Gingtute lak ah hi’n ginglou mite lak hileh mitamtak te’n bang hiam hihkhelh i neih chiang un Pathian ngaihdamna tang zoulou ding khop hileh kilawm in i kikoih sek uhi. Pathian a muanna sang a i khelhna uh lian sak khazaw nak i hisek uhi. Hiai bang a kikoihna in lungsim chidamlouhna a hon tut baan ah, hinkhua a beidotna, lungkiakna, mohna leh siamlouh kitanna hon tung toutou thei hi. Khelhna tawp khawk ana hih kha hilehanleng kisikna dik a kisik a, Toupa kiang i zotchiang in a itna in ngaihdam zohlouh ding neilou hi.
Khelhna thu akigen khak chiang in Sawltak Paul (Saul) tanchin lungsim ah ahong lang sek hi. Toupa Jesu Khris gingta nungzui masate soisa tu, suangkulh a koihtu leh a that tu tuh amah ahi. (Nasepte 9:1, 13, 21; 22:4, 19; 26:10-11). Hichi bang a gingtute tung a hiam gamna tuh gawtna tanlou theilou ding abang hi, himahleh tua bang ahikei a, a khelhna bang a gawt in a om keihi.
“…. (Paul) Damaska khua a tunkuan in, thakhat in van a kipan vak a kim ah a hongvak puap hi. Huan lei ah a puk a, a kiang ah, “Saul, Saul, Bang a chia nang honsawi na hia?” chi in, aw a za hi. Huan aman “Toupa, kua na hia?” a chi hi. Toupa’n a kiang ah, na sawi Jesu ka hi; kilhna sikzum tot nang din a haksa hi” a chi hi.” – Nasepte 9:3-5. Hiai huntak ah Paul dinmun in kikoih hileng ahaksat ding dan agenleng ahaksa mahmah hi. Mihingte sawi mai akisak lai’n a sawi Jesu mai a din ding tuh thil haksa lou theilou ahiding hi. Bang chituk in gingtute ana gawt mah leh a khelhna tengteng ngaihdam in a om a, sawltak muanhuai leh Jesu Khris theihpih a athute tangkou pihtu ahong suak hi. Eite leng Sawltak Paul bang in Pathian ngaihdamna tangtak ding i om kei uhi. Niteng a khelhna toh kidim, lungsim a khelhna, mit utna akhelhna leh taksa a khelhna neite i uhi. Hichi bang khelhnate toh A Siangthou Toupa toh om khawm ding thil hithei ahi kei hi.
“…Kuamah mi diktat himhim a omkei uh, khat leng a omkei uh; Kuamah theisiam himhim a omkei uh, kuamah Pathian zong himhim a omkei uh. A hilou lam ah a pialkhinta ua, bangmah phatuamlou in a om khinta ua, kuamah thil hoih hih himhim a omkei uh, khat leng a omkei uh.” – Romte 3:10-12. Hiai bang chuh eite dinmun ahimai hi. Khovel in siatlam manoh huaihuai i chih lai un eite ahi a kisia. Diktatna i gam uah a om kei a, mahni metna ding ahih nakleh khelhna le poisa nawn lou in i omta uhi. I Lamka khosung uh ka enzel a, lungkham huai kanasak mahmah tuh Pathianni a Biakna sang a nopsakna ding zong a mun tuamtuam a i hohsek pen uh kana pawna mahmah hi. Resort tuamtuam minloh ding i khosung uah a hong om panpan ta a, hiaite ahoihna tamtak om lai’n i siatna ding uh ahong suak pen diam chih hon ngaihtuah sak mahmah mai hi. Khawlni a Pathian ngai a, Amah zong a, a Biakinn huangsung lutsang in khovel nopsaknate i pi bawl zawta uh a, utna gamgam tungte i suakta uhi. Hiaite khong i kivel thak na uh hileh i chi mahmah ahi. Hichi bang in Toupa deihlouh dan a ana khosate himahlehang, Pathian mai a thupha i tawi leh Jesu Khris tungtawn a ngaihdamna i tang ding ua, Amah vang in siamtan in i om thei ding uhi.
“….Pathian in khovel a it mahmah ziak in a Tapa tang neihsun a pia hi. Kuapeuh amah gingtate a manthat louh ua, tangtawn hinna a neih zawkna ding un. Khovel siamlouh tangsak ding in Pathian in a Tapa khovel ah a sawl kei, khovel amah vanga a hin theihna ding in a sawl ahizaw hi.” – Johan 3:16-17. Hiai Laisiangthou tuh mitam takte’n neulai apat i na theihsa uleh i zak sasa uh leng ahi. Pathian in hon itlou ana hi zenzen leh eite tunitan mel i muhna ding uh khat mahleng aom keihi. Pa hon itna te ngaihtuah zou gige hileng i gending uh khat kia a om hi, huai tuh Kipahthu gengen ding ahih dan muh semsem in aom hi. Adiak in gingtute lak ah ei nam niamchik leh tawmchik te ki-en leng, Toupa itna leh kepbitna a i om theihlai uh thupi in lamdang lotel hi. Eite lou leng teel ding mitamtak omna lak a Amah thu theihpihte, Amah thuzate leh a itna tanpha baante i hihziak un i kipahna ding uh atam mahmah a, i hamphatna uh alian mahmah mai hi.
Khelhna toh kidim himahlehang hotdam a i om theihna ding un Pathian in a tapa tang neihsun eite sih sik a siding a ahon piakkhiatna khong ngaih tuahtuah zou gige kihi leh, aw hampha hina hang e i chihchih louh ngal uh gen ding dang aom keihi. “Hiai ah Pathian itna i tung uah a honglangta hi, amah ziak a i hin theihna din Pathian in a Tapa neihsun khovel a a honsawlna ah; Hiai ah itna a om, eite’n Pathian i it uh ka chi ahi kei, aman a hon it a, i khelhnate thuphatawina ding in, a Tapa a honsawl ka chi zaw hi.” – 1 Johan 4:9-10.
Tuni’n Toupa ngaihdamna tang zoulou ding in nang leh ken bang khelhna thupi i na hih kha a? I lungsim a hongluah gige khelhnate bang ahia chihte ngaihtuah in Pathian kiang ah kikleng i ut hi. “…I khelhnate thupha i tawi leh, i khelhnate ngaidam ding leh i diktatlouhna tengteng silsiang ding in amah a muanhuai in a diktat hi.” – 1 Johan 1:9. Toupa’n i khelhnate hon ngaidam zoulou ding ahi i kichih sung zaw Amah ah i muang zou taktak kei ua hi ding hi. Hiai vuak hilou in, tua khelhna sal a om utut lai leng i hi zawlai ding a, Pathian ngaihdamna sang a khelh utna lungsim lian sak zaw lai i hi kha ding uhi.
Bang chituk in khelhna a ana kibual kha i hih tak lehleng Toupa itna in hon samsam a, a hon ngaihdam zohlouh ding aom kei hi. Tua a ngaihdamna i tan theihna ding in i khelhnate Amah kiang a thupha i tawi apoimoh hi. “…I khelhnate thupha i tawi leh, i khelhnate ngaidam ding leh i diktatlouhna tengteng silsiang ding in amah a muanhuai in a diktat hi.” – 1 Johan 1:9. Tua khelhnate apan suahtakna thupi leh lamdang Jesu Khris tungtawn in i tang ding uhi.
“….Na kam a Jesu Toupa ahi chih na gup a, misi lak a kipan Pathian in a kaithou chih na lungtang a na gintak leh hotdam in na om ding. Min lungtang in a gingta ua, diktatna a mu uhi; kam in a gum ua, hotdamna leng a mu nak uh ahi.” – Romte 10:9-10.
Eimah mitmuh a khelhna lian penpen i chihte leng Toupa ading in ngaihdam zohlouh ding ahi keihi. Ama hon chiamna tuh i khelhnate kisik a thupha i tawi leh hon ngaidam dia om gige ahihdan i thei hi. Nang leh kei i dinmun i kithei a, tuni’n bangbang thupha tawi a kisik in Pathian kiang i zuan dia chih mimal a i ki-etna uh hong hi chiat leh i chi hi.
Toupa’n i thugelhte tungtawn in theihsiamna leh Khamuanna i tanchiat uah hon piak i ngen a; theihna bukim louh ziak a i gen khelh omte angaihdamna i ngen lailai hi.
- Thangginom Hangshing
(Laigelh toh kisai kupbeh nuam omleh, Laigelhtu +919615804759 ah thuzaak theih diing hi.)
09th February, 2022 | Weekly-Inspiration No. – 88