei mahmah leng i ki deihsak mahmah hi. “…Amah a ginna koih tengteng a hampha uhi.” – Sam 2:12b. Bang chituk in haksatna tuak mahlehang Pathian sung mah ahi i bitna ding penpen uh. Mihingte thiltuahte i et chiang in khatveivei hiai zaw haksa mah ding ahi, thuak zoh vuallouh ding ahi chi a i koih uh i maituah uh a om zel hi. Hichi bang hunte a Pathian a kingak zohna in bangkim a Amah i muanna uh hon lak hi.
“…Pathian i kihumbitna leh i hatna, mangbat lai a huh pahpahpa nai gige ahi.” – Sam 46:1
Pu leh pi a pat Khritian inkuan khat sung a khang liante i hi uh a, I om dante’ uleh i gamtat dante uh i ki-et chiang un khatveivei buaina leh haksatna i tuah nakte uh mahni khelhna ziak hiam leh om hoihlouhna ziak ahi i kichi kha zel uhi. Mahni noptalna leh thumang louh ziak a tua bang ana maituah kha zaw om tham ding hi, himahleh tuate ziak vek ahi i chithei keihi. Gingtute hinkhua taktak thuk deuh a i hon ngaihtuah chiang in haksatna kichi leh buaina kichi te ana om lou himhim hileh bang chi bang khelhnate nei in bang chi bang in i na noptal mah ding ua aw chih hun atam hi. Hiai i gen ziak in haksatnate i tuah gige ding uh gingtute adia hoih ahi i chihna ahi zenzen keihi. Himahleh hiai bang dotna kidong leng, hinkhua ah haksatna a tuah lou ki omlou ding hi; buaina leh haksat hun pen in bang chi’n i om a, kua i sam a, bang chi bang in i om? chihte tan in Pathian mah ahi dan phawk thakthak leng i ut hi. A dikdik in genleng tuni tan mel muthei a i omna ziak uh zaw Pathian in hon kepbitna ziak ahi zaw hi. Haksatna i maituah te uh tungtawn in Pathian sapna i neithei uh a, hiai tan a bei himailou in om dante kibawl phat thakna a hon tung zel hi.
Laisiangthou a Pathian i kibukna uh ahihdan i muhtheih tamlou omte i sim lai ding.
Amau mihing omna lak ah na humbitna na mitmuh in na selgu dia: lei selhatna lak ah bukta ah na koih gu ding hi. – Sam 31:20
Mangbat ni’n a bukta ah hon koihkhian ding ahi ngal a, a humbitna puanin ah honsel ding a; suangpi tung ah honkha kai ding hi. – Sam 27:5
Mi kihtakhuaite hu huihpi in bang a sawn okok lai bang a a hongom chiang in, nang zaw mi genthei ading in bukna, tagah mangbang lai ading in bukna, huihpi lak a kihumbitna, nisa liahna na hi ngal a. – Isai 25:4
Pathian a kibukna kichi a manphat dante i enlai ding:
- Amasa pen in hon khamuantu leh hon hehnemtu Pathian mah ahih dan i Weekly Inspiration uh tungtawn inleng i muthei hi.
- Hatloute a ding a hatna pethei tu Pathian mah ahi dan a chiang hi. Salam hatna vuak hilou in Khalam a hatsemna leh thilhihtheihna a hon pelai hi. (Nasepte 1:8)
- Pathian a kibukna in lauhna apa’n suahtakna a honpia hi. Amah a lametna nei taktak te ading in bitna aom a tuate’n lauhna chiteng apa’n bitna a pia hi.
- Amah ah Khawlna a om hi. Ka hakkol a nuam a, ka puak leng a zang hi, a chi hi. (Matthai 11:29)
- Niteng a haksatna buaina i tuah dingte uh Aman a hon puaksak zel hi.
(…..Toupa ka puak uh niteng a hon puak sakpa, hon hondampa Pathian phat in om hen. – Sam 68:19) Amen!
Tuni’n Pathian a kibukna nei semsem thei ding, Amah a bangkim nga ding in simtute i ki chial ahi. Niteng hinkhua i zatna uh haksatna i maituah ding uh omlou theilou ahi a, huchi bang hunte in Toupa ompihna i ngen thei gige hi. Kumpi David in Pathian kiang a humbitna a nget bang in eite mahmah inleng hunteng a ngen thei gige i hih dan uh phawk thakthak ni aw. Khovel thilte sang a Amah mah mitsuan leh amasa pen koih gige ding in kisa ni. Kumpi David bang in hiai i thumna laa hong hi hen: Pathian aw, hon humbit in, nangmah ah ka ginna uh ka koih uhi.
“…Pathian aw, hon humbit in: nangmah ah ka ginna ka koih hi.” – Sam 16:1.
Toupa’n simtute hon vualzawl hen! Khalam a masawn semsem thei ding; A nuam ahaksa a Amah toh tonkhawm thei gige mite hi ding in simtute Toupa’n hon ompih chiat hen! Theihna bukim louh ziak a i gen khelh omte Toupa ngaihdamna i ngen hi.
- Thangginom Hangshing
(Laigelh toh kisai kupbeh nuam omleh, Laigelhtu +919615804759 ah thuzaak theih diing) 2nd August, 2022 | Weekly-Inspiration – 106