Hinkhua ah dinmun haksatak mai a maituah lou omlou ding in a gingtak huai kei hi. Khosakna sang tak leh insung nuamtak sung a khanglian te’n leng haksa a tuah uh a om thou hi. Michih in hiai bang haksatna i tuahte uh a kibang vek kei ding a; khenkhat tuah nang a ding in houchik in a kilang thei a, nang thiltuah leng midang a ding in houchik in a muh thei hi. Tua mah bang in midang thil tuah hi’n nang thil tuah hileh tuate haksa ding mah ahi chih theihding a akimuhtheih hunleng a om tham hi. Himahleh tua bang din mun i tuah dan uh, i phut khak dante uh ki bang kimvek lou ahih banah, khosakna leh damtheihna leng kibang lou ahihziakin midang a hi’n nang a hileh a houlua chih theih ding khat mahleng a om kei hi. Mihing te’n bang teng i tuahte uh i hih theih bangbang un i thuak tou zel uhi. Hiai bang hun i tuah chiang un Pathian sap theih in a om diam? ahihkeileh Amah sam thei ding in ei i om theidiam? Pathian ah muanna i nei zou taktak mah hia? Amah ah i kinga ngam hia? chihte tuh tulai hun mahmah aleng tamtak te’n i maituah uh ahi lellel hi.
Pilna leh siamnate a sang dungzui in mihingte’n leng punlam i manoh deuhdeuh uh a, nekzonna ding a sepna nei nailou leh a zong lai tamtak i om uhi. A na neisa te’n lah lungkim zou lou chi’n a sang zaw lam delh in a hoih zaw ding zong in hah takin i pang uhi. Insung ki etkolnate ah damlouhna chituamtuam in a hon bawm a, kikep kidon ngai in tamtak i om uhi. Khovel hiileng hoihlou tuamtuam, thusia tamtak niteng a i zak ding uh leng khawllou in a omlai hi. Ei gam ah bel Pathian in hon ompihna ziakin zinling, tuilian, kial, pingpei huihpi hattak chihte thupilua gen ding a om nai kei hi. Himahleh tuate lou inleng niteng a i buai theihna ding uh tamtak a om veve thou hi. Hiai bang hunte ah bang lungsim leh lungphut i nei uh a? Toupa ah muanna taktak i nei zou uh hia? Khovel thilte leh thildangdangte a i lametna uh nga kha zaw i hi uh hia leh? chihte ngaihtuah apoimoh hi.
Pathian in Amah a kinga te, Amah samte a itdan leh panpih ding a mansa ahihdan chiang takin Laisiangthou ah i muthei uhi. Mansa phet hilou in tua bang a Amah samte kiang a panpihna, A ompihna hon chiam ahihdan Laisiangthou mun bangzah hiam i muh zoh omte i sim ding.
“Huan, mangbat ni’n honsam lechin, k’on humbit ding a, huchi in nang n’on pahtawi ding hi, a chi a.” – Sam 50:15
“Ka tung a a itna a ngak ziak in amah ka humbit ding a: ka min a theih ziak in mun sang ah ka khatou ding hi. Aman honsam ding a, ka dawng ding hi; mangbat lai in a kiang ah ka om ding hi: amah ka humbit in ka pahtawi ding hi. Damsawtna in ka lungkim sak ding a, ka hotdamna leng ka musak ding hi.” – Sam 91:14-15.
“Toupa amah min lou tengteng kiang ah a nai hi, thudik a Amah lou peuhmahte kiang ah. Amah laute deihlam a hih tangtung ding a; a kahna uh a za ding a, a hondam ding hi.” – Sam 145:18-20.
“Mi genthei leh tagahte’n tui a zong ua, a omkei a, a lei uh dangtak in a hulkhin hi; kei Toupa’n amau ka dawng ding a, kei Israel Pathian in amau ka paisan kei ding.” – Isai 42:17.
“Huan, hichi ahi ding a, amau honsap ma un ka dawng ding a; thu a gen sanlai un leng ka bil in ka za ding hi.” – Isai 65:24.
“Ken zaw Toupa lam ka en ding a; ka hotdamna Pathian ka ngak ding; ka Pathian in a hon ngaikhe ding hi.” – Mikah 7:7.
Hiai Laisiangthou thute lel inleng lungmuan huai lokhin kasa mahmah mai hi. A lungmuan huai kasak diak a om a huaituh, “….amau honsap ma un ka dawng ding a; thu a gen sanlai un leng ka bil in ka za ding hi” chih Pathian hon thuchiam ahi a, i taksap te uh leh i buainate uh hon theihpih lotel ahi chih a chiang hun tawk mahmah mai hi. Hinkhua nuamtak a khosa den ding kihilou ahi a; lungkhamna leh beidotnate i tuah hun uh a hongtung thei gige hi. Zing a bang hongtung ding hiam chih i theihtheih louh mah bang un tu in kipak leh lungkim takin om kichi mahlehang tua bang a om thei den ding kahi a chih theih kei hi. Niteng hinkhua a hon panpih a ka theih mahmah ahihleh, Laisiangthou sim tam phet hilou a, Laisiangthou thute theihtheihna a poimoh mahmah hi. Hinkhua haksa ka tuah hun in Laisiangthou va phen a vasim ding haksa kasak phet lou banah, nuam liailou kasak hun atam sek hi. A sim utlou kahi kei a hichi bang buaina leh haksat hunte ah tua bang a va om pen baihlam hetlou ahi ka chihna ahi. Hiai bang hunte ah Laisiangthou thu i na theih om sa te’n i lungsim hon luah mahmah in tuate’n lungdam baihna, kipahtheihna, Toupa sapna leh Amah ngaih semna hon tung hi. Ka hinkhua ah Laisiangthou thu kana simkhak, kana zak khak te’n a hon panpih mahmah mai hi. A tung a thu tamlou i taklat theih omte hoihtak a theivek hilehang tuateng inleng hon ompih in hon khamuan mahmah ding in a gingtak huai hi.
Leitung a i om na uh a ziak thei gige hileng bel mahni buainate leng tawm deuh ding hi. Tua bang ahikei a pilna leh siamna, hauhna leh neihnate a hongtam chiang in hithei kisakna, mahni a kingak semna a hon tung sek hi. Himahleh khovel thilte a kingakna in sawt a daihlouh dan ana chiam khaleng om ding in i ki lamen hi. Eilam leh khovel thilte hilou a Pathian mah ahi i ki ngakna ding uh; niteng hunteng a Amah toh i tonkhawm theih uh ahi i taksap pen uh. Naupang noute Nu le Pate a akingak mah bang un gingtute om ding dan zaw hunteng a Pathian a kingakna hi zaw ahi chih theih gige a poimoh a, alou theilou leng ahi. Khenkhat te’n hiai i pomsiam ding uam ah; hatlouhna, bahna, buaina leh haksatna chihte i teel theih uh hileh i teel uh ka ut zaw hi. Himahleh hiaite tuh pumpelh i sawm zaw uh a; lampi tuamtuam i maisek uhi. A diktak in bel hiaite ahi Pathian i naihna uh, Amah i phawkna uh; Amah deihdan a iki bawl phatna uh hi zaw ahi chih theisiam leng i ut hi. I hatlouh ni te uah Pathian thupina, a thilhihtheihnate hong kilang zaw in; i hatlouhnate uah Amah pahtawi a hong om thei zaw ahi chih thei thakthak ni. Mihing te’n nuamtak a khosa den ding, hauh ahauh ding, mi bangbang a om ding chih lungphut i nei uh a, himahleh hiaite’n Pathian toh hon ki gamla sak deuhdeuh in i hinkhua ua Amah pahtawi sang in thaangtatna, ut dandan a om in Amah deihlouh dante in i om zaw uhi. Thupi dia i teel mah bang in haksatna leh buaina i tuahte uah kipahdan thei in tuate Pathian naihsemna, Amah toh kituah semna in zang leng leitung a i omna san uleng i theisem ding uh a; hinkhua tua sang a nuam zaw in niteng hunte i zang thei zaw ding uhi.
“Kei a grepgui ka hi a, nou a hiangte na hi uh. Kuapeuh keimah a om gige a, keileng amah a ka om gige na, huai mah tampi in a gah hi; keimah lou in bangmah na hih theikei uhi.” – Johan 15:5. Ngaihtuahna saulou pelai leng Toupa toh tonkhawm loupi a niteng hinkhua zat gige ding chih chu ei gingtu kichi te ading in lamdang pi khat leh makpi khat a suak hi. Aw kipak mahni, nuamtakin khosa mahnni, lohching mahni himahleh Toupa toh omkhawm louh in zaw tuate’n bangtan hon daih ding ahia? I Khalam dinmun mahmah bangleng bah hikha thei gige ahi chih thei in i dinmunte uh Toupa ah ki-en chiang gige leng i ut hi.
“A man a hon limsak gige ziak in na mangbatna tengteng uh amah ah nga vek un.” – 1 Peter 5:7. Hinkhua ah khatveivei mahni mahmah bangleng ki muang zoh louh hun hong om thei zel hi. Ei a i ki muanlouh banah lungkiat theihna ding i kim-i-kiang ah atam mahmah hi. Tuate enlou a, eimah hatna leng suanglou in Pathian sam in Amah ah kinga leng Aman hon limsak lou hetlou ding ahihdan i mu hi. “Kei Toupa na Pathian un, Lau kei un, k’on panpih ding, chi in, na khut taklam uh ka len ding hi.” – Isai 41:13. Lungmuan huai lua hilou maw!
Leitung ah lametna nei lou kisa in, buaina leh haksatnate tuak kahi chi in lunglel leh mangbang takin om kha mahlehang Toupa ah lametna, kipahna om ahi chih thei semsem ni. Lametna omlouhna ah, lametna Toupa kiang ah i nei a; Haksatna munte ah lungmuanna leh lametna Toupa ah a om a; lungkhamna leh beidotna hun ah Khamuanna Toupa a om hi. Leitung a om a, genthei tak a khosa lai a denchiang a Toupa mai a zumhuai pi a i om sang in tu ahun lai in Amah sam in, Amah deihdan in khosa ni. “Muh theih a a omlai in Toupa zong unla, a nai lai in sam un” – Isai 55:6. Tuni’n nang leh kei kisa thak in i Toupa Pathian deih bang aom ding; Amah toh kinaih semsem ding in kisa ni aw.
“Hun kipahhuai ah k’on ngaikhia a, hotdamna ni ah k’on panpih” a chi ngal a. Ngai un, tu hun kipahuai ahi a; ngai un, tu hotdamna ni ahi!” – 2 Kor. 6:2
Toupa’n i thugelhte tungtawn in theihsiamna leh Khamuanna i tanchiat uah hon piak i ngen a; theihna bukim louh ziak a i gen khelh omte angaihdamna i ngen lailai hi.
- Thangginom Hangshing
(Laigelh toh kisai kupbeh nuam omleh, Laigelhtu +919615804759 ah thuzaak theih diing)
27th April, 2022 | Weekly-Inspiration – 96