SINGTANGMITE’ KHRISTMAS

2

Khristmas Ni vaidawn diing leh lawm diing in na manta hia?

Khristmas i chih chiang in, mi tampite a dia innkuante leh lawm-vualte toh hun nuamtheipen a zat khawmna hun himahleh, bangzahhiamte adia lunglendan chituamtuam tuntu ahi.
Khristmas anaih deuhdeuh toh kiton in, mi khenkhatte a di’n zu-le-sa, khamtheih leh kihaisakna chituamtuam a hun zat mangthai diing chihna hileh kilawm khop in hun azatdan uh kikheng hi.
Nungak-tangval leh khangdawng hunkhopte’n numei-pasallam (sex) a thanghuaitak a omtheihna leh zu leh khamtheih hihna hunlem zon hun in Khristmas hunbi zang  diing uhi; lawm-le-vual toh sa-lam nopsakna diing hiam, ngaihzawngte toh hunlem zattheihna diing hiam a ‘Carol’ leh saptuam programte suanlam a zang leng mi tampi hong om diing uhi. Papi khenkhat a dia, zi leh ta khuallou zen a nungakte toh hunlem zattheihna dia zuau gen a buai hun hong hi diing hi. Nupi khenkhat tangval sai a buai om diing ua, a khenkhatte lah, pasal leh tate limsakman lou zen in van thak buaipih in om diing uhi.

Khristmas Ni a tunma, zan bangzah hiam akipat in Khristmas’ Laate, kham philh-phelh kawm a khahkhia a, ki-haikou zoi-zoi a, kiuangsaktak a kholai fang pawl leng hong omzel diing uhi. I Pathian uh huchidan khawng a phawk ut hileh, tuni’n Singtangmite i dinmun uh hichi siat lou diing hi.

Gitlouhna suah ut himhim a kisaan pawl hong om get dua, kisual leh kisattuahna thawm hong omzek maithei diing hi. Thunei leh kiphasak ut pawl khenkhat, banghiam ziak a mi ngiik hiam ahihkeileh ki-ngiiktuah diing leng hong om maithei lai uhi. “Lem leng hen” chih hunbi hong tun chiang a Ei Singtangmite buai utdiak hileng kilawm hi. Lamdang!
Mi khenkhatte, van thak neihlouh diing ziak a Khristmas Ni lin mahmah leng om diing uhi. Jesu Khrist lawm ihi uhia ahihke’h vanthak neih kidem? Huchikawmkal ah, mi bangzahhiamte, Khristmas bang hou sa gawp a, ahunbi veng meng dia deih bang leng omkha diing hi.

I thilchiinte uh ahoihlou teng kia hon taklang mahleng le, a hoih leng om tham hi. Bukimna leh siatna himhim omlou dia lamen hizawlou in, ahoih sang a asia tamzaw ahihziak in puaknat huai lua a, genkhiaklouh theihlouh suak hi.

Azualpi hiaiteng baan ah, “pistol lem a kappuak kap a i naupangte buaisak a, khangdawng leh piching khenkhat natawm haihuaitak a halpuak ngaihtaktak a haal leng hong omzek maithei” chih gelh tel ka sawm laitak in, halpuak leh kappuakte khamna philantrophic organization tuamtuam in Joint Press Release a bawl uh kava mukha chet a ka kipaak petmah hi. Ei Singtangmite’n i hihpeuh ah, i seppeuh ah, thupuukna leh vaihawmna peuh ah hitaleh, Khristian ihihna uh akilat gige poimoh ahihziak in, hichibang khaamna in hon ki-aansak mahmah hi. Immanuel in ei Singtangmite hon taisan lou ahihlam hiai thusuah tungtawn in leng kimuthei hi. Ei Singtangmite’n thil tuamtuam pansan in kigawmtheihna diing geel sek mahle’ng, Pathian kia ah ahi i kigawmtheihna diing uh chih i theih uh leng poimoh hi. Jesu Khrist in Amin thupi eite lak ah thupizaw sem in hong thangsak zel henla, A thupina in hon ki-gawm sunzomsak zel hen aw.

I biakna lam toh kisai a kisakkhawlna leng gen zek le’ng uthuai kasa hi:
Tha-le-zung, sum-le-pai leh hun tampi seng in, Khristmas lopna di’n lam tuamtuam ah ikisakhawl a, hoihthei in manphathei lua hi. Tangtawn sihna akipat a hon suaktasak Khrist Jesu, Khristmas Ni kia lou a leng i lop luat diing uh ahi.
Huchi kawmkawm in, pilvan leng poimoh mahmahta hi’n ka thei hi.
Tumlam gammite (sapte) a tangpi in i ngaisang mahmah uhi. Amau mah Gospel hong pawlutte ahi zomah ua, Pathian hing be khalou hileng bang zaw, amaute kibe ut phial leh kilawm in kilang hi. A huchih ziak mah in amau chiindan tampitakte etton a nei in, changkanna in i koih uhi. Amau suangtute’ thugousiah leh tawndan, Pathian hing a biakma ua a chiin te uh, Pathian hing a biak nung ua leng a khahkhiak vek louh uh om hi. Huaite hei lamdang ua, biakna toh kisai tawndaan a azehtelte uh, singtangmite’n (mimal, innsung leh saptuam) ina aangvaan atam sim ta hi. Tu diakdiak in computer leh internet ziakin Khovel neu gawp a, Tumlam gammite chiin i koppihte uh (Khrismas lopna toh kisai a) i pii bawl zaw hiai-hiai ta uhi. Khrist neu deuhdeuh a, a Birthday lopna thupi deuhdeuh hi. A birthday (ei mihingte’n i bawltawmsak), ei nuamtuamna dia i lop pen, A hehpihna leh zahngaihna ziak in hon saansak hidi’n i ngaihtuah hi. Himahleh, en, Amah pahtawina leh angvaanna a zangkha nawnlou in mihing vai a nopsakna leh bangtan hiam a, ikisiamtanna dia, A pianchampha lawm kihita in ka thei hi. A hi huau-huau leh anopsakna hah buaipih law mahmahta in, I hondampa val hita chih ka ngaihtuah khak chiang in, ka lungtang a na vulvul hi.

Apoimoh hi hetlou napi in, innsung hi’n Biakinnte hitaleh, chei di’n ikithalawp mahmah uhi. ‘Christmas tree’ lianpipi te, sum tampi seng in, nalh taktak a chei in biakinn sung khong ah i koih hial uhi (Huai singkung chei in khalam a i khanna dia bang semkhia a, hon bang chi panpih ahi di?). Biakinn natawm chei poimoh salou ahihdan Toupa Jesu Khrist’ kamsuak Luke 21:5-6 ah kimu hi; tangtawn daih diing thilte sang a tangtawn daihlou diing khovel thilte apoimohtan khel a thupizaw a koihlouh diing chihna ahi. Santa Claus (Khrismas puteek) leh a uniform diakdiak; Khrismas lopna toh kisai ah sunglai tangsak in, i paakta mahmah uhi. Pathian hing biakna compound sung ah Santa Claus, milem phuahtawm leh bawltawm ahihlam thei kawmkawm in, Pastorte leh Upate theihpih leh lemsakpih a koihkhe liau-luau pawl bang ana ki-om hi. Poisakna dia poisalou a, poisaklouhna diing; Khalam vai thilte khawng soisel a, kilehlak tak a bangtan saptuamte, Pathian mai a kizuak a om ding ihi ua? I gam, khotang leh saptuam dinmun sia kua ziak hituan eita? Nang leh kei thulimlouh ziak mah himai lou mo? Asiatna dia thohkhak neilou kichite’n leng, dai dide a asia leh adiklou omte et thoh hikha thei kihi hi. I hih diing thei zen a hihlouh leng khelhna ahihlam phawk ni (Jakob 4:17).

Khristmas Ni hong tung a, zu-le-sa, ganja, khamtheih-guihtheih, ‘sex’ leh khelhna chiteng a pengnawng in, taksa polam silsiang vilvel in, van hoih pipi a chei in Biakna programte Biakinn teng dimlet zen in i uap uhi. Nitaklam annkuang kilui sek pen leng, saptuammite kinaih sem na’ng leh ki-unau nadia zang zawlou in, innkuankuan a kihuituam tuktuk in, ann nekkhawmna phual a va pang zual in, innlam kinoh deuh in iki zot chiat hiau uhi. Khristmas’ ann nekkhawm omzia; Khrist a i unaute toh i kinaihsem na’ng ahihna dau petmah ta hi (Nasepte 2:46). Tutung zaw, ann ne a i kuan chiang un, i kiim ikiangte leh midangte va houpih in, va huai ni maw? Huai hun tomchik pen manphatakin kikantuahna dia leng zattheih ahihlam thei chiat ni maw?

Tutan a ko’n taklatte Khristmas hihna leh lopna ahoihlouhna ngen mah ahi. Khristmas lawm hinapi in Khrist toh kisai kha mahmah lou a, Khrist mel kilangkhe lou ahihziak in i taklat a, i gengen poimoh hi. Kikhekna a omna dia i hihtheih omte lak a amasa pen ahihleh, thil omdan diktak genkhiak ahi hi. Za-ah-za (100%) Khristian kichi Singtangmi atamzawte lungput leh omdan a kipat i muhtheih ahihleh, Pathian honsapna toh kituak a, i hinkhua te uh, zangkha teuhlou ihihlam uh kilang chiang mahmah hi (Ephesians 4:1).

Mun tuamtuam ah Pathian phatna leh pahtawina, Amah phatna late leh Amah ngaihna late sa a, limtak leh nuamtak a lenkhopna om law tham diing hi. Ahia lah, mun khenkhat a lenkhop khawng kidem bawl chih bang, mic (paungaihna) ngaihtaktak a kikhawng-tuah vengvung, khua khat a om, saptuam tuamtuamte’n ki elna khawng a zangkha i hihleh, Pathian pahtawi hi kha lou a lasak a bengseng kidem kihimai hi. Koi Saptuamte’n Biakinn chei nalh zaw a, koi saptuamte’n Khristmas zang sawt zaw chih khawng a kidemna in Pathian pahtawikha hetlou ahi chih thei ni. Pathian leh A Sapum Saptuamte paulam a mihingte ki-el ihi lel uhi.

Lenkhopna khenkhat bang, kisuklimna tamthei lua a, Pathian biakpiakna ahihlam beisak thei hi chih thei ni. Amah i biak Pathian siangthou lua ahihman in Kha leh Thutak a biak diing hon ngiat ahi chih leng chiamteh ni (John 4:24). Mihinglam leh khovel vai a nopsakna leh kipahna diing zong a huaite i piibawl luat uh hiveh aw i paisual naak na uh. Toupa Jesu’n khovel nopsakna piibawl dia A sisan mantamtak leh gimthuakna chiteng thuak a, hon tankhia a, hon sap hilou ahi aw, lawmte! Ei leh ei kingaihsak lou a, i Khros kipuak a, I tangtawn mun, a nungzuikawm a zuan dia hon sam ahihlam gen tam lua chih omlou hi’n ka ngaihtuah hi (Luke 9:23). Khovel a om a, khovel paidan a pai lou a, lungsimte hihthak a kikhek lamdang dia hon deih, leh Ama’ deihdan zong dia Thu honpia Pathian ahi chih kiphawksak thakthak ni (Romte 12:2).

Khrismas hihnatak bang ahia?
Ei Khristiante a di’n bel, Khrismas omzia taktak ahihleh, Khovel Hondampa Jesu Khrist pianchampa leh Amah ngei lopna ahi. I Toupa Jesu, mihing hong suak a, ei mikhial niin mahmah, ‘tangtawn meidiil’ tang diingte, hunkhia kia hilou a ‘tangtawn hinna’ hon pe dia, ahong pianni lopna dia kumkhat a khatvei Khristmas i zat luat diing mah uh ahi. A hong piang ngei ahi chih iki phawkthaksakna diing in leng poimoh a, a manpha thei pen a zat isawm diing mah leng ahi. Himahleh, Khristmas hongtun teng in kha-lam vai ahihna hong kiam hiaihiai a, sa-lam vai in hong kihei hiaihiai ta hileh kilawm in hong kilang khe deuhdeuh hi. I sapum khial leh niin himah leh, Jesu Khrist ziak a Pathian’ Temple ahihna bang a puahpha zawlou a, polam kizepna leh silh-le-ten a thupi taktak a chei ekek chih khawng i poimoh koih zawta uhi. Khristmas ahihleh Jesu Khrist ah ngiim in khohsak (focus) le hang, ahihnatak ah lawm kha kihi mai diing hi. I dinmun hichi ahihlam phawk a, vei a, pawna mahmah bangzahhiam ki om di’n ka gingta hi. Huchi ahihleh, thil hong kikhekna dia pan la di’n iki hanthawn hi. Midangte i lametna tan kia in beisak nawn kei ni. “Ke’n kana hihtheih omte ka hihta diing” , “A pantu in ka pang diing” chi a, chihtakna toh sa-lam sang a kha-lam piibawl a Khristmas lop pantu hi di’n thupuukna na la thei hi. Na la ngam diam? (Jakob 2:14-26; Jakob 1:22-25, Matthai 5:16)

KHRISTMAS MESSAGE:
1. Naungek Jesu Khrist bawngbuk a hong piang, gan annpiakna a sial a om chih thudik mah ahihchiang a gen diing mah leng hi. Himahleh, Khristmas toh kisai a I Kumpi leh Hondampa Jesu Khrist i gen chiang in, niamchik a ahong piandan, gen thupi pen in inei sek ua, simmohna dia zang ihi ta uhi. Niamchik a ahong piandan i gen mun tuk un, van Pathian Tapa; Kumpite’ kumpi, Toupate’ Toupa ahihlam leng gen mun zawta le’ng, zahtat leh lauh diing ahihlam kiphawk thei zawdeuh diing hi (Kilaakna 19:16).
Isai 9:6-7 ah, ‘vaihawmna a liangzang ah a tuang ding a; a min Lamdang, Lemthei, Pathian Hat, Khantawn Pa, Lemna Lal’ chi in A thupina chiantak in a kigen vele. A kingaihniamna kia genkhop hang a, poilua hi.
‘David tutphah tung ah leh a gam tung ah a vaihawmna khandan leh lemna in tawpni aneikei diing, hihkip ding leh tua kipan a khantawn tan a leng vaihawmna leh diktatna tungding diing’ chi a mohpuakna thupi piak a om ahihlam leng i mu hi. Toupa Jesu Khrist hihna thupilua hi. Hichituk a thupi leh lamdang, haat leh thilhihthei, diktat leh siangthou Pathian in eite hon iit ziak a, ei mimal lungput leh dinmun dungzui a, i batphaakna tantan chiat a i na pomtheih dia, ahong kisiamna pen, nelhsiahna in ina zang zawta uhi. Den chiang a Angel simsenlouhte toh Khovel thutankhum diing leh vaihawmkhum diing a Ahong pai chiang in, zekaita diing hi. Ahunlai in, anaih lai in, zong thak leh thei thak di’n kisa thak ni. (Isai 55:6)

I Toupa’n hon khual ziak a, i theihsiam theihna diing leh pomtheihna diing kia hilou a, Ama’n leng hon theihsiam a, i tung ua a zahngaihtheihna diing leh kisuanglah hetlou a akiang i zot ngam na dia mihing a, dinmun niamchik a hong piang hizaw hi, i simmohna diing uh hizawlou in (Hebrute 4:14-16). Toupa Jesu Khris pen i pianthak chiang in i Kumpi leh Hondampa dia sang ikichi sek hi. I Hondampa dia saan pen thanuam mahle’ng, i Kumpi di’n  kisang ut ngellou bang zel hi. Tanchinhoih (Gospel) pen bukimtak a sang kichi diing ihih leh, Toupa Jesu pen i Hondampa kia hilou a, i Kumpi leng ihihsak ding ahi. Jesu Khrist Kumpi ahi chih ki hilhhilh di’n poimoh kasa mahmah hi.

2. Mihausa leh mithupi dan a hilou a, mi maimai dan a, mun leh dinmun niam tak a hong piang, “giahnamun diing natawm tangzou lou” chi a i ki khasiatsak uh leng tawpsan ta ni. Va hehpih lawkha a, eite Tanpa ahihna neplua a koih khakha leng ihi diing uh. Pathian pen ei va hehpih diing hizawlou a, ei a dia Ahong kipiakzohna leh athuaknate pom a, Amah Kumpi a saang a, bia a, i hinkhua pen Amah thumanna a zat ding hizaw hi. “Mi zawngte leh gentheite a diing natawm a kipiaktheihna diing” chih leng hah gen law zel hang a, mi zawng leh gentheite piakbawl a, i puanten asang-asing man te toh, i suit mantam taktak te toh, saptuam leh khotang a i hihna uh thupitaktakte toh kiniamkhiak haksa simpi leng hi diing hi. A mizawng leh genthei kichi te’n lah Toupa Jesu in hon hunkhia a, hon tawisang a, thilhihtheihna leh vualzohna hon pe ut diing a gingta zou nawnlou leng kihi diing hi. Mihing suangtuahna dan a, mi zawng leh gentheite i muhsit bawl bang a I hondampa leng mizawng leh gentheite toh dinmun kibang a koihkhawmkha a, musit hitel ihi uh. Lawmlawm! A diktak a, Laisiangthou a Jakob 1:8na gingta ding ihih leh, Jesu Khrist ana saangte himhim mihingte suangtuahna a dinmun niam himah le uh, Pathian in adinmun uh sangpi a koih ahihlam kigen hi. Pathian in Jesu Khrist ziak a ahon koih thupidante leh hon koih saandante khawng gen mun deuhta le hang, vualzawhna leh vualzohna lam a kal kisuan tam dia, manpha law diing hi. Jakob 1:9 ah khovelmite’n mihausate ngai thupi in biak bawl tuttut in, a maipha uh zon kithalawp mah le uh, suun khat nisa in ahai vul zel paakpalh bang a, athupina uh daihsawtlou ahihlam leng kigen hi.

Khovel a i zawnna leh hauhsakna, saptuam leh khotang a i hihna, numei ihihna hiam, pasal ihihna hiam toh tangtawn hinna leh Pathian Kumpigam a i tanmun ding in kisai khakna neilou himhim hi.
Pathian lauhdan sin a, Jesu Khrist kumpi ahihna pom a, thumangtak a anung zui chitchit te kia in tangtawn hinna ngah ding ua, Pathian Kumpigam a tanmun thupitak nei diing uhi.

Lazar leh mihausapa’ tangthu itheihsasa hileh leng, taklat ut ka neihziak in, genthak zual leng ka chi hi: Lazar ahihleh mizawng ahi a, gentheihna, zawngkhalna leh natna in dim mahleh, vangam tang hi. Mihausapa ahihleh meidiil a tui taakkhat maimai a leimong a taaksak dia ngen ngutngut hitel ahi chih leng athu a itheih dimdem sa uh ahi. Himahleh, ataktak gam ah, i tu dinmun ua kipat a ka muh ahihleh, mihausapa’ khovel hihna eng leh deihgoh ngoihngoih atamzaw kihi ta hi. Ei deihtelna a teel theih hileh, Mihausapa’ lei hauhsakna leh thupina teel ding in a tamzawte amansa uhi. Huchituk a Setan in i lungsimte uh hekkawi hita maizen hi. Atamzawte’n tangtawn hinna chan ngam zen a, lei hauhsakna leh thupina deih zaw hitel ta uhi. Hiai i lei khualzinna tomchik petmah sung a i lampi tot pen in, i tangtawn gam diing, Vangam hon tun diing ahi hia, ahihkeileh meidiil hon tun ding ahi zaw diam? chih theihkhenna ding a kivelchet chihte khawng bang kipeih nawnlou hi. Khovellam a hauhsakna, thupina leh nopsakte’n i Pathian’ mun luahta hi. Dahhuai lua.

3. Mihingte kiang a tangthupha, Jesu Khrist hong pianthu Angel khat in Belaampute kiang ah ava puang masa pen hi. Belaampute mi zawng leh dinmun niam ahihlam uh i gen naak uhi. Hileh leng, Tanchinhoih atak a hong tangtunna zakha masapente leh apuangzaaktu (evangelist) masa pente ahihna uah, a dinmun uh athupidan leh azahtathuaidan uh i gen kholkei uhi (Luke 2: 17-18). Belaampute’ zawnna leh dinmun niamna i hahgen ziak un, mi tampite’n i Toupa Jesu toh zawnna leh dinmunniamna mekbelh in, nawlkhin uh hi’n ka thei hi. Belaamchingte ahihleh, Leilam a Amah hihna koppihtute ahihziak ua, Ama’n ngaisang mahmah hi. Belaampu hoih toh Amah kitehkhin hitel hi. Belaampu hoihte’n a belaamte uh awlmoh ua, kizopna hoihtak neihpih uhi. A belaam te uh a dia ‘Pu’ hi ua, thumangtak a azuihna ding un kipumpiak in ching uhi. Belaamte’n a Pu’ aw kia akipat in thupiak zui uh a, achih bangbang in om ua, a pii na lamlam ah muangtakin zui uhi. A pu’n amau kem bit in khotuah mahmah a, huchi kawm kal ah, khat lel leng vaakmang a aom khak leh thuakzou lou a, 99 te taisan zen in khat vaakmang pen zong di’n kuankhe tel hi. Belaampu hoih leh a belaamte’n kiguizopna hoihtak aneih bang ua, i hondampa eite toh hoihtak a kiguizopna ineihtheihna ding a, eite a dia hong kipumpiak hitel hi. Belaampute dinmun niam sa a, i simmoh bawl dan ua i hondampa Jesu Khrist leng ki simmoh kha hitel veh aw. Dahhuai lua!

4. Luke 2:9-13 a kipat itheihkhiak ahih leh, Toupa’ Angel khat, belampute’ kiang a Naungek Jesu Khrist hong pian hilh ding in va kilaak hi. Jesu Khrist’ pianthu, thumanpha akipuankhiakna di’n Pathian’ thupina kiselzoulou hial in a kiim uh a taanvak hi. A thupidan! Angel khat kia sawl himah leh, chang 13-14 a i muh bang in, Vanmite kisuumzou mahmah lou in, “Tungnungpen ah Pathian thupi hen la, leitung a a kipahpih mahmah mihingte lak ah lemthu leng hen.” chi in mihingte a diing a lametna hongtung puangkhia in, Pathian phat zuazua uhi. Chimulthohhuai hilou maw, hiaite khong? Na ngaihtuahna uh ana taisak mah dih uh, Thupilua eive, i hondampa Jesu Khrist! Nang leh kei a hon iit ziak a, tupmawng a, Pathian ahihna pen kitheihmohbawl a mihingte hihna hong koppih hitel eive!

5. Suahlam mipilte i gen kha gige hi. Amau tungtawn a Pathian in hon taklatte suutzek leng uthuai kasa hi.
Bible sutsiamte gendan in, hiai mipilte (Magis) ahih uleh, kumpi bawlte (king-makers) ahi uhi. Kumpi Darius hunlai a, a kumpi vaihawmna a Daniel in a makaihte ahi uhi (Danial 2:48). Amau ahih leh, sahkholam a siamna hau mahmah, gamsung paidan leh vaihawmna lam a siamna sangtak nei leh pil mahmah a, zahtathuai petmah pawlte ahi uhi. Daniel toh hoihtak a ana kithuah khawm ahihziak un, Jesu Khrist hong pian diing le ana kikhilh ngei uh hidia, huchia akhang a ana kihilh sawn zel ua, ana suizom zel uh hidi’n Bible suutsiamte’n gen uhi. Kumpi bawlte ahihziak mah un, Kumpi Jesu hong pian tak in, Kumpi a hihna puangkhe diing leh be diing in gamlapi akipat in ana kuan vengveng uhi. Amau athilpiakte un gennei ahi chih, Bible siamte’n gen uhi. Dangka-eng (kumpi adia thilpiak kilawm), Begaw (sathau namtui, siampu ahihna toh kituak) leh Murrah (sathau namtui mah, misite vuina a ana kizang, asihna di toh kisai a gen nei) in naungek Jesu Khrist va en in, amai a va kuun in va bia uhi. Hiai suahlam mipilte ahihleh, mipil kia hilou in, mi hausa mahmah leh thilhihtheihna thupitak neite ahi uhi. Mipil, mihausa, leh thilhihtheina nei, mi thupi bangzahhiam gamlapi a khualzin khe ding in suak leh sepaih toh kuan ngei ding in gingtathuai chi uhi. Huchibang a, akaihzatam teng utoh thupitak a kuan lou a, amau mi bangzahhiam kia kuan hile uh leng, Kumpi Herod in zahtattak a ana vaidawndan akipat in, ahihna uh thupi ahi chih theihtheih hi. Ahih diing uh khamlou a phutluih leh banghiam loh ngamlou hileh kilawm in Bible ah imu hi. Huai akipat imuhtheih ahihleh, Mi zahtathuai leh milauhhuai ahi uh chih ahi.
Kumpibawlte ahih ziakun kum 600 paisa akipat a, Kumpi Jesu Khrist a pian diing kigenlawk ahihna bangbang in va bia in va pahtawi uhi. Hiai suahlam mipilte ahihleh hauhsakna, pilna leh thuneihna thupitak tawite ahihman un, amau Kumpi Jesu mai a kuun a, abiak chiang un, khovel a thil thupi penpen tengthum; khovel’ hauhsaknate (wealth), khovel’ pilnate (wisdom and knowledge) leh khovel’ thilhihtheinate (power) huaini in Jesu mai ah kuun khin chihna himai ahi. Khovel thupina tengteng Jesu Khrist ngeklai in Amai ah kunkhin ana hitel veh aw; ngaihnepna di mawngmawng omlou hi. Thupi lua, I Hondampa Jesu Khrist thupi lua hi. Halleluiah!

6. Isai 53:9 ‘Huan, hiamgam a hih ngei kei a, a kam ah khemna himhim om ngei kei mahleh, a han mi giloute kiang lam ah sehsak ua, a sih nung in mi hausa kiang lam ah a om hi.’
Gutate leh migiloute toh asihdan uh kibang mahleh, asihnung in bel mi hausate kivuidan in kivui hi. A mihing luang pen, tomchik sung lel ding himahleh, kilawmtakin leh duattak in sial (vui) in om hi (Johan 19:39). Pathian in A Tapa tang neihsun ei migilou leh kihhuaite khelhna tatna dingin in asih phal mahleh, migilou te’n simmohtak leh nelhsiahtak a abawl ding uh aphalsakna tan ana om ahihlam hiai i changtel in taaklang hi.

7. Nasepte 13:37
‘himahleh Pathian kaihthoh in zaw muatna a mu kei hi.’
Jesu Khris taksa a kivui hunsung tan mihing kivui khinsa muatlou chih omlou hi. Amah, i Hondampa ahih leh, mihing’ sapum bang pu in, mihing dan in hong si mahleh, mihing vui in kivui mahleh, mihing taksa muatdan a Pa’n a muat diing ana phallou hi. Huchituk a koihchituam a koih manpha ahihlam thei ni.

Thukhitna:
Lungsung tawng a hon khamuan leh tha hon pesek khat ahihleh, kilkhat a mi khat-le-nih, Pathian lau leh diktattak a, kuamah pahtat leng lohlou a, Pathian Gam nna sem ngitnget avangkim in ka mukha zel hi. Pathian sapna Aw kichiantak za a, Pathian a iitna uh hinkhiakpih a, asep diing uh om bangbang, gim-le-tawl leng khawksalou a, sum-le-pai leng chiil hetlou a pang ka mukha zeuhzeuh hi. Lungtang tengteng, hinna tengteng leh lungsim tengteng a Amah iit ding a Thupiak zui dia panla, leh innvengte amau a ki-iit bang a iit dia thupiak theihtawp a kalsuanpih omte bang ka muhkhak zel ziak in kipahhuai kasa hi. I lak uah Pathian om ahi chih ka chian hi. Amah kiang ah kik in, Amah thupi pen in koih le hang, innsung, khotaang leh Saptuam in damna kingah diing hi. Singtangmi nam tuamtuamte kituah theihna diing leng Pathian kiang kia ah aom hi. Amah naih deuhdeuh leng, eite leng kinaih deuhdeuh diing ihi uhi.

Asia tampi lak ah, Pathian in mite tungtawn A nna Asepte mukha zelzel diing a mitvaakna leh hamphatna a hon vualzawl ziak in Amin thupi ka phat hi.

Sam118:23
Huai tuh TOUPA hih a hi a; I mitmuh uah a lamdang ahi.

HALLELUIAH! AMEN!

Simtute Toupa’n Amah lungtuak in Khristmas hon zangsak chiat hen, Jesu Khrist min in. AMEN.

 

– Chingngaihlian Tunglut

December 21, 2019/Article No. 10

(Laigelh toh kisai kupbeh nuam omleh, laigelhtu +919892316430 ah thuzaak theih diing hi.)

 

Chingngaihlian Tunglut
WRITTEN BY

Chingngaihlian Tunglut

She is one of our co-founder and our in-house counsellor. She does freelance counselling in church and community. She is also involved as a counsellor at Bombay YMCA Counselling Centre, CBD Belapur, Navi Mumbai.

Leave a Reply

Your email address will not be published.

2 thoughts on “SINGTANGMITE’ KHRISTMAS

  1. Hoih lua.. 👍👍👍

Book Appointment